Къуаджэу Пщыжъхьаблэ дэт гурыт еджапIэу N 11-м илъэсыкIэ еджэгъум ехъулIэу зэхъокIыныгъэхэр фэхъущтых. Мыщ классэу хэтхэр зэримыкъущтыгъэм къыхэкIэу, Шэуджэн районымкIэ мы зы еджапIэр ары сменитIоу ыкIи шэмбэт мафэм зыщеджагъэхэр.
— ЩыIагъэх лъэхъанхэр кIэлэеджэкIо 300 — 400-м ехъу щеджэу, ау джы нэбгыри 100-ми нэсырэп. Классхэр иных, ахэм нэбгырэ заул ныIэп ачIэсыгъэр. ЗэкIэмкIи тиеджапIэ класси 7 хэтыгъэр, джы классиплIэу зэпытыутыгъэх, зэкIэми чIыпIэ шъхьаф яIэщт, — еIо гурыт еджапIэм ипащэу КIэрэщэ Нурбый.Мы гухэлъыр илъэс зытIущ хъугъэу зэряIагъэр тигущыIэгъу къеIо. ЗэхъокIыныгъэхэр санитар шапхъэхэми адештэ, ау ахъщэ бэу зэрэтефэщтым пае IофшIэныр аублэн алъэкIыщтыгъэп.— Шэуджэн районым иадминистрацие ипащэу Аулъэ Рэщыдэрэ народнэ депутатхэм я Совет итхьаматэу Мэрэтыкъо Аслъанрэ лъэшэу тафэраз, ахэм яшIуагъэкIэ чIыпIэ бюджетым къыхэхыгъэ сомэ мин 450-рэ къытфатIупщыгъ. Ащ нэмыкIэу АР-м и Къэралыгъо Совет — Хасэм идепутатэу Къэгъэзэжь Мурат иIэпыIэгъу къытигъэкIыгъ. Къыхэзгъэщы сшIоигъу къуаджэм щыщ кIалэу амал зиIэхэм ренэу яшIуагъэ къызэрэтагъэкIырэр. Хьаткъо Рэмэзан пчъэхэр къытфищагъэх, Датхъужъ Азэмат IофшIэн зэфэшъхьафхэм апэIухьащт ахъщэр къытитыгъ. Чэтэжъыхьэ Абрек пчъэхэм яхэгъэуцонкIэ ишIуагъэ къытигъэкIыгъ. Ны-тыхэр IэпыIэгъу къытфэхъух, кIэлэегъаджэхэми афэшIэщтыр ашIэ. КIалэу Iоф зышIагъэхэм ащыщых тикъоджэгъухэу Быщтэкъо Мэдин, Устэ Рустам, Гафурэ Алик, Мэфэ Альберт, ахэм анэмыкIхэри, — къыIуагъ еджапIэм ипащэ.Классхэр ины зэхъухэм шъхьангъупчъитIу ахэтыгъ, джы зызэпаутыхэм, зырыз хъугъэх, ау зы бгъур къызэрэIумыкIырэм гумэкIыгъохэр къыздихьыгъэх, ащ къыхэкIэу ащыщхэр зэблахъугъэх, къыIукIыхэу ашIыжьыгъэх.
Iоныгъом и 1-м Пщыжъхьэблэ гурыт еджапIэм щеджэхэрэр гъэкIэжьыгъэ еджапIэм къекIолIэжьыщтых. Шъхьадж класс иIэу, ар зэIухыгъэу щытыщт, анахь шъхьаIэр зы сменэу еджэщтых.Непэрэ мафэм мыщ кIэлэеджэкIо 60 фэдиз щеджэ. Апэрэ классым нэбгырищ къэкIонэу агъэнафэ, ау пчъагъэм хэхъонкIи мэхъу. ЕджапIэр мыинми, къэгъэлъэгъон дэгъухэр иIэх, щеджэхэрэр муниципальнэ ыкIи республикэ олимпиадэхэм, Iофтхьэбзэ зэфэшъхьафхэм ахэлажьэх. НыбжьыкIэхэм шIэныгъэ куухэр агъотыным фэшI ищыкIагъэр зэкIэ яI, «Точка роста» зыфиIорэм ишIуагъэкIэ кIэлэеджакIохэм ясэнаущыгъэ хэхъо. Предмет пэпчъкIэ ящыкIэгъэ Iэмэ-псымэхэр яIэх, бэмышIэу физикэ ыкIи химие урокхэм ащагъэфедэщт пкъыгъохэр, джащ фэдэу музыкэм пае Iэмэ-псымэхэр къафащагъэх.ЕджапIэм ипащи, кIэлэегъаджэу Iоф зышIэхэрэми зы пшъэрылъ шъхьаI яIэр — рагъаджэхэрэм шIэныгъэ куу арагъэгъотыныр ары, ар дэгъоу ахэм къадэхъу.ДЕЛЭКЪО Анет.