Паралимпийскэ ыкIи сурдлимпийскэ джэгунхэм ярезерв зыгъэхьазырырэ адаптивнэ спортымкIэ республикэ спорт еджапIэм ихъулъфыгъэ командэ Урысыем и Кубок икъыдэхын фэгъэхьыгъэ турнирым хагъэунэфыкIырэ чIыпIэ къыщыдихыгъ.
ГолболымкIэ зэнэкъокъухэр Нижегородскэ хэкум икъалэу Дзержинскэ щыкIуагъэх. Республикэм икIыгъэ спортсменхэр зыгъэхьазырыгъэр тренерэу Елена Минаевар ары. Iофтхьабзэм изэхэщэнкIэ, ащ пэIухьащт мылъкумкIэ Урысые спорт фондыр IэпыIэгъу къафэхъугъ.
Зэнэкъокъум шъолъыр зэфэшъхьафхэм къарыкIыгъэ командих хэлэжьагъ. Ящэнэрэ чIыпIэм фэбэнагъэх Адыгеим ыкIи Москва яспортсменхэр. Тиреспубликэ илIыкIохэм 9:8-у текIоныгъэр къыдахыгъ ыкIи джэрз медальхэр къахьыгъэх. Новосибирскэ хэкум икомандэ текIоныгъэр къыдихыгъ, кIэух едзыгъом ар 5:4-у Тульскэ хэкум нахь лъэшыгъ.Голболыр паралимпийскэ спорт лъэпкъхэм ащыщ. Командэ пэпчъ нэбгырих хэт, ау зы уахътэм ешIапIэм итын фитыр спортсменищ.