kremlin.ru
Урысые политикэ партиеу «Единэ Россием» хэтхэр Москва щызэIукIагъэх. Ащ ия XXIII-рэ Зэфэс иятIонэрэ едзыгъо нэбгырэ минищым ехъу хэлэжьагъ.Iофтхьабзэм тхьамэтагъор щызэрихьагъ УФ-м щынэгъончъэнымкIэ и Совет и Тхьаматэ игуадзэу, партием и Тхьаматэу Дмитрий Медведевым. Зэфэсым къекIолIагъэхэм шIуфэс къарихыгъ УФ-м и Президентэу Владимир Путиным. Пстэумэ апэу ар Урысыем ибыракъ и МафэкIэ къафэгушIуагъ.
«Тибыракъ чIэтхэу тидзэкIолIхэр пыим пэшIуекIох, шъхьафит ашIыжьырэ къалэхэм, поселкэхэм ащаIэты. ЗэуапIэм, зэо кIыбым, Урысые обществэм илIэужхэм языкIыныгъэ, тыкъызытекIыгъэхэм къытфагъэнэгъэ хабзэхэм япытагъэ тэ ткIуачI. ЗэкIэми тызынарод, тызэготэу тибыракъ, ти Хэгъэгу тафэбэнэщт, тифедэ зыхэлъыр къэдгъэгъунэщт. Сицыхьэ телъ, хэдзынэу къэблагъэхэрэм къэралыгъом изыпкъитыныгъэ, типолитическэ системэ зэрэчъэпхъыгъэр, щынагъохэм апэшIуекIон амал ащ зэриIэр джыри зэ къаушыхьатыжьыщт, нэбгырэ миллион пчъагъэмэ яфедэхэм, Урысыем суверенитетрэ щынэгъончъагъэрэ иIэнхэм ахэр зэрэфэбанэхэрэр къагъэлъэгъощт. ЦIыфхэр хабзэм икъэкIуапIэх. Ахэм ялIыкIо хъущтхэр къыхахын, яхэгъэгу хэхъоныгъэ езыгъэшIыщт гъогур къагъэнэфэн фитыныгъэу яIэр зыми зэхигъэтэкъошъущтэп. Сыд фэдэрэ чIыпIэ къин тифагъэми, цIыфхэм хабзэр зэряем тытекIыщтэп, хэгъэгум зэрэщытэу, КъохьэпIэ Чыжьэм къыщегъэжьагъэу Новороссием, Донбасс анэсыжьэу, хэдзынхэр ащызэхэтэщэх ыкIи ащызэхэтщэщтых. Ахэм зэуапIэм щыIэ тидзэкIолIхэри ахэлажьэх. Урысыем пае заохэрэм, Iоф зышIэхэрэм цыхьэ зыфашIэу къыхахырэр бгъэлъэпIэн фае. Ащ пэпчъ УФ-м и Къэралыгъо Думэ идепутатэу хадзыщтхэм пшъэрылъэу яIэр нахьыбэ мэхъу. Ар хэбзэ къулыкъу пстэумэ афэдэу, хэгъэгум ифедэ зыхэлъыр къыухъумэным, цIыфхэм апае Iоф ышIэным фэхьазырын фае», — къыIуагъ къэралыгъом ипащэ.
Владимир Путиным Народнэ программэр обществэм ишIоигъоныгъэхэм адиштэу зэрэзэхэгъэуцуагъэр агу къыгъэкIыжьыгъ. Лъэпкъ гухэлъхэр, хэгъэгу шъхьафитэу инеущырэ мафэ зыгъэнафэрэм имурадхэр пхырыщыгъэнхэм партием иIахь хилъхьанэу зэрэщыгугъырэм къыкIигъэтхъыгъ.«Непэ «Единэ Россиер» зытегущыIэнышъ, ыштэщт Народнэ программэм Iофышхо дишIагъ. ЦIыфхэр кIэщакIо зыфэхъугъэхэр къыдэлъытагъэхэу ар ыгъэхьазырыгъ. Зэфагъэр, шъыпкъагъэр ишэпхъэ шъхьаIэх, ащ къикIырэр «Единэ Россием» ипрограммэ исатыр, гущыIэу хэт пэпчъпшъэдэкIыжь зэрихьырэр ары», — къыхигъэщыгъ УФ-м и Президент.
Нэужым партием и Тхьаматэу Дмитрий Медведевыр къэгущыIагъ. Ащ къызэрэхигъэщыгъэмкIэ, цIыфэу чIыпIэ къин ифагъэхэм IэпыIэгъу ятыгъэныр, нэжъ-Iужъхэм анаIэ атырагъэтыныр, къэралыгъо къулыкъухэм яIофшIэн нахьыбэу шIуагъэ къытыным афэшI технологие пэрытхэр нахьыбэу щыIэныгъэм хэгъэхьэгъэнхэр апшъэ ашIыхэрэм ащыщэу къэнэжьыщтых.
