АМ
Гъэмафэр ыкIэм фэкIуагъ, гъэсэныгъэ учреждениехэм яIофшIэн шIэхэу аублэжьыщт. Гурыт еджапIэхэм зэхъокIыныгъэу афэхъущтхэм ащыщ предмет гъэнэфагъэхэмкIэ тхылъхэр зэрэзэблахъущтхэр.
Тхылъхэм яфедеральнэ Перечень Урысыем просвещениемкIэ и Министерствэ бэмышIэу ыгъэнэфагъ. «История нашего края. Донбасс и Новороссия» зыфиIорэмкIэ я 5-рэ ыкIи я 6 — 7-рэ классхэр еджэщтых.«Урысые гъэзетым» къызэритырэмкIэ, мы тхылъхэм яшIуагъэкIэ кIэлэеджакIохэм Донецкэ ыкIи Луганскэ народнэ республикэхэм ятарихъ зэрагъэшIэн алъэкIыщт. Джащ фэдэу Запорожскэ ыкIи Херсонскэ шъолъырхэм афэгъэхьыгъэ зыкI тарихъыр адэтыщт. Гъэсэныгъэ учреждениехэм ахэр Iоныгъом и 1-м нэс аIакIагъэхьанхэу агъэнафэ.Ащ нэмыкIэу федеральнэ спискэм хэхьагъэх Краснодар краим, Адыгэ, Бурятие, Марий Эл, Ингушетие, Чуваш, Мордовие республикэхэм, Сахалинскэ хэкум ыкIи Урысыем инэмыкI шъолъырхэм афэгъэхьыгъэ къэбархэр. Ахэр я 5 — 7-рэ классхэр зэреджэщт тхылъхэм къадэхьагъэх.УблэпIэ классхэр зэреджэщтхэм ахагъэхьагъэх урысыбзэмкIэ, литературэмкIэ, ныдэлъфыбзэмкIэ, ныдэлъфыбзэ литературэмкIэ (адыгабзэмкIэ, башкирыбзэмкIэ, хакассыбзэмкIэ, мокшаныбзэмкIэ, осетиныбзэмкIэ, къэндзалыбзэмкIэ, удмуртыбзэмкIэ ыкIи нэмыкIхэмкIэ), IэкIыб къэралыгъуабзэхэмкIэ, хьисапымкIэ, тыкъэзыуцухьэрэ дунаимкIэ тхылъхэр. Джащ фэдэу дин культурэм ыкIи этикэм япхыгъэ нэмыкI дисциплинэхэри хэхьэх.НахьыжъхэмкIэ спискэм хэтхэр урысыбзэмкIэ, литературэмкIэ, IэкIыб къэралыгъуабзэхэмкIэ, хьисапымкIэ, информатикэмкIэ, географиемкIэ, физикэмкIэ, химиемкIэ ыкIи биологиемкIэ тхылъхэр ары. Гурыт гъэсэныгъэмкIэ урысыбзэмкIэ, литературэмкIэ, IэкIыб къэралыгъуабзэхэмкIэ, алгебрэмкIэ, геометриемкIэ, информатикэмкIэ, физикэмкIэ, химиемкIэ ыкIи нэмыкI предметхэр хэхьагъэх.Хэгъэгум гъэсэныгъэ зыкI илъыным тхылъхэм язэблэхъун зэрэфэIорышIэщтыр Урысыем просвещениемкIэ иминистрэ къызэриIорэр «Урысые гъэзетым» къеты.Тишъолъыр зэхъокIыныгъэхэм афэхьазыр. АР-м гъэсэныгъэмрэ шIэныгъэмрэкIэ и Министерствэ къызэрэтиIуагъэмкIэ, 2026-рэ илъэсым иIоныгъо мазэ къыщегъэжьагъэу обществознаниемкIэ зыкI къэралыгъо тхылъхэмкIэ я 9 — 10-рэ классхэр еджэнхэу аублэщт. Я 11-рэ классхэри къэкIорэ илъэсым Iоныгъом и 1-м къыщегъэжьагъэу техьанхэу щытых.Я 9-рэ классым пае обществознание тхылъ 6778-рэ, я 10-рэ классхэм апае тхылъ 3292-рэ, къащагъ. Тхылъхэр еджапIэхэм афагощых.2027-рэ илъэсым щылэ мазэм къыщегъэжьагъэу я 5-рэ классым щеджэхэрэм апае предметэу «Духовно-нравственная культура России» зыфиIорэр къыхэхьащт. КъэкIорэ илъэсхэм я 6 — 7-рэ классхэми яIэ хъущт. Я 5-рэ классхэм апае егъэджэн предметым епхыгъэ тхылъхэр пIалъэр къэмысызэ зэрагъэгъотыщтых. ЗэрагъэнафэрэмкIэ, тхылъ 6850-рэ къащэфыщт.