М. Гордышов
Хабзэ зэрэхъугъэу, «Апэрэ классым кIорэм ишIухьафтын» зыфиIорэ Iофтхьабзэр Адыгеим щэкIо. АР-м и ЛIышъхьэу КъумпIыл Мурат кIэщакIо фэхъугъэу мыгъэ еджапIэм чIэхьащт кIэлэеджэкIо цIыкIухэм еджэнымкIэ ящыкIэгъэщтхэр зыдэлъ Iалъмэкъ мини 6 къащэфыгъ.
Ахэр еджапIэхэм афагощыжьынхэу муниципалитетхэм аратыгъэх. Республикэм исэу апэрэ классым кIохэрэм ямызакъоу, ахэм ялэгъоу Херсонскэ хэкум щыпсэухэрэми, пстэумкIи нэбгырэ 678-рэ мэхъух, Краснодар краим ит адыгэ къуаджэхэм яеджапIэхэм ачIэхьащт кIэлэцIыкIухэми ащ фэдэ шIухьафтынхэр афашIыщтых.«КIэлэцIыкIу зэрыс унагъохэм, анахьэу сабыибэ зыпIухэрэм, ящыкIагъэхэм тынаIэ атедгъэтыным тыпылъ. Ащ мэхьанэшхо зэриIэр Урысыем и Президентэу Владимир Путиныр кIэщакIо зыфэхъугъэ лъэпкъ проектэу «Унагъу» зыфиIорэми къегъэлъагъо. Федеральнэ хэбзэгъэуцугъэхэм къащыдэлъытэгъэ, партиеу «Единэ Россиер» кIэщакIо зыфэхъугъэ IэпыIэгъухэр зэрэпхырытщыхэрэм имызакъоу, шъолъыр фэгъэкIотэнхэм ахэгъэхъогъэным тыпылъ зэпыт. ШIэныгъэм и Мафэ ипэгъокI Iофтхьабзэр анахь ящыкIэгъэ IэпыIэгъоу, ны-тыхэм якIэлэцIыкIухэр илъэсыкIэ еджэгъум фагъэхьазырынхэмкIэ яIоф къэзыгъэпсынкIэхэрэм ащыщ», — къыIуагъ ащ фэгъэхьыгъэу Адыгеим и ЛIышъхьэу КъумпIыл Мурат.