ЗэIухыгъэ къэбарлъыгъэIэс амалхэр
Народнэ творчествэмкIэ Урысые Федерацием изаслуженнэ купэу «Уджыр» къалэу Пензэ щыкIорэ я II-рэ Дунэе фестивалэу «Абашевские узоры» зыфиIорэм хэлэжьагъ.
Лъэпкъ Iэмэ-псымэхэм илъэс 30-м ехъугъэу къязыгъэIорэ купым адыгэ культурэм идэхагъэ ащ къыщигъэлъэгъуагъ. Пензенскэ хэкум игубернаторэу Олег Мельниченкэм игукъэкIыкIэ зэхащэгъэ шъолъыр проектэу «Гордость» зыфиIорэм ар къыдыхэлъытагъ. Урысыем щыпсэурэ лъэпкъхэм языкIыныгъэ и Илъэс мэфэкI лъапсэ зэхахьэм фэхъугъ.Фестивалым икъызэIухын хэлэжьэгъэ Олег Мельниченкэм къыIуагъ дунаим тет лъэпкъхэм якультурэ, яфольклор хабзэхэр зэрэзэфэшъхьафхэр къэгъэлъэгъогъэныр Iофтхьабзэм зэрипшъэрылъыр. Ащ цIыфхэр нахь зэгурегъаIох, лъэпкъхэр нахь зэпэблагъэ ешIых, язэфыщытыкIэхэр егъэпытэх.Фестивалыр мэхьанэшхо зиIэ хъугъэ-шIагъэ хъугъэ. Хэгъэгум икъэлэ зэфэшъхьафхэм ащылэжьэрэ творческэ куп 15-м ехъу ащ зэрипхыгъ. Лъэпкъ зэфэшъхьафхэм якультурэ сценэшхом къыщагъэлъэгъуагъ.Адыгэ Республикэм икультурэ къэзыгъэдэхэрэ творческэ купыр зыми фэдэп. Артистхэм ижъырэ лъэпкъ орэдхэр къаухъумэх, шыкIэпщынэм, къамылым, пщынэм мэкъамэхэр къарагъаIо. Лъэпкъыбэ зыщыпсэурэ Урысыеми, IэкIыб хэгъэгухэми «Уджыр» шIукIэ ащызэлъашIэ.Фестивалыр зэрэкIуагъэр къытфиIотагъ Тэхъутэмыкъое район администрацием культурэмкIэ и ГъэIорышIапIэ ипащэу Хьатит Нурдин.— Урысыем щыпсэурэ лъэпкъхэм языкIыныгъэ и Илъэс тикъэралыгъо зыщыхагъэунэфыкIырэм тикуп фэдэ Iофтхьабзэм зэрэхэлажьэрэм имэхьанэ нахь къеIэты. Лъэшэу тырэгушхо ансамблэу «Уджым» чIыпIэ зэфэшъхьафхэм тиреспубликэ зэрифэшъуашэу къызэращигъэлъагъорэм. Культурэм хэхъоныгъэ ышIынымкIэ мыщ фэдэ фестивальхэм язэхэщэн мэхьанэшхо иI. Хэти исэнаущыгъэ къыгъэлъэгъон амал зэриIэм дакIоу узлъымыIэсыгъэхэми гу алъыптэн олъэкIы, — къыIуагъ Хьатит Нурдин.«Уджым» ирепертуар ыпэкIэ хэтыгъэ мэкъамэхэм, къашъохэм, орэдхэм анэмыкIэу къэгъэлъэгъоным ехъулIэу кIэхэри агъэхьазырыгъэх. Адыгэ орэд мэкъамэхэмкIэ лъэпкъым икультурэ къагъэлъэгъуагъ. Къэзэрэугъоигъэ пстэуми Iофтхьабзэр агу рихьыгъ.— Лъэпкъыбэ хъурэ Урысыем икультурэ изы Iахь «Уджым» къызэригъэлъэгъуагъэр лъэшэу тигуапэ. КъыткIэхъухьэрэ лIэужхэм тикультурэ, тихабзэ ыкIи тарихъыр ашIэным зэкIэми тыфэлэжьэн фае, — къыIуагъ творческэ купэу «Уджым» ипащэу, АР-м изаслуженнэ артистэу Къэлэкъутэкъо Инвер.Фестивалыр мэфэкI шъыпкъэ хъугъэ. Зэхахьэр тиартистхэми шIукIэ агу къинэжьыщт.Лъэпшъыкъо Фатим.