Ветеранхэм япсауныгъэ лъэплъэх

Къэралыгъо фондэу «Хэгъэгум иухъумакIохэр» зыфиIо­рэр икIэщакIоу Урысыем псауныгъэр къэухъумэгъэнымкIэ и Министерствэ игъусэу хэушъхьафыкIыгъэ дзэ опера­цием иветеранхэм ядиспансеризацие зэхащэ.

Мыщ тетэу ветеранхэм япсауныгъэ уплъэкIугъэным мэхьанэшхо иI ахэм медицинэ IэпыIэгъоу ящыкIагъэр игъом ыкIи ифэшъуашэм тетэу ягъэгъотыгъэным фэшI.Мыщ фэдэ уплъэкIунхэм зы маф апэIухьэрэр, ахэр пэрыт медицинэ организациехэм ащарагъэкIух. Муниципальнэ образованиехэм ащыпсэурэ ветеранхэр медицинэ учреждениеу зыщауплъэкIущтхэм ащэх ыкIи къащэжьых.«Фондым иIофшIэн зыщыригъэжьагъэм къыщыублагъэу медицинэ IэпыIэгъу ахэм ягъэгъотыгъэныр, психологическэу адеIэгъэныр, япсауныгъэ зэтегъэуцожьыгъэныр типшъэрылъ шъхьаIэх. Хэу­шъхьафыкIыгъэ дзэ операцием иветеранхэу хэгъэгум ичIыпIэ пстэуми ащы­псэухэрэм технологие пэрытхэм ади­штэрэ медицинэ IэпыIэгъу ягъэгъоты­гъэнымкIэ тфэлъэкIырэр зэкIэ тэшIэ» — къыхигъэщыгъ УФ-м зыкъэухъумэнымкIэ иминистрэ игуадзэу, Къэралыгъо фондэу «Хэгъэгум иухъума­кIохэр» зыфиIорэм ипащэу Анна Цивилевам.2025-рэ илъэсым фондым зыфэзы­гъэзэгъэ ветеран мини 106-мэ диспансеризациер арагъэкIугъ. Ахэм язэфэхьысыжьхэм къызэрагъэлъэгъуагъэмкIэ, мин 84-мэ уз зэфэшъхьафхэр къахагъэщыгъ, мин 20-мэ – апэрэу. Ветеран 55430-мэ япсауныгъэ ренэу лъыплъэгъэн фаеу агъэнэфагъ. Диспансеризацием ыуж нэбгырэ мин 23-р япсауныгъэ зыпкъ рагъэуцожьынэу медицинэ учреждениехэм агъэкIуагъэх, ветеран мини 8-м ехъум зыгъэпсэфыпIэ зэфэшъхьафхэм япсауныгъэ ащагъэпытэщт. ХэушъхьафыкIыгъэ медицинэ IэпыIэгъу, технологие пэрытхэм адиштэхэрэри хэтхэу, нэбгырэ 1811-мэ арагъэгъотынэу агъэ­нэфагъ.Адыгэ Республикэм щыщ Олег Титовыр СВО-м иветеранэу диспансеризациер зыкIугъэхэм ащыщ. Ащ мы Iоф­тхьабзэр Iэрыфэгъоу ыкIи ветеранхэмкIэ мэхьанэшхо иIэу зэрэщытыр къыхигъэщыгъ.«Фондэу «Хэгъэгум иухъумакIохэр» зыфиIорэм ыкIи социальнэ лъыплъакIоу сиIэм яшIуагъэкIэ диспансеризациер сэкIу. Узыр хэмыужъыныхьэу къыхэ­гъэщыгъэным ыкIи игъом ащ еIэзэгъэным иамалышIоу ар щыт. ХэушъхьафыкIыгъэ дзэ операцием иветеранхэмкIэ ащ мэхьанэ иIэу сэлъытэ, — еIо О. Титовым.2025-рэ илъэсым хэушъхьафыкIыгъэ дзэ операцием иветеран 390-мэ диспансеризациер акIугъ. Тызхэт илъэсым пыкIыгъэ уахътэм — нэбгырэ 300-м ехъу.«ХэушъхьафыкIыгъэ дзэ операцием иветеранхэм япсауныгъэ зыпкъ игъэуцожьыгъэныр, къэухъумэгъэныр тиIоф­шIэнкIэ пшъэрылъ шъхьаIэу щыт. Диспансеризацием къыщегъэжьагъэу, ветераным ипсауныгъэ изытет елъытыгъэу, медицинэм ылъэныкъокIэ ищыкIагъэр етэгъэгъоты: Iэзэныр, псауныгъэр ­зыпкъ игъэуцожьыгъэныр, зыгъэпсэ­фыпIэ-IэзапIэм гъэкIогъэныр, психологическэ IэпыIэгъур. Игъом ахэм япсауныгъэ изытет уплъэкIугъэным амал къеты ащ зэхъокIыныгъэу фэхъухэрэр къыхэгъэщыгъэнхэу ыкIи ищыкIэгъэ Iэзэн Iоф­тхьабзэхэр зехьэгъэнхэу», — къыкIегъэтхъы фондэу «Хэгъэгум иухъумакIохэр» зыфиIорэм Адыгэ РеспубликэмкIэ икъутамэ ипащэ медицинэ IофхэмкIэ игуадзэу Руслан Мамаевым.Диспансеризацием ыуж ветераным Iэзэн Iофтхьабзэхэр ищыкIагъэу агъэу­нэфыгъэмэ, ахэр зыщагъэцэкIэщтхэ медицинэ организациеу шъолъырым 8 щагъэнэфагъэр. Джащ фэдэу ахэм ветеранхэр зыщаштэщтхэ мафэхэри аухэ­сыгъэх.Технологие пэрытхэр къызфагъэфе­дэзэ медицинэ уплъэкIунхэр арагъэкIунхэ фаеу зыхъурэм, ветеранхэр Адыгэ рес­публикэ клиническэ сымэджэщым ­агъакIох.Къэралыгъо фондэу «Хэгъэгум иухъу­макIохэр» зыфиIорэр УФ-м и Президентэу В. Путиным и УказкIэ зэхащагъ. Пшъэрылъ шъхьаIэу ащ иIэр хэушъхьафыкIыгъэ дзэ операцием иветеранхэм ыкIи ахэм яунагъохэм алъыплъэгъэныр, IэпыIэгъу афэхъугъэныр ары. Фондым испециалистхэр ыкIи исоциальнэ лъыплъакIор медицинэ ыкIи социальнэ лъэныкъохэм язакъоп хэгъэгум иухъумакIохэм IэпыIэгъу зэрафэхъухэрэр, ахэр сэнэхьат зэфэшъхьафхэм афырагъаджэх, IофшIапIэ къафагъоты, юридическэ IэпыIэгъу арагъэгъоты, сэкъатныгъэ зиIэхэм яунэхэм къащакIухьан алъэкIыным фытырагъэпсыхьэх, яфэIо-фашIэхэр афагъэцакIэх. Фондым икъута­мэхэр Урысыем ишъолъырхэм зэкIэми ащэлажьэх.