Урысыем икинематографистхэм я Союз иотделениеу АР-м щыIэр кIэщакIо зыфэхъугъэ я VI-рэ кинофестивалэу «Саусэрыкъо дышъ» зыфиIорэм къэралыгъо 22-мэ къарыкIыгъэ кинематографистхэм яIофшIэнхэр къырахьылIагъ. Урысыем, Белоруссием, Боливием, Германием, Киргизием, Индием, Испанием, Америкэм, Монголием, Тыркуем, Китай, Узбекистан ыкIи нэмыкIхэр Iофтхьабзэм хэлэжьагъэх.
Кинофестивалым икIэщакIоу режиссерэу, АР-м ыкIи КъБР-м искусствэмкIэ язаслуженнэ IофышIэу, УФ-м икинематографистхэм я Союз иотделениеу АР-м щыIэм ипащэу Нэгъэплъэ Аскэрбый Iофтхьабзэм къытегущыIагъ. Ащ игъунапкъэхэм зызэраушъомбгъурэм, къэралыгъуабэмэ яфильмхэр зэрэхэлажьэрэм зэригъэгушIуагъэхэр зэхэщакIом къыIуагъ.— 2026-рэ илъэсым зэхэщэкIо комитетым лъэIу тхылъ 1081-рэ къыфагъэхьыгъ, ар гъунапкъэу дгъэнэфагъэхэм ашъхьадифыгъ. Кинофестивалэу «Адыгеир, шIу усэлъэгъу!» зыфиIорэр илъэситфырэ лэжьагъэ. Шъолъыр Iофтхьабзэм дунэе мэхьанэ иIэ хъугъэ ыкIи «Саусэрыкъо дышъ» тIуи кинофестивалым ыцIэ зэблэтхъугъ. Дунэе мэхьанэ тиIэ зэхъум, къэралыгъо 22-мэ якинематографистхэм яфильмхэр къытфагъэхьыгъ. Урысыем щыпсэурэ лъэпкъхэм языкIыныгъэ, лъэпкъ зэфыщытыкIэхэр ыкIи ныбджэгъуныгъэр гъэпытэгъэнхэм, яхэгъэгу шIу алъэгъоу лIэужыкIэхэр пIугъэнхэм, къэралыгъо ыкIи IэкIыб кином хэхъоныгъэ ашIыным кинофестивалыр афэIорышIэ, — къыIуагъ Нэгъэплъэ Аскэрбый.Зэнэкъокъум хэлажьэхэрэм лъэныкъуищкIэ заушэтыщт: анимационнэ, документальнэ джэгукIэ шIыкIэр ыкIи нейросетим иамалкIэ гъэуцугъэ кинор.— Мыгъэ анахь тызыгъэгушIорэмэ ащыщ АдыгеимкIэ IофшIэни 10 зэнэкъокъум илъэныкъуищ зэрахэлажьэхэрэр. Республикэм кинор ашIогъэшIэгъон зэрэхъугъэм ар ишыхьат. Режиссермэ ясэнаущыгъэ къыхэгъэщыгъэныр, яIоф фэгъэчэфыгъэнхэр, джащ фэдэу ныбжьыкIэмэ гъэхъагъэхэр ашIынхэмкIэ IэпыIэгъу афэхъугъэныр ары тимурадыр. Адыгеим кином хэхъоныгъэ щегъэшIыгъэным, зегъэушъомбгъугъэным, ныбжьыкIэхэр киноиндустрием хэщэгъэнхэм кинофестивалыр афэлажьэ. 2021-рэ илъэсым апэрэу зэхэтщэгъэгъэ шъолъыр Iофтхьабзэм игъунапкъэхэм заушъомбгъугъ, ащ мыгъэ дунэе мэхьанэ иIэ зэрэхъугъэм тырэгушхо, — къыIуагъ Нэгъэплъэ Аскэрбый.ЗэхэщакIом къызэриIуагъэмкIэ, осэшI купым IофшIэгъэ анахь дэгъухэр къыхигъэщыщтых, 2026-рэ илъэсым шышъхьэIум и 15-м кинофестивалыр зэфашIыжьыщт.ЛъэпшъыкъоФатим.