«Хэдзынхэм япэгъокIэу дгъэхьазырыгъэ тхылъыр тызэрэзэкъотым итамыгъ. ЛIэшIэгъу плIанэкIэ узэкIэIэбэжьмэ Урысыем ицIыфхэм яшIоигъоныгъэхэм ягъэцэкIэн пае партиер зэхэтщэгъагъ. Тимурадхэри, анахьэу уасэ зыфэтшIыхэрэри зэрэзэтефэхэрэм ишIуагъэкIэ хэгъэгур къызэтедгъэнэн, 1990-рэ илъэс къинхэр къызэпытчынхэ тлъэкIыгъагъ. Непи зыкIыныгъэм ишIуагъэкIэ IэкIыбым къыттыригъаорэ пстэури къызэпытэчышъу, хэушъхьафыкIыгъэ дзэ операцием текIоныгъэр къыщыдэтхыным тыфэкIо», — къыIуагъ Дмитрий Медведевым.
Программэр игъо дэдэу зэрэщытыр къыхигъэщыгъ АР-м и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат.«Хэгъэгум цIыфэу исхэм ягукъэкIхэр лъапсэ фэхъугъэх Народнэ программэм. Партием ипрограммэхэм яшIуагъэу къакIорэр уахътэм къыгъэлъэгъуагъ. «Единэ Россием» иIэпыIэгъукIэ шъолъырым хэхъоныгъэ ышIыным, цIыфхэм ящыIакIэ нахьышIу хъуным афытегъэпсыхьагъэу зэшIохыгъэ хъугъэр бэ. ЦIыфхэм яшIоигъоныгъэхэм, федеральнэ ыкIи шъолъыр пшъэрылъхэм ягъэцэкIэн партием ынаIэ тет. Адыгеим хэхъоныгъэ ышIыным пае тызэрыкIон фэе гъогур программэм къытегъэлъэгъу. Ащ иIахь пэпчъ цIыфхэм яшIоигъоныгъэхэм къапкъырыкIыгъ, арышъ, ахэр къызажэхэрэр гъэцэкIагъэ хъущт. Тэ типшъэрылъыр ахэр зэкIэ щыIэныгъэм щыпхырытщын-хэр ары. Ащ тиIофшIагъэ къегъэлъагъо, цIыфхэм цыхьэ къытфарегъэшIы. Владимир Путиным къызэрэхигъэщыгъэу, «Единэ Россием» ипрограммэ исатыр, игущыIэ пэпчъ пшъэдэкIыжь ехьы. Ащ фэдэ екIолIакIэ тэри тиIофшIэн фытиIэщт, ар лъэпкъ гухэлъхэм ягъэцэкIэн, цIыфхэм ящыIакIэ нахьышIу хъуным фэIорышIэщт», — къыкIигъэтхъыгъ шъолъырым ипащэ.
КъумпIыл Мурат ипшъэрылъкIэ Адыгеим илIыкIо куп Зэфэсым хэлэжьагъ. Ащ хэтыгъэх партием ипэшIорыгъэшъ мэкъэтын текIоныгъэр къыщыдэзыхыгъэу, «ЛIыхъужъхэм яуахът» зыфиIорэ программэм хэлэжьагъэу Сергей Ковалевыр, партием и Апшъэрэ Совет хэтэу Надежда Бражниковар, партием и Адыгэ шъолъыр къутамэ игъэцэкIэкIо комитет ипащэу АфэшIэгъо Рэмэзан, къалэу МыекъуапэкIэ чIыпIэ къутамэм исекретарэу Геннадий Митрофановыр, АР-м имуниципальнэ образованиехэм я Совет ипащэу Апсэлямэ Руслъан, республикэм ирайонхэм ыкIи икъалэхэм яцIыф чанхэр. Джащ фэдэу Зэфэсым хэлэжьагъэх Адыгеим илIыкIоу УФ-м ФедерациемкIэ и Совет ыкIи Къэралыгъо Думэм ащыIэхэ Александр Наролиныр, Хъопсэрыкъо Мурат, Владислав Резник, Хьасанэкъо Мурат.Урысыем изаслуженнэ артистэу Денис Майдановым Iофтхьабзэр зэфишIыжьыгъ. Ар Урысыем ибыракъ и МафэкIэ къафэгушIуагъ ыкIи «Флаг моего государства» зыфиIорэ орэдыр къыIуагъ.Шъугу къэдгъэкIыжьын, УФ-м и Къэралыгъо Думэ ыкIи АР-м и Къэралыгъо Совет — Хасэм ядепутатхэм яхэдзынхэр Iоныгъом и 18-м къыщыублагъэу и 20-м нэс кIощтых. Шъолъырым хэдзынхэмкIэ и Гупчэ комиссие къызэритыгъэмкIэ, УФ-м и Къэралыгъо Думэ идепутатхэм яхэдзынхэм ахэлэжьэнхэу зы мандат зиIэ хэдзыпIэ коеуN 1-мкIэ кандидати 7 зязыгъэтхыгъэр. АР-м и Къэралыгъо Совет — Хасэм идепутат яхэдзынхэм ахэлэжьэнэу зыкI хэдзыпIэ коимкIэ кандидат 383-рэ, зы мандат зиIэ койхэмкIэ 102-рэ атхыгъ. Федеральнэ хэдзынхэм партии 10, шъолъыр хэдзынхэм 6 ахэлэжьэщт.Александра БАЛАБАСЬ.