Кощхьэблэ район администрациер
Автомобиль, лъэсрыкIо гъогухэм ягъэкIэжьын ыкIи яшIын фытегъэпсыхьэгъэ IофшIэнхэр республикэм ичIыпIэ зэфэшъхьафхэм ащэкIох.
Шэуджэн районым ипсэупIэу Заревэр ахэм ащыщ.Поселкэм дэсхэр мы Iофхэм бэрэ яжагъ. «Красногвардейскэ — Улап — Заревэр» зыфиIорэ гъогум изы Iахьхэм ащыщ лъэс-рыкIо гъогу щашIы. Ащ икIыхьагъэ километрэрэ метрэ 700-м ехъу. Илъэс пчъагъэ хъугъэ мыщ фэдэ лъэсрыкIуапIэ зыщымыIагъэр. Ау мы чIыпIэмар ищыкIэгъагъ. Анахьэу цIыфхэм ящынэгъончъагъэ ар епхыгъ.АР-м и ЛIышъхьэу КъумпIыл Мурат яIэпыIэгъоу, район ыкIи ежь псэупIэм яадминистрациехэм япащэхэм IофшIэнхэм апэIухьащт мылъкур къагъотыгъ. Шъолъыр бюджетым къыхэхыгъэ сомэ миллион 14-рэ мин 800-рэ ащ ишIын пэIуагъэхьагъ.Iофхэм ягъэцэкIэн зипшъэрылъ хъызмэтшIапIэу «Адыгеяавтодорыр» Заревэм екIолIэрэ гъогоу километри 2,29-м ишIын дэлажьэ. Ащ лъэсрыкIо гъогум имызакъоу, автомобиль гъогури хахьэ. IофшIэнхэм сомэ миллион 20-рэ мин 654-рэ атефэщт.Кощхьэблэ районым игъогухэри агъэкIэжьых. ИгъэкIотыгъэ IофшIэнхэр щэкIох «Мыекъуапэ — Джаджэ — Псыбай — Зеленчукскэр — Карачаевскэр» зыфиIорэм игъогу Iахь. Мыщ киллометри 2,83-рэ щагъэкIэжьыщт. IофшIэныр Iахьищэу агощыгъ. Апэрэм къыдыхэлъытагъэр агъэцэкIэгъах. ЯтIонэрэ Iахьым щыщэу асфальт-бетон зэхэлъыр тыральхьэгъах, гъогу гъунэхэр агъэтэрэзыжьых. Къэнэгъэ IофшIэнхэм ягъэцэкIэн ыуж ихьащтых.Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу гъогухэм ягъэкIэжьын епхыгъэ IофшIэнхэр зэшIуахых.Цэй Замир.