СамбэмкIэ дунэе зэнэкъокъухэр шышъхьэIум и 19-м къыщегъэжьагъэу и 22-м нэс къалэу Москва щыкIуагъэх. Мызыгъэгум ныбжьыкIэхэр ары зызыушэтыгъэхэр.
Турнирым хэлэжьагъэх Урысыем, Армением, Кыргызстан, Таджикистан ыкIи Узбекистан яспортсменхэр. УФ-м ихэшыпыкIыгъэ командэ хэтыгъэх Адыгеим илIыкIохэу Цэй АлыйрэКантемир Латоковымрэ. ТIуми ухьазырыныгъэ дэгъу къагъэлъэгъуагъ, илъэс 16 — 18 зыныбжьхэм янэкъокъугъэх. Килограмм 58-м нэс къэзыщэчыхэрэм якуп зыщызыушэтыгъэ Тэхъутэмыкъое районым щыщ Цэй Алый дышъэ медаль къыхьыгъ, ар зыгъасэрэр Джарымэкъо Рустам. КIэух едзыгъом тиспортсмен Саратовскэ хэкум щыщ Аскар Байдушевым щыIукIагъ ыкIи текIуагъ. Килограмм 79-м нэс къэзыщэчыхэрэм якуп зыщызыушэтыгъэ Кантемир Латоковым ятIонэрэ чIыпIэр къыдихыгъ, ащ финалым къыщытекIуагъ Владимирскэ хэкум щыпсэурэ Макар Барсуковыр. ТибэнакIо зыгъасэрэр Мудрэнэ Аслъан.