Кушъхьэфэчъэ спортыр зыгу рихьыхэрэр зыхэлэжьэгъэхэ Iофтхьабзэ ятIонэрэу мы мазэм зэхащагъ.
Мыр зигукъэкIыр Адыгэ Республикэм и ЛIышъхьэу КъумпIыл Мурат. Кушъхьэфэчъэ спортым-кIэ шъолъыр еджапIэмрэ АР-м физическэ культурэмкIэ ыкIи спортымкIэ и Комитетрэ изэхэщакIох.Къэралыгъом ибыракъ и Мафэ фэгъэхьыгъэ Iофтхьабзэу зэхащагъэм Адыгеим икъэлэ шъхьаIэ щыпсэухэрэм ямызакъоу, ихьакIэхэри хэлэжьагъэх, ахэм аныбжь илъэс 16-м ехъунэу щытыгъ. Мы спорт лъэпкъыр зыгу рихьыхэрэм Мыекъуапэ игупчэу «Зэкъошныгъэм» къыщырагъажьи, километрэ 18 къачъыгъ. Зызыушэтыгъэхэм япсауныгъэ зэрагъэпытагъэм дакIоу, республикэм икъэлэ шъхьаIэ иурамхэр, ичIыпIэ дахэхэр зэрагъэлъэгъугъэх, жьы къабзэ къащагъ.Iофтхьабзэм цIыф лъэпкъ зэфэшъхьафхэр зэрипхыгъэх, ахэм языкIыныгъэ ыгъэпытагъ. ТапэкIи мыщ фэдэ фестивальхэм ахэлэжьэнхэм зэрэфэхьазырхэр бэхэм къыхагъэщыгъ.