М. Гордышов
Гъэсэныгъэм иIофышIэхэм яреспубликэ шышъхьэIу зэIукIэу тыгъуасэ щыIагъэм хэлэжьагъ Адыгеим и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат.
Къырагъэблэгъагъэхэм ахэтыгъэх АР-м и Къэралыгъо Советым — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэ игуадзэу — АР-м финансхэмкIэ иминистрэу Виктор Орловыр, Адыгеим гъэсэныгъэмрэ шIэныгъэмрэкIэ иминистрэу Евгений Лебедевыр.Iофтхьабзэр амыублэзэ гъэсэныгъэм ылъэныкъокIэ гъэхъагъэу щыIэхэм япхыгъэ къэгъэлъэгъоным къэзэрэугъоигъэхэр екIолIагъэх.Зэхахьэм ипэублэ УФ-м просвещениемкIэ иминистрэу Сергей Кравцовыр видеозэпхыныгъэкIэ кIэлэегъаджэхэм закъыфигъэзагъ. Урысые гъэсэныгъэм непэ хэхъоныгъэу ышIыхэрэм ыкIи тапэкIэ кIэлэегъаджэхэм пшъэрылъэу яIэхэм ар къащыуцугъ.Нэужым АР-м и ЛIышъхьэу КъумпIыл Мурат къэзэрэугъоигъэхэм закъыфигъэзагъ. Гъэсэныгъэр ыкIи пIуныгъэр джырэ шапхъэхэм адиштэнхэм пае мы аужырэ илъэсхэм шъолъырым бэ зэрэщашIагъэр къыIуагъ.— КIэлэцIыкIур зыщыпсэурэм емылъытыгъэу гъэсэныгъэ дэгъу зэригъэгъотын амал иIэным тыдэлажьэ. УФ-м и Президентэу Владимир Путиныр кIэщакIо зыфэхъугъэ лъэпкъ проектхэм, хэгъэгум и Правительствэ иIэпыIэгъукIэ, «Единэ Россием» ипартийнэ проектхэм яшIуагъэкIэ илъэс къэс гъэсэныгъэм иинфраструктурэ хэхъоныгъэхэр ешIых, — къыIуагъ Адыгэ Республикэм и ЛIышъхьэ.2019-рэ илъэсым къыщегъэжьагъэу республикэм гурыт еджэпIэ 12 кIэу щашIыгъ, ахэр чIыпIэ 8500-мэ атегъэпсыхьагъ, сомэ миллиарди 8-м ехъу атефагъ. Ащ ишIуагъэкIэ ятIонэрэ сменэмкIэ еджэхэрэм япчъагъэ нахь макIэ хъугъэ.2019-рэ илъэсым къыщегъэжьагъэу республикэм кIэлэцIыкIу IыгъыпIэ 18 кIэу щашIыгъ, ахэм кIэлэцIыкIу мини 3,3-рэ ачIэфэ. Джащ фэдэу щыIэхэм псэолъиплI къапашIыхьажьыгъ. ДжырэкIэ муниципалитетхэм кIэлэцIыкIу IыгъыпIи 3 ащашIы, нэбгырэ 440-рэ зырыз ахэм ачIэфэщт.Гъэсэныгъэ учреждениехэм ягъэкIэжьын къытегущыIэзэ мы аужырэ илъэсхэм гурыт еджэпIэ 28-мэ ыкIи кIэлэцIыкIу IыгъыпIи 2-мэ игъэкIотыгъэ гъэцэкIэжьынхэр зэращыкIуагъэхэр КъумпIыл Мурат къыIуагъ.— Непэрэ мафэм ехъулIэу республикэм ит ящэнэрэ еджапIэ ыкIи ятфэнэрэ кIэлэцIыкIу IыгъыпIэ пэпчъ аужырэ шапхъэхэм адештэ, — къыIуагъ шъолъырым ипащэ.Гъэсэныгъэ тедзэм ылъэныкъокIэ республикэ естественнэ-хьисап еджапIэм, «Полярис-Адыгеям», IT-клубым, «Точка роста» ыкIи Кванториумхэм чанэу Iоф ашIэ. Мы илъэсым Урысые олимпиадэхэм нэбгыри 6-мэ хагъэунэфыкIырэ чIыпIэхэр къащахьыгъэх, зыкI къэралыгъо уштынхэм нэбгырэ 13-мэ балли 100 къащырахыгъ. ЯтIонэрэ илъэс хъугъэу балл 200 изыгъэкъугъэ ныбжьыкIэхэр Адыгеим иIэх.Гъэхъэгъэ ин зышIырэ кIэлэеджакIохэм ыкIи гъэсакIохэм ахъщэ шIухьафтынэу аратырэм шъхьафэу КъумпIыл Мурат къатегущыIагъ. 2022-рэ илъэсым къыщегъэжьагъэу урысые олимпиадэхэм текIоныгъэ къащыдэзыхыхэрэм республикэ бюджетым къыхэхыгъэ сомэ мин 400, хагъэунэфыкIырэ чIыпIэ къэзылэжьыгъэхэм сомэ мин 200 араты. 2026-рэ илъэсым къыщегъэжьагъэу олимпиадэм фэзыгъэхьазырыхэрэ кIэлэегъаджэхэми ахъщэ шIухьафтынхэр аратых. 2025-рэ илъэсым къыщыублагъэу зыкI къэралыгъо ушэтынымкIэ балли 100 къизыхыхэрэм сомэ мини 100 араты.Президентым ижъоныгъокIэ унашъохэм ягъэцэкIэн къыдыхэлъытагъэу Iоныгъом и 1-м къыщегъэжьагъэу кIэлэегъаджэхэм ялэжьапкIэ къызэрэхэхъощтыр КъумпIыл Мурат къыIуагъ.ИлъэсыкIэ еджэгъум ехъулIэу Мыекъопэ индустриальнэ техникумым цIыф зэрымыс быбырэ пкъыгъохэм япхыгъэу Iоф зышIэщт специалистхэр щырагъаджэхэу аублэщт. Мыекъопэ къэралыгъо технологическэ университетым и Дзэ егъэджэн гупчэ закъу ыпэкIэ мы лъэныкъомкIэ гъэсэныгъэ языгъэгъотыщтыгъэр.КъыткIэхъухьэрэ лIэужхэм яхэгъэгу шIу алъэгъоу пIугъэнхэм мэхьанэшхо зэриIэр республикэм ипащэ хигъэунэфыкIыгъ. Ащ къыдыхэлъытагъэу хэушъхьафыкIыгъэ дзэ операцием хэлажьэхэрэр ыкIи иветеранхэр гурыт еджапIэхэм макIох, кIэлэеджакIохэм гущыIэгъу афэхъух. ЛIыхъужъхэм япартэ 85-рэ къащызэIуахыгъ, ахэм ащыщхэм ацIэхэр афаусыгъ.КIэухым КъумпIыл Мурат илъэсыкIэ еджэгъоу къэблагъэрэмкIэ къэзэрэугъоигъэхэм къафэгушIуагъ.Илъэс пчъагъэрэ гъэсэныгъэм ыкIи пIуныгъэм дэлэжьагъэхэм Адыгеим и ЛIышъхьэ ирэзэныгъэ тхылъхэр аратыгъэх. Ахэр: Инэм дэт гурыт еджапIэу N 6-м урысыбзэмкIэ ыкIи литературэмкIэ икIэлэегъаджэу Абрэдж Дариет, Джэджэ районым игурыт еджапIэу N 9-м нэмыцыбзэмкIэ икIэлэегъаджэу Ирина Астапенкэр, Мыекъопэ гурыт еджапIэу N 9-м урысыбзэмкIэ ыкIи литературэмкIэ икIэлэегъаджэу Татьяна Ермоленкэр, Кощхьэблэ районым ит гурыт еджапIэу N 10-м инджылызыбзэмкIэ икIэлэегъаджэу КIарэ Разиет, Адыгэкъалэ дэт кIэлэцIыкIу IыгъыпIэуN 4-м икIэлэпIоу ПчыхьэлIыкъо Хъариет, Мыекъопэ кIэлэцIыкIу IыгъыпIэу N 48-м икIэлэпIоу Анна Рыжковар, Адыгэ кIэлэегъэджэ колледжым ипащэ егъэджэн IофымкIэ игуадзэу Терчыкъо Лидие, Тэхъутэмыкъое районымкIэ кIэлэцIыкIу IыгъыпIэу N 1-м икIэлэпIоу Цуекъо Любовь.ДЕЛЭКЪО Анет.