А. Гусев
Адыгеим и ЛIышъхьэу КъумпIыл Мурат терроризмэм пэшIуекIогъэнымкIэ АР-м и Комиссиерэ шъолъырым и Оперативнэ штабрэ тыгъуасэ зэдыряIэгъэ зэхэсыгъом тхьамэтагъор щызэрихьагъ.
Мэкъэтынхэр зыщыкIощтхэ мафэхэр щынэгъончъэнхэм пае анахьэу анаIэ зытырагъэтын фаехэм, гъэсэныгъэм иучреждениехэр шIэныгъэм и Мафэ зэрэфэхьазырхэм, мэхьанэшхо зиIэ инфраструктурэм епхыгъэ псэуалъэхэм якъэухъумэн, зихэхъогъухэмрэ ныбжьыкIэхэмрэ терроризмэм, экстремизмэм ахэщагъэ мыхъунымкIэ пэшIорыгъэшъ IофшIэнэу зэрахьащтхэм ащ щытегущыIагъэх.Зэхэсыгъом хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, хэбзэухъумэкIо ыкIи уплъэкIокIо-лъыплъэкIо къулыкъухэм, хэдзынхэмкIэ Гупчэ комиссием ялIыкIохэр, нэмыкIхэр.Хэдзынхэм языфэгъэхьазырын ыкIи язэхэщэн фэгъэхьыгъэу къэгущыIагъэх АР-м хэдзынхэмкIэ и Гупчэ комиссие и Тхьаматэу Сэмэгу Нурбый, хэгъэгу кIоцI IофхэмкIэ министрэу Алексей Кампф, Росгвардием АР-мкIэ и ГъэIорышIапIэ ипащэу Дмитрий Зима.УФ-м и Къэралыгъо Думэ ыкIи АР-м и Къэралыгъо Совет – Хасэм ядепутатхэм яхэдзынхэр Iоныгъом и 18 — 20-м кIощтых. Шъолъырым хэдзынхэмкIэ и Гупчэ комиссие къызэритыгъэмкIэ, УФ-м и Къэралыгъо Думэ идепутатхэм яхэдзынхэм ахэлэжьэнхэу зы мандат зиIэ хэдзыпIэ коеу N 1-мкIэ кандидати 7 зязыгъэтхыгъэр. Къэралыгъо Советым – Хасэм идепутат ихэдзынхэм ахэлэжьэнэу зыкI хэдзыпIэ коимкIэ кандидат 383-рэ, зы мандат зиIэ койхэмкIэ 102-рэ атхыгъ. Партиеу федеральнэ хэдзынхэм 10, шъолъыр хэдзынхэм 6 ахэлэжьэщт. Компанием чIыпIэ комиссиеу 9 ыкIи участковэ комиссиеу 265-рэ фагъэхьазырыгъ. Комиссиехэм ахэтхэмрэ ахэм япащэхэмрэ терроризмэм епхыгъэ щынагъо е ошIэ-дэмышIэ Iоф къэхъумэ зэрэзекIощтхэм зыщафагъэсэхэрэ Iофтхьабзэхэр афызэхащагъэх.Хэгъэгу кIоцI IофхэмкIэ Министерствэм, Росгвардием, нэмыкI хэбзэухъумэкIо къулыкъухэм ялIыкIохэм непэ Iофхэм язытет ыкIи щынэгъончъагъэм пае зэшIохыгъэ хъугъэхэр къаIуагъ.«Хэдзынхэм ыкIи илъэсыкIэ еджэгъум иапэрэ мафэ изыфэгъэхьазырын къулыкъухэм зэпхыныгъэ зэдыряIэу зэдыхэлэжьэнхэ фае. Терроризмэм епхыгъэ щынагъо къэмыхъуным, бырсыр зыпарэми къыщымытэджыным афытегъэпсыхьэгъэ пэшIорыгъэшъ IофшIэнхэр игъом зэшIохыгъэнхэм мэхьанэшхо иI. ХэбзэухъумэкIо къулыкъухэмрэ хэдзынхэмкIэ Гупчэ комиссиемрэ къыдамылъытэгъэ хъугъэ-шIагъэ къэхъумэ зэрэзекIощтхэм муниципалитетхэм япащэхэм адытегущыIэнхэ фае. Муниципалитетхэмрэ Iофым фэгъэзэгъэ къулыкъухэмрэ япащэхэм мыхэм анахьэу шъунаIэ атежъугъэт», — къыIуагъ КъумпIыл Мурат.ХэушъхьафыкIыгъэу тегущыIагъэх гъэсэныгъэм иучреждениехэр шIэныгъэм и Мафэ зэрэфэхьазырхэм. Адыгеим еджэпIи 139-рэ, кIэлэцIыкIу IыгъыпIэу 133-рэ, апшъэрэ еджэпIи 2, гурыт сэнэхьат зыщарагъэгъотэу 3 ит. АР-м гъэсэныгъэмрэ шIэныгъэмрэкIэ иминистрэу Евгений Лебедевым къызэриIуагъэмкIэ, мы уахътэм учреждениехэм щынэгъончъагъэм ищыкIагъэр зэрагъэхьазырыгъэр ауплъэкIу. Джащ фэдэу терроризмэм пэшIуекIогъэным фытегъэпсыхьэгъэ егъэджэнхэр ащызэхащэх.НыбжьыкIэхэр терроризмэм, экстремизмэм ахэщагъэ мыхъунымкIэ пэшIорыгъэшъ IофшIэнэу зэшIуахыхэрэми атегущыIагъэх. Мыекъопэ къэралыгъо технологическэ университетым ныбжьыкIэ политикэмкIэ ыкIи пIуныгъэ IофшIэнымкIэ ипроректорэу БрэнтIэ Мурат ащ фэгъэхьыгъэу доклад къышIыгъ.Джащ фэдэу Красногвардейскэ ыкIи Кощхьэблэ районхэм терроризмэм пэшIуекIогъэнымкIэ якомиссиехэм яIофшIэн къызэфахьысыжьыгъ муниципалитетитIум япащэхэм.Пстэумэ ауж КъумпIыл Мурат зихэхъогъухэмрэ ныбжьыкIэхэмрэ пэшIорыгъэшъ IофшIэнэу адашIэрэр нахь агъэлъэшынэу, социальнэ ыкIи мэхьанэшхо зиIэ инфраструктурэм епхыгъэ псэуалъэхэр къызэрэухъумагъэхэр джыри зэ ауплъэкIужьынэу пшъэрылъ къафишIыгъ.АР-м и ЛIышъхьэ ипресс-къулыкъу къытыгъэ къэбархэмкIэХЪУТ Нэфсэт.