Зымылъэгъухэрэм яспорт къыдыхэлъытэгъэ я III-рэ Урысые гъэмэфэ Спартакиадэм икIэух едзыгъо голболымкIэ Адыгеим ихъулъфыгъэ командэ апэрэ чIыпIэр къыщыдихыгъ. Iофтхьабзэр къалэу Екатеринбург щыкIуагъ.
Урысыем ишъолъыр 18-мэ къарыкIыгъэ командэхэм мыщ зыщаушэтыгъ. Финалым щызэIукIагъэх Адыгэ Республикэмрэ Краснодар краимрэ. Апэрэ таймым ыгузэгу краим илIыкIохэр 4:3-у ыпэ итыгъэх. Ау апэрэ едзыгъом икIэухым 9:5-у республикэм испортсменхэр ыпэ ишъыгъэх. ЕшIэгъур 14:9-у аухыгъ, Адыгеим икомандэ текIоныгъэр къыдихыгъ.
Бзылъфыгъэ командэхэм язэнэкъокъу икIэух едзыгъо Вологодскэ хэкур 6:4-у Тульскэ хэкум текIуагъ. Адыгеим илIыкIохэм ятфэнэрэ чIыпIэр къафагъэшъошагъ.ЗэхэщакIохэм турнирым иешIэкIо анахь дэгъухэр къыхагъэщыгъэх. ХъулъфыгъэхэмкIэ мы шIухьафтыныр зыфагъэшъошагъэр Адыгеим щыщ Роман Катасоновыр ары. Бзылъфыгъэхэм къахагъэщыгъэр Вологодскэ хэкур къэзыгъэлъэгъогъэ Виктория Рогоза.