АР-м и ЛIышъхьэ ипресс-къулыкъу
Урысые Федерацием ибыракъ и Мафэ Адыгеим зэрифэшъуашэу щыхагъэунэфыкIыгъ.
Муниципалитетхэм зэкIэми къэгъэлъэгъонхэр, зэIукIэгъухэр, культурнэ ыкIи спорт Iофтхьабзэхэр ащызэхащагъэх.Хъугъэ-шIэгъэ шъхьаIэ хъугъэр Зэкъошныгъэм игупчэ щыкIуагъэр ары. Республикэм щыпсэухэрэм ыкIи ихьакIэхэм къафэгушIуагъ Адыгеим и ЛIышъхьэу КъумпIыл Мурат.Джащ фэдэу Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, министрэхэм я Кабинет хэтхэр, республикэ Парламентым идепутатхэр, нэмыкIхэри.Зэхахьэр кIэлэцIыкIу творческэ купхэм къызэIуахыгъ, нэужым ныбжьыкIэ организациехэм ахэтхэм Урысыем и Къэралыгъо быракъышхо къызэкIащыгъ.АР-м и ЛIышъхьэ зэхахьэм хэлажьэхэрэм шIуфэс псалъэкIэ закъыфигъэзагъ. Илъэс 35-кIэ узэкIэIэбэжьмэ, 1991-рэ илъэсым шышъхьэIум и 22-м, фыжь-шхъонтIэ-плъыжь триколорым ти Хэгъэгу едзыгъуакIэ зэрэтехьагъэр къызэригъэнэфэгъагъэр агу къыгъэкIыжьыгъ. Ащ къыщегъэжьагъэу а мафэр лъэпкъ зыкIыныгъэм, лъэхъанэхэр зэпычыгъэ зэрэмыхъугъэхэм ыкIи титарихъ тызэрэфэшъыпкъэм ятамыгъэ хъугъэ.«УрысыемкIэ быракъым имэхьанэ къэралыгъо тамыгъэм нахь ин. Ар зэо-зэпэуцужьышхоу Урысыем ихъугъэ-шIэгъэ тхыжьыгъэхэм къахэнагъэхэм ащаIэтыщтыгъ. Урысыем илъэпкъ зыкIыныгъэ и Илъэс анахьэу зэхэтэшIэ тиблэкIыгъэ зэрэзэдытиер ыкIи неущырэ мафэр дгъэпсыным тызэрэзэдыфэбанэрэр ткIучIэу зэрэщытыр. Непэ тихэгъэгу ибыракъ чIэтэу, тыкъызтекIыгъэ лIэужхэм ялIыхъужъныгъэ ишIэжь ыгъэлъапIэзэ, хэхъоныгъэ ешIы, наукэм, спортым ыкIи IофшIэным ягъэхъагъэхэмкIэ Урысые къэралыгъом ищытхъу хегъахъо», — къыIуагъ КъумпIыл Мурат.«УФ-м и Президентэу Владимир Путиным къызэрэхигъэщыгъэу «Патриотизмагъэм, Хэгъэгум инеущырэ мафэ зэрэфэгумэкIыхэрэм тицIыфхэр зыч-зыпчэгъу ышIыгъэх. А хабзэр къэтыухъумэн ыкIи зедгъэушъомбгъун фае». Урысыем идзэкIолIхэм лIыблэнагъэ зэрахьэзэ Хэгъэгум ифедэхэр къаухъумэх. Шъхьафит ашIыжьыгъэ чIыпIэхэм рыгушхохэзэ Урысыем ибыракъ къащаIэты, тарихъ зэфагъэр, мамыр щыIакIэр зыпкъ зэрэрагъэуцожьыгъэхэр, тихэгъэгушхо зыпари къызэрэтемыкIошъущтыр къагъэлъагъо», — къыIуагъ шъолъырым ипащэ.Адыгеим итворческэ купхэм къатыгъэ концертымкIэ Iофтхьабзэр аухыгъ.АР-м и ЛIышъхьэ ипресс-къулыкъу къытырэ къэбархэмкIэ ХЪУТ Нэфсэт.