А. Гусев
Мы тхьамафэм Мыекъуапэ Урысыем и Къыблэ итеатральнэ щыIакIэ икъэлэ шъхьаIэ къэзышIыгъэ Апэрэ шъолъыр театральнэ фестивалэу «ЛъэгапI» зыфиIорэр Адыгеим щэкIо.
Блыпэ пчыхьэм къэлэ Гупчэу Лениным ыцIэ зыхьырэм цIыфыбэ къыщызэрэугъоигъагъ. Урысыем инароднэ артистэу, Лъэпкъхэм я Театрэ ихудожественнэ пащэу, проектым икIэщакIоу Евгений Мироновымрэ Москва икъэралыгъо академическэ камернэ хорэу, «Хор Минина» зэреджэхэрэр, дирижер шъхьаIэу Тимофей Гольберг зипащэмрэ зыхэлэжьэгъэхэ спектакль-концертэу «Горькэм ирассказхэр» зыфиIорэм еплъынхэу ахэр къекIолIэгъагъэх.Спектаклым лъапсэ фэхъугъэх Максим Горькэм ирассказхэу «Макар Чудра» ыкIи «Старуха Изергиль». Е. Мироновым иIэпэIэсэныгъэрэ Мининым ихор къыригъэIорэ мэкъамэхэмрэ зызэхахъохэм, цIыфэу еплъыхэрэр ямышIыкIэ дунай хащэгъагъэх, Горькэм ипрозэ нэмыкIэу къафызэIуихыгъ. Артистхэм зэрафэразэхэм ишыхьатэу, спектаклэ ужым бэрэ Iэгу афытеуагъэх.Адыгеим и ЛIышъхьэу КъумпIыл Мурат Iофтхьабзэм къэкIогъагъ, рэзэныгъэ гущыIэхэмкIэ ащ хэлэжьагъэхэм закъыфигъэзагъ. Нэужым культурэм ыкIи искусствэм иIахьышхоу ахилъхьэрэм фэшI АР-м и ЛIышъхьэ и Щытхъу тхылъ Евгений Мироновым фагъэшъошагъэу ритыгъ. Шъолъырым ипащэ республикэм ипредпринимательхэми мэхьанэшхо зиIэ проектым ипхырыщын яIахь мымакIэу къызэрэхалъхьагъэм фэшI «тхьашъуегъэпсэу» къариIуагъ.Адыгеим и ЛIышъхьэ къызэрэхигъэщыгъэмкIэ, «ЛъэгапIэу» хэгъэгум икъэлэ зэфэшъхьафхэм ятеатральнэ купхэр къэзыугъоигъэхэр шъолъырым икультурнэ щыIакIэкIэ хъугъэ-шIэгъакI. Фестивалым ипрограммэ къэгъэлъэгъон гъэшIэгъонхэм Мыекъуапэ щыпсэухэрэмрэ ащ ихьакIэхэмрэ ахищэщтых, ащ дакIоу культурнэ проектышхохэр щыпхырыщыгъэнхэмкIэ Адыгеим амалэу иIэхэр къыгъэлъэгъощтых.«Ащ фэдиз театрэ республикэм къызэрэкIуагъэр искусствэр зикIасэхэмкIэ мэфэкIышху, фестивалым хэлэжьэрэ коллективхэри гъэхъэгъакIэхэм афигъэчэфыщтых. Евгений Виталий ыкъор, «ЛъэгапIэр» щебгъэжьэнэу Адыгеир къызэрэхэпхыгъэм фэшI тыпфэраз. Фестивалым гъэшIэ кIыхьэ иIэ хъунэу, актерхэм яIэпэIэсэныгъэ хэзыгъэхъощт, еплъыхэрэм агукIэ аштэщт гупшысэ гъэшIэгъонхэр пхырищынхэу сыфэлъаIо», — къыIуагъ КъумпIыл Мурат.Евгений Мироновыр блэкIыгъэ илъэсым Мыекъуапэ къэкIуагъэу фестивалыкIэ щызэхищэн мурад зэриIэм республикэм и ЛIышъхьэ къызэрэдыригъэштагъэм, IэпыIэгъу къызэрэфэхъугъэм афэшI «тхьауегъэпсэу» къыриIуагъ.Фестивалым шъолъыр театрэхэм яактерхэм яIэпэIэсэныгъэ къагъэлъэгъонэу, лъэгапIэу зынэсыгъэхэр нэмыкIхэм арагъэпшэнэу, яIофшIакIэкIэ зэдэгощэнхэу амал аритыщт. Ар непэрэ лъэхъаным иискусствэ, культурэ зэщымыщым, Урысыем итеатральнэ картэ Кавказым чIыпIэу щиубытырэм афэгъэхьыгъэ зэдэгущыIэгъу хъущт.«ЛъэгапIэм» мурад шъхьаIэу иIэр непэрэ театральнэ искусствэм Кавказ щыпсэухэрэр лъыIэсыхэу, мэхьанэ ратэу шIыгъэныр, Урысыем ишъолъыр зэфэшъхьафхэм япрофессиональнэ купхэм зэпхыныгъэу яIэр гъэпытэгъэныр ары», — къыхигъэщыгъ Евгений Мироновым.Шъугу къэдгъэкIыжьын, Апэрэ шъолъыр театральнэ фестивалэу «ЛъэгапIэр» спектаклэу «ЧIыгу Iэбжыб» зыфиIорэмкIэ Пушкиным и Унэ тхьаумафэу кIуагъэм къыщызэIуахыгъ. Нэужым, шышъхьэIум и 30-м нэс, Пушкиным и Унэрэ концерт залэу «Налмэсымрэ» ясценэхэм спектаклэхэр къащагъэлъэгъощтых. Къалэхэу Альметьевскэм, Березники, Заречнэм, Набережные Челны, Новокузнецкэ ыкIи Новокуйбышевскэ яартистхэм яIофшIагъэхэр къагъэлъэгъощтых.АР-м и ЛIышъхьэ ипресс-къулыкъукъытыгъэ къэбархэмкIэ ХЪУТ Нэфсэт.