Iэшъынэ А.
«Унагъор ыкIи гъэсэныгъэр: егъэджэным идэгъугъ ыкIи Адыгэ Республикэм инеущрэ гъэсэныгъ» зыфиIорэ ны-тыхэм яреспубликэ зэIукIэ Мыекъопэ лицееу N 32-м щызэхащагъ.
АР-м иминистрэхэм я Кабинет хэтхэр, АР-м и Къэралыгъо Совет — Хасэм идепутатхэр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, ащ игуадзэхэр, Урысые обществэу «ШIэныгъэм» илекторэу Мария Паатовар, АР-м хэгъэгу кIоцI IофхэмкIэ и Министерствэ ипащэ игуадзэу Андрей Федосеевыр, муниципальнэ образовании 9-мэ ащызэхащэгъэ ны-ты комитетхэм ахэтхэр Iофтхьабзэм хэлэжьагъэх.
АР-м гъэсэныгъэмрэ шIэныгъэмрэкIэ и Министерствэрэ республикэ ны-ты комитетымрэ ащ кIэщакIо фэхъугъэх. Мыщ фэдэ Iофтхьэбзэ ин апэрэу зэхащагъ. Зигъо Iофыгъохэм атегущыIэнхэр, зыкI гъэсэныгъэм ыкIи пIуныгъэм фэкIонхэр, кIэлэегъаджэхэмрэ ны-тыхэмрэ язэпхыныгъэ нахь гъэпытэгъэныр пшъэрылъ шъхьаIэу щытыгъэх.— Къэралыгъо программэхэм, лъэпкъ проектхэу «Единэ Россием» ыгъэнэфагъэхэм яшIуагъэкIэ гъэсэныгъэм епхыгъэ учреждениехэр нахь зэтегъэпсыхьагъэ мэхъух. 2018-рэ илъэсым къыщегъэжьагъэу гурыт еджэпIэ 12 кIэу ашIыгъ, ахэм кIэлэцIыкIу мини 8,5-м ехъу ачIэфэ, сомэ миллиарди 8-м ехъу атефагъ. Джащ фэдэу республикэм икъалэхэм ыкIи ирайонхэм кIэлэцIыкIу IыгъыпIэ 18 кIэу адашIыхьагъ. ДжырэкIэ 3 кIэу ашIы, ахэм кIэлэцIыкIу 480-рэ зырыз ачIэфэщт. Гурыт еджэпIэ 28-рэ ыкIи кIэлэцIыкIу IыгъыпIи 2-рэ агъэкIэжьыгъ, ахэр аужырэ шапхъэхэм адиштэ хъугъэх, — къыIуагъ министрэм.«Единэ Россием» ипроектхэр гурыт гъэсэныгъэ зыщарагъэгъотырэ еджапIэхэми анэсыгъ. КъэIогъэн фае, мы илъэсыкIэ еджэгъум къыщегъэжьагъэу Мыекъопэ индустриальнэ техникумым цIыф зэрымыс быбырэ пкъыгъохэм япхыгъэу Iоф зышIэн зылъэкIыщт специалистхэр щырагъэджэнхэу аублэщт.КIэлэеджакIохэм гъэсэныгъэ дэгъу ягъэгъотыгъэным ны-тыхэм яIахьышIу зэрэхэлъыр министрэм къыIуагъ, къэблэгъэрэ илъэсыкIэ еджэгъумкIэ къекIолIагъэхэм къафэгушIуагъ.АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель пшъэрылъэу щыIэхэм нэужым къатегущыIагъ, анахьэу кIэлэцIыкIу IыгъыпIэхэм къащыуцугъ.— КIэлэцIыкIу IыгъыпIэр ары хэти игъэсэныгъэ къызщежьэрэр. Мыщ лъэныкъуакIэхэр ренэу къыхэхьэх. Ныдэлъфыбзэм изэгъэшIэн епхыгъэ проектыр мы аужырэ илъэсхэм республикэм щызэшIуахы, ащ хэлажьэхэрэм япчъагъэ бэкIэ нахьыбэ хъугъэ. ГущыIэм пае, кIэлэцIыкIу IыгъыпIэ 12-мэ игъэкIотыгъэу адыгабзэкIэ Iоф ашIэщтыгъэмэ, джы ар 42-м нэсыгъ, куп 17 хъущтыгъэхэмэ, 182-м нэсыгъ. КIэлэцIыкIу 3715-мэ адыгабзэр игъэкIотыгъэу ащарагъашIэ, джащ фэдэу музей цIыкIухэр жъугъэу къащызэIуахых, — къыIуагъ Артем Журавель.ЯпсауныгъэкIэ ялэгъухэм акIэмыхьэрэ кIэлэцIыкIухэм Iоф адэзышIэрэ кIэлэцIыкIу IыгъыпIэхэм алъэныкъокIэ пшъэрылъэу щытхэм ащ ягугъу къышIыгъ. ИлъэсыкIэ еджэгъум гурыт еджапIэхэм яIофшIэн зэхъокIыныгъэу фэхъущтхэм къатегущыIагъ.Гурыт гъэсэныгъэм епхыгъэу къэгущыIагъ АР-м гъэсэныгъэмрэ шIэныгъэмрэкIэ иминистрэ игуадзэу Пэрэныкъо Сусаннэ.ЗэIукIэм нэмыкI зигъо Iофыгъохэми щатегущыIагъэх. Республикэ ны-ты комитетым ипащэу Наталья Щербинам къызэриIуагъэмкIэ, яорганизацие 2023-рэ илъэсым къыщегъэжьагъэу Iоф ешIэ. ЫпэкIэ гурыт еджапIэм щеджэхэрэр арымэ мыщ хэтыгъэхэр, джы ащ нахь зырагъэушъомбгъугъ, кIэлэцIыкIу IыгъыпIэхэм ыкIи гурыт сэнэхьат зыщызэрагъэгъотырэ еджапIэхэм ачIэсхэм янэ-ятэхэри хагъэхьагъэх. Ахэм япшъэрылъхэр чанэу агъэцакIэх. Ащыщхэр федеральнэ проект зэфэшъхьафхэм, зэнэкъокъухэм ахэлажьэх, текIоныгъэхэр къыдахых.