Фестивалыр рагъэжьагъ

Тхьаумафэу кIуагъэм Пушкиным и Унэ спектаклэу «ЧIыгу Iэбжыб» зыфиIорэмкIэ театрэ фестивалэу «ЛъэгапIэр» къыщызэIуахыгъ.

Iофтхьабзэр шышъхьэIум и 23-м къы­щыублагъэу и 30-м нэс Мыекъуапэ щыкIощт ыкIи хэгъэгум икъэлэ зэфэ­шъхьафхэм ятеатрэхэм яспектаклэхэр зэрипхыщтых.Мы культурнэ хъугъэ-шIэгъэ иным къекIолIэгъагъэх АР-м и ЛIышъхьэу КъумпIыл Муратрэ Урысыем инароднэ артистэу, Лъэпкъхэм я Театрэ ихудожественнэ пащэу, проектым икIэщакIоу Евгений Мироновымрэ. БлэкIыгъэ илъэ­сым ар Мыекъуапэ къэкIуагъэу респуб­ликэм и ЛIышъхьэ зэIукIэгъу зыдыреIэр ары фестивалыкIэ зэхищэн мурад зэриIэр къызиIогъагъэр, шъолъырым ипащэ ащ дыригъэштэгъагъ.

Ащ тетэу къекIокIырэ фестиваль мэхьанэ зэратыгъэ проектым Адыгеир иапэрэ бысым хъугъэ. Тхьамафэм къы­кIоцI Пушкиным и Унэрэ концертнэ за­лэу «Налмэсымрэ» ясценэхэм спектаклэхэр къащагъэлъэгъощтых. ПстэумкIи 8 фестивалым ипрограммэ хэхьа­гъэр. Ахэм янахьыбэр Лъэпкъхэм я Театрэ инэмыкI проектэу, Урысыем икъэлэ цIы­кIухэм ятеатрэхэм я Фестиваль къы­щагъэлъэгъуагъэх.«ЛъэгапIэм» иапэрэ хьакIэхэр АР-м и Лъэпкъ театрэ ригъэблэгъагъэх ыкIи «ЧIыгу Iэбжыб» зыфиIорэ спектаклэу, нахьыпэкIэ театрэр шIу зылъэгъухэрэмрэ ащ ипрофессионалхэмрэ осэ ин зыфа­шIыгъэмкIэ Iофтхьабзэр къызэ­Iуихыгъ.

Шъугу къэдгъэкIыжьын, «ЧIыгу Iэбжыбыр» Баграт Шинкубэ ироманэу «Последний из ушедших» зыфиIорэм техыгъэу агъэуцугъ. Убыххэм тхьамыкIагъоу къызэпачыгъэхэм ар афэгъэ­хьыгъ. Зыгъэуцугъэ режиссерыр ыкIи инсценировкэхэм яавторыр Константин Мишиныр ары.Спектаклэу «ЧIыгу Iэбжыбыр» теат­ральнэ тын анахь инэу «Золотая Маска» зыфиIорэм идипломат хъугъэ, 2025-рэ илъэсым Урысыем испектаклэ анахь дэгъу 30-мэ ахэхьагъ. Ар лъэпкъ теат­рэ­хэм яя VI-рэ Урысые фестивалэу къалэу Грознэм щыкIуагъэм, «Южная сцена» зыфиIорэ Дунэе театральнэ фестивалэу къалэу Налщык щызэха­щэгъагъэм ахэлэжьагъ. Лъэныкъохэу «Спектаклэ анахь дэгъу», «Хореографие анахь дэгъу» зыфиIохэрэмкIэ тынхэр къыхьыгъэх.Фестивалым егъэжьапIэ фэхъугъэ спектаклэм ыуж артистхэмрэ еплъы­гъэ­хэмрэ зэдэгущыIэгъу зэдыряIагъ. Евгений Мироновым «ЛъэгапIэр» къызэрэзэ­Iуахыгъэм фэшI зэпстэуми къафэгу­шIуагъ, АР-м и ЛIышъхьэу КъумпIыл Мурат проектым IэпыIэгъу зэрэфэхъугъэм пае «тхьауегъэпсэу» къыриIуагъ. Лъэпкъхэм я Театрэ ихудожественнэ па­щэ къызэ­рэхигъэщыгъэмкIэ, фестивалыр непэрэ лъэхъаным иискусствэ, культурэ зэщымыщым, Урысыем итеат­ральнэ картэ Кавказым чIыпIэу щиубытырэм афэгъэ­хьыгъэ зэдэгущыIэгъушхо хъущт.Адыгеим и ЛIышъхьэ республикэм итворческэ щыIакIэкIэ, шъолъырхэм язэпхыныгъэ ылъэныкъокIэ мы хъугъэ-­шIагъэм мэхьанэшхо зэриIэр къыхигъэ­щыгъ. КъумпIыл Мурат къызэриIуагъэмкIэ, «ЛъэгапI» зыфиIорэ цIэр къушъхьэ чIыпIабэ зиIэ Адыгеим къызэрекIурэм имызакъоу, творческэ лъэгэпIакIэхэм уафегъэчэфы.«Фестивалэу «ЛъэгапIэр» Урысыем и Къыблэ шъолъыркIэ мэхьанэшхо зиIэ хъугъэ-шIагъ. Адыгеим ащ егъэжьапIэ ритынэу къызэрэтефагъэр шъуашэ ыкIи культурэм тиIахьэу хатлъхьэрэм уасэ къызэрэфашIырэм ишыхьат. Республикэм икультурнэ кIэн икъызэтегъэнэнкIэ ыкIи хэгъэхъогъэнымкIэ аужырэ илъэсхэм тшIагъэр макIэп. ЦIыф IэпэIасэу тиIэр бэ, арышъ, ахэм творческэ амалэу яIэм зырагъэушъомбгъунымкIэ ящыкIэгъэ амалхэр яттынхэм тапэкIи тыпылъыщт. Евгений Мироновым тишъолъыр ынаIэ къызэрэтетым, республикэм иактерхэм IэпыIэгъу къызэрафэхъурэм афэшI «тхьа­уегъэпсэу» есIомэ сшIоигъу. Сицы­хьэ телъ, «ЛъэгапIэр» Адыгеим итеат­ральнэ искусстви, нэмыкIэу фестивалым хэла­жьэхэрэми хэхъоныгъэ ашIыным зэрэфэ­IорышIэщтым. Фестивалым гъэшIэ кIыхьэ иIэ хъунэу, актерхэм яIэпэIэсэны­гъэ хэ­зыгъэхъощт, еплъыхэрэм агукIэ аштэщт гукъэкI гъэшIэгъонхэр пхырищын­хэу сы­фэлъаIо», — къыIуагъ КъумпIыл Мурат.Евгений Мироновым IукIагъэхУФ-м инароднэ артистэу, Лъэпкъхэм ятеатрэ ихудожественнэ пащэу Евгений Мироновым АР-м и Театральнэ зэхахьэ иартистхэм зэIукIэгъу адыриIагъ. Фес­тивалым изэхэщэн къазэрэдэхъугъэмкIэ зэкIэ ащ хэлажьэхэрэм, ихьакIэхэм ыкIи ибысымхэм ар къафэгушIуагъ.— Фестивалыр къызэIузыхыгъэ къэгъэлъэгъоныр (спектаклэу «ЧIыгу Iэбжыб», Баграт Шинкубэ ироманэу «Последний из ушедших» зыфиIорэм те­хыгъ) къэпшIыныр пстэуми къахэщырэ зекIуакI. Артистхэм «тхьашъуегъэпсэу» ясэIо. Ежь фестивалыр мы тхьамафэм Мые­къуапэ щыкIощт. Нэужым Кавказым ишъолъыр, икъэлэ зэфэшъхьафхэм ­анэсыщт. Зы лъэныкъомкIэ тызэхищэщт, ащ нэмыкIэу Урысыем итеатральнэ зэпхыныгъэхэм ягъунапкъэхэр къызэIуи­хыщтых. Шъолъыр театрэхэм хэхъоныгъэхэр ашIынхэ фае. Музей экспонатхэм афэдэу ахэр цIыфхэм къащэхъу, щыIэныгъэм ыуж къинагъэхэм фэд. Фестивалыр къызэIузыхыгъэ спектаклэу тызэплъыгъэр непэрэ уахътэм дештэ. Тарихъым, лъэпкъым къырыкIуагъэм зэрафэгъэхьыгъэм изакъоми, ыкIуачIэ зэхэошIэ. ЦIыфхэр зэреплъыгъэхэм сылъыплъагъ, бзылъфыгъэхэм анэпсхэр къыгъэкIуагъэх, ахэми язакъоп… Гущы­Iэм пае, Театральнэ зэхахьэм ипащэу Ацумыжъ Рустам къышIыгъэ ролым куоу хэхьашъугъ, щыIэныгъэ псау сценэм щырихыгъ. Къэгъэлъэгъоныр къадэхъугъ, — къыIуагъ Е. Мироновым.Джащ фэдэу ежь зипэщэ театрэмкIэ Iоф зыдашIэрэ лъэныкъохэм, режиссермэ агъэфедэрэ шIыкIэ-амалхэм, актер­хэм яIэпэIэсэныгъэ зэрэхагъахъорэм Евгений Мироновыр къатегущыIагъ, щысэ гъэшIэгъонхэр къыхьыгъэх.Лениным игупчэ къыщагъэлъэгъуагъАпэрэ шъолъыр театральнэ фестивалэу «ЛъэгапIэ» зыфиIорэм ипрограммэ хэтэу Евгений Мироновым ыгъэуцугъэ спектакль-концертэу «Горькэм ирас­сказхэр» зыфиIорэр тыгъоспчыхьэ Лениным игупчэ къыщагъэлъэгъуагъ. Евгений Мироновыр ыкIи Москва икъэ­ралыгъо академическэ камернэ хор (Мининым ихор) ащ хэлэжьагъэх. Зыфэдэ къэмыхъугъэ культурнэ хъугъэ-шIэгъэ ин ар хъугъэ.АР-м и ЛIышъхьэ ипресс-къулыкъу къытырэ къэбархэмкIэ ХЪУТ Нэфсэт, Тэу Замир.