Ацумыжъ Р. ихъарзынэщ.
Неущ къыщегъэжьагъэу мазэм ыкIэ нэс Мыекъуапэ Урысыем и Къыблэ театральнэ щыIакIэ игупчэ хъущт. Шъолъыр театральнэ фестивалэу «ЛъэгапIэ» («Вершина») зыфиIорэр щыкIощт.
Тихэгъэгу щызэлъашIэрэ театральнэ купхэр фестивалым хэлэжьэщтых. Iофтхьабзэр зэрэкIощтыр къедгъэIотагъ УФ-м итеатральнэ IофышIэхэм я Союз икъутамэу Адыгеим щылажьэрэм итхьаматэу, АР-м и Театральнэ зэхахьэ ипащэу Ацумыжъ Рустам.— Рустам, шъолъыр театральнэ фестивалэу «ЛъэгапIэ» зыфиIорэм иIофшIэн неущ ыублэщт. Хэта ащ икIэщакIор?— АР-м и ЛIышъхьэу КъумпIыл Мурат IэпыIэгъу къытфэхъу. Урысые политическэ партиеу «Единэ Россием» ишъолъыр къутамэ иIэпыIэгъукIэ шышъхьэIум Мыекъуапэ фестивалышхоу «ЛъэгапIэ» зыфиIорэр щыкIощт. Евгений Мироновым лъэпкъхэм я Театрэу зэхищагъэм тыдэлажьэзэ фестивалыр редгъэкIокIыщт.
— ЗэкIэмкIи нэбгырэ тхьапша хьакIэу фестивалым къекIолIэщтыр?— КъызэрэтлъытагъэмкIэ, нэбгырэ 700 — 800 фэдиз.— Сыд пшъэрылъа проектым иIэр?— Фестивалым пшъэрылъ шъхьаIэу иIэр урыс театрэхэмрэ лъэпкъ театрэхэмрэ зэдигъэлэжьэнхэр ары. ПроектыкIэм хэгъэгум икъэлэ зэфэшъхьафхэм ятеатрэхэм яспектаклэхэр зэрипхыщтых, джырэ искусствэм, Урысыем итеатральнэ щыIакIэ Кавказым чIыпIэу щиубытырэм щатегущыIэщтых.— Лъэпкъхэм я Театрэ сыд фэдэ къэгъэлъэгъона къышIыщтыр?— Урысые Федерацием инароднэ артистэу, Урысыем икъэралыгъо шIухьафтын тIогъогогъо зыфагъэшъошагъэу, «Лъэпкъхэм я Театр» зыфиIорэм ихудожественнэ пащэу Евгений Мироновым фестивалыр къызэIуедгