Яфитыныгъэхэр къэухъумэгъэнхэр анахь шъхьаI

Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэм» хахьэу хэушъхьафыкIыгъэ дзэ операцием хэлажьэхэрэр къэралыгъо фондэу «Хэгъэгум иухъумакIохэр» зыфиIорэм икъутамэу Адыгэ Республикэм щыIэм рагъэблэгъагъэх.

ТапэкIэ муниципальнэ къулыкъушIэ хъущтхэм фондым иIофшIэн зыфэдэм зыщагъэгъозагъ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм фондыр IэпыIэгъу зэрафэ­хъурэр зэрагъэлъэгъугъ.Къэралыгъо фондым иIофшIэн «зы шъхьангъупчъэ» шIыкIэм тетэу зэхэ­щагъ, ветеран пэпчъ иIофыгъо пчъагъэ а зы чIыпIэм къыщыфызэшIуахы. Фондым ипшъэрылъхэр ыгъэцэкIэнхэм фыте­гъэпсыхьагъэу шъолъыр къулыкъухэм, чIыпIэ зыгъэIорышIэжьыпIэхэм ыкIи общественнэ организациехэм зэзэгъыныгъэхэр адишIыгъ. Пшъэрылъ шъхьаIэу яIэр мы уахътэм хэушъхьафыкIыгъэ дзэ операцием хэлажьэхэрэм яфитыныгъэ­хэр къэухъумэгъэнхэр ыкIи социальнэ IэпыIэгъу ягъэгъотыгъэныр ары.АпэрапшIэу къутамэр зычIэт унэр хьакIэхэм къарагъэплъыхьагъ, фондыр анахьэу зыфэгъэзэгъэ лъэныкъохэр къафаIотагъ, социальнэ, психологическэ, правовой ыкIи нэмыкI лъэныкъохэмкIэ ветеранхэм Iоф зарадашIэрэр нэры­лъэгъу афашIыгъ.Нэужым зэдэгущыIэгъу шIыкIэм тетэу зэIукIэр рекIокIыгъ. Программэм хэлажьэхэрэм ветеранхэм яIофыгъохэм, IэпыIэгъоу арагъэгъотыхэрэм афэгъэ­хьыгъэу яупчIэхэр зэхэщакIохэм афагъэзагъ, фондым амалэу IэкIэлъхэм акIэупчIагъэх. Мы мафэм ехъулIэу ветеранхэм япроцент 90-м япсауныгъэ изытет ауплъэкIугъ. Джащ фэдэу федеральнэ реабилитационнэ гупчэхэм зэзэгъыныгъэхэр адашIыгъэхэу ветеранхэм япсауныгъэ ащызэтырагъэуцожьы.Ветеранхэм ащыщэу Сергей Скрыльник къызэриIуагъэмкIэ, фондым иIофшIэн зыфэдэм нэIуасэ зыфэхъу нэуж къыгурыIуагъ тапэкIэ проектыр пхырыщы­гъэнымкIэ шIуагъэ къытэу ащ Iоф зэрэ­дэпшIэн плъэкIыщтыр. Анахьэу ар зыкIэупчIагъэр хэушъхьафыкIыгъэ дзэ опе­рацием хэлажьэхэрэр ыкIи ахэм яунагъохэр зыгъэпсэфыпIэ-IэзэпIэ учреждениехэм зэрагъакIохэрэр ары.— ХэушъхьафыкIыгъэ дзэ операцием хэлажьэхэрэмрэ ахэм яуна­гъохэмрэ лъэныкъо зэфэшъхьаф­хэмкIэ IэпыIэгъу ягъэгъотыгъэным фы­тегъэпсыхьэгъэ къулыкъу зыкI тиIэу Iоф тэшIэ. Фондым икъутамэ ынаIэ зытет дзэкIолI пэпчъ ищыкIэ­гъэ екIолIакIэ къэзыгъотырэ со­ци­альнэ гъэIорышIакIо епхыгъ. Ащ тетэу IэпыIэгъу зэрагъотырэм ти­лIыхъужъэу Хэгъэгур къэзыухъу­мэхэрэм яIофыгъохэм игъом ахэп­лъэнхэу, гумэкIыгъохэр дагъэзы­жьын­хэу амал къеты. Ар мэхьанэшхо зиIэ IофшIэн, сыда пIомэ, ветеранхэм хэушъхьафыкIыгъэ дзэ операцием къыхэкIыжьхэу къызагъэзэжьыкIэ, щыIэныгъэм хэгъозэ­жьынхэмкIэ, лъэныкъо гъэнэфагъэ зыкъыщагъотынымкIэ адеIэгъэн фае. Ащ пае медицинэ, юридическэ лъэныкъохэмкIэ упчIэу яIэхэм яджэуапхэр агъотынхэ, япсауныгъэ зыпкъ рагъэуцожьынымкIэ, сэнэ­хьат зэрагъэгъотынымкIэ, спортым пылъынхэмкIэ IэпыIэгъу афэ­хъугъэн фае. А зэпстэури Фондэу «Хэгъэгум иухъумакIохэр» зыф­и­Iорэм щызэшIуахых. СыдигъокIи ветеранхэмрэ ахэм яунагъохэмрэ тырягъус. ТиIофшIэн цифрэ шIыкIэр чанэу щыдгъэфедэными тыпылъ, арышъ, зыкъытфэзыгъазэ­хэрэр игъом тэлъэгъух, охътэ кIэ­кIым ищыкIэгъэ IофшIэным ыуж техьэ. Ар мафэ къэс Iоф зышIэу, системэм игъэкIэжьын ренэу пылъ командэм ишIушIагъ, — къыIуагъ фондэу «Хэгъэгум иухъумакIохэр» зыфиIорэм икъутамэу Адыгеим щыIэм ипащэ игуадзэу Джарымэ Еленэ.Шъолъыр фондым исоциальнэ координаторэу Инна Свежевскаям къызэрафиIотагъэмкIэ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм лъэныкъо зэфэшъхьафхэмкIэ — япсауныгъэ зыпкъ рагъэуцожьынымкIэ, IофшIэпIэ чIыпIэхэр къафэгъотыгъэнымкIэ, джащ фэдэу ныбжьыкIэхэм яхэгъэгу шIу алъэгъоу пIугъэнхэмкIэ фондым иIофшIэн зэрифэшъуашэу егъэ­цакIэ. Къутамэм иIофшIэн зыригъэжьэгъэ 2023-рэ илъэсым къыщыублагъэу гумэкIыгъо зэфэшъхьафхэм япхыгъэу нэбгырэ мини 5-м ехъумэ зыкъыфагъэ­загъ, ахэм яIофыгъохэр процент 96-у афызэшIуахыгъ. Ахэр анахьэу зыфэгъэ­хьыгъэхэр социальнэ ыкIи медицинэ IэпыIэгъум, IофшIэпIэ чIыпIэхэм язэгъэ­гъотын, ахъщэ тынхэм якъызIэкIэгъэхьан. Мы мафэм ехъулIэу хэушъхьафыкIыгъэ дзэ операцием щыIэгъэ нэбгырэ 531-мэ Адыгеим къагъэзэжьыгъ. Ахэм зэкIэми шъолъыр къутамэм гъунэ алъефы.Шъугу къэдгъэкIыжьын, сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэр Адыгэ Республикэм и ЛIышъхьэу КъумпIыл Мурат икIэщакIоу агъэпсыгъ. ХэушъхьафыкIыгъэ дзэ операцием хэлажьэхэу ыкIи ветеранхэу тапэкIэ муниципальнэ къулыкъушIэ хъущтхэм сэнэхьат ухьазырыныгъэ зэрагъэгъотыным программэр фэIорышIэ.КIАРЭ Фатим.