Шэпхъэ зыкIхэр агъэфедэхэзэ

Адыгеим и ЛIышъхьэу КъумпIыл Мурат Урысые Федерацием юстициемкIэ ими­нистрэ игуадзэу Максим Бесхмельницыным АР-м и Правительствэ зычIэт унэм щыIукIагъ.ЗэIукIэм хэлэжьагъэх АР-м и ЛIышъхьэрэ иминистрэхэм я Кабинетрэ я Адми­нистрацие ипащэу Владимир Свеженец, УФ-м юстициемкIэ и Министерствэ юри­дическэ IэпыIэгъумкIэ ыкIи правовой фэIо-фашIэхэмкIэ и Департамент иIэ­шъхьэтетэу Роман Рябэр, Урысыем юстициемкIэ и Министерствэ Адыгэ РеспубликэмкIэ и ГъэIорышIапIэ ипащэу Сергей Морозовыр.

Iофтхьабзэм хэлэжьагъэхэр шэпхъэ правовой актхэр зэраштэхэрэм, Урысые Федерацием ишъолъырхэми, муниципальнэ образованиехэми правэм ылъэ­ныкъокIэ шэпхъэ зыкIхэр щыгъэфедэ­гъэнхэм, адвокатурэм, нотариатым, мы­сатыу организациехэм яIофшIэн зэрэзэхащэрэм, унэгъо кIоцIымкIэ актхэр зэратхыхэрэм япхыгъэ Iофыгъохэм атегущыIагъэх.ЗэIукIэм ипэублэ Адыгеим и ЛIы­шъхьэ Урысыем юстициемкIэ и Министерствэ зэдэлэжьэныгъэ пытэ зэрэдыряIэр къы­хигъэщыгъ. Къулыкъу комиссиехэр Iэу­бытыпIэ къызыфашIыхэзэ, нэмыкI къулы­къухэми зафагъазэзэ, Министерствэм къыфэгъэзэгъэ Iофыгъохэр зэрэзэхафыхэрэр мыщ къыщаIуагъ.«Правэм ылъэныкъокIэ шэпхъэ зыкI­хэр тыди ащыдгъэфедэныр зэдытипшъэ­рылъ. Республикэм ихэбзэ къулыкъу­хэмрэ чIыпIэ зыгъэIорышIэжьынымкIэ къулыкъухэмрэ кIэщакIо зыфэхъурэ шэп­хъэ правовой актхэр экспертизэ ашIых, Урысыем юстициемкIэ и Ми­нистерствэ, прокуратурэм, федеральнэ къулыкъу гъэнэфагъэхэм ахэмкIэ кIэух зэфэхьысыжьхэр къагъэхьазырых», — къыIуагъ АР-м и ЛIышъхьэ.

2026-рэ илъэсым иапэрэ кIэлъэныкъо Урысыем юстициемкIэ и Минис­терствэ АР-мкIэ и ГъэIорышIапIэ шэпхъэ правовой акт 558-мэ правовой экс­пертизэ афызэхищагъ. ЗэIукIэм зэрэщыхагъэунэфыкIыгъэмкIэ, анахьэу анаIэ зытыра­гъэтыгъэр социальнэу дэеу ухъумагъэ­хэм, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм ыпкIэ зыхэмылъ юридическэ IэпыIэгъу ягъэгъотыгъэныр ары. 2025-рэ илъэсым къэралыгъо, мыкъэралыгъо системэхэм гъогогъу мин 1,5-рэ ыпкIэ зыхэмылъ юридическэ IэпыIэгъу хэу­шъхьафыкIыгъэ дзэ операцием хэлажьэ­хэрэм ыкIи ахэм яуна­гъохэм арысхэм, 2026-рэ илъэсым иапэрэ кIэлъэныкъо гъогогъу 363-рэ ахэм арагъэгъотыгъ.ЫпшъэкIэ зигугъу къэтшIыгъэ ГъэIорышIапIэмрэ Адыгэ Республикэм ихэ­бзэ къулыкъухэмрэ мысатыу организациехэм ялIыкIо 296-мэ отчетхэм язэхэгъэуцон епхыгъэ шэпхъакIэхэм атехьэгъэнхэмкIэ IэпыIэгъу афэхъугъэх.ЗэIукIэм икIэух КъумпIыл Мурат рес­публикэм ынаIэ къызэрэтетырэм фэшI Максим Бесхмельницыным зэрэфэразэр, тапэкIи язэдэлэжьэныгъэ лъагъэкIотэным зэрэщыгугъырэр къыIуагъ. УФ-м юстициемкIэ иминистрэ игуадзэ Урысыем юстициемкIэ и Министерствэ АР-мкIэ и ГъэIорышIапIэрэ республикэм ихэбзэ къулыкъухэмрэ Iофэу ашIагъэм осэшхо къыфишIыгъ.