Къэралыгъо Iофтхьабзэр лъагъэкIуатэ

Урысыем фэшъыпкъэхэу, итарихъ уасэ фашIэу, тилIыхъужъхэм лъытэныгъэ арахэуныб­жьыкIэхэр пIугъэнхэр — къэралыгъом ипшъэрылъ шъхьаIэхэм ащыщ. Ащ фэIоры­шIэрэ Iофтхьабзэхэри шъолъыр пэпчъ щызэхащэх.

Ахэм ащыщ Урысые обществэу «ШIэныгъэр» ыкIи къэралыгъо фондэу «Хэгъэгум иухъумакIохэр» зэгъусэхэу непэ зыдэлэжьэхэрэ Iофтхьабзэу «Хэгъэгум къулыкъу фэсэхьы» зыфиIорэр. Ящэнэрэ илъэс хъугъэу ар къэралыгъом щырекIокIы. ХэушъхьафыкIыгъэ дзэ операцием иветеранхэр ыкIи мы лъэхъаным къулыкъу зыхьыхэрэр ащ хэлажьэх. КIэлэеджакIохэм, студентхэм ахэр аIо­кIэх. АщкIэ зыгъэпсэфыгъо мазэхэр къызфагъэфедэх. Хы-Дзэ Флотым, ошъо­гудзэхэм ахэтхэм ямафэхэр, тарихъым хэхьэгъэ шIэжь мафэхэр ыкIи къэралыгъо мэфэкIхэр къызхэкIыгъэхэр афа­Iуатэхэзэ, гъогоу Урысыем къыкIугъэм ныбжьыкIэхэр щагъэгъуазэх.ХэушъхьафыкIыгъэ дзэ операцием иветеранхэм ящыIэныгъэ гъогу, зэ­къошныгъэу, зэкъотныгъэу дзэкIолIхэм азыфагу илъыр, лIыхъужъныгъэу зэопIэ чIыпIэхэм ащызэрахьэрэр нахьыжъхэм ныбжьыкIэхэм афаIуатэ.— ХэушъхьафыкIыгъэ дзэ операцием иветеранхэр тиреспубликэ ищыIэкIэ-псэу­кIэ хэлэжьэнхэмкIэ, яшIэныгъэхэмкIэ мыщ щыпсэухэрэм адэгощэнхэмкIэ ащ фэдэ зэIукIэхэм мэхьанэшхо яI. «Хэгъэгум къулыкъу фэсэхьы» зыфиIорэ Iофтхьабзэми а амалхэр тидзэкIолIхэм къареты. ЗэIукIэхэм зэдэгущыIэгъу шъуашэ зэряIэм ишIуагъэкIэ ежь ныбжьыкIэхэм ашIогъэшIэгъон хъугъэ лъэныкъохэмкIэ нахьыжъхэм зафа­гъэзэшъущт. А IофшIэныр лъыд­гъэкIотэщт, — къыхигъэщыгъ фондэу «Хэгъэгум иухъумакIохэр» зыфиIорэм икъутамэу Адыге­им щыIэм ипащэу ПIатIыкъо Аслъан.Щысэхэм ащыщ лIыхъужъэу Евгений Абатуровым зэIукIэгъоу ныбжьыкIэхэм бэмышIэу адыриIагъэр. УIэгъэ хьылъэ тещагъэ зэрэхъугъэм пае зэопIэ чIыпIэр ащ къыбгынэнэу хъугъэ. КIалэр ныбжьыкIэми, пэкIэкIыгъэри ылъэгъугъэри макIэп. АхэмкIэ ар къэзэрэугъоигъэхэм адэгощагъ. Проектым игъэцэкIэн джащ фэдэу хэлажьэх хэушъхьафыкIыгъэ дзэ операцием иветеранхэу Сергей Артюшенкэмрэ Илья Донцовымрэ.«Хэгъэгум къулыкъу фэсэхьы» зыцIэ Iофтхьабзэр 2024-рэ илъэсым щегъэ­жьагъэу къэралыгъом щызэхащэ. ЗэIукIэ 1300-рэ фэдиз ашIыгъах. Ахэм ащыщэу хэушъхьафыкIыгъэ дзэ операцием хэлажьэхэрэм ыкIи иветеран нэбгырэ 300-мэ ныбжьыкIэхэм зэIу­кIэгъухэр адыряIагъ.Цэй Замир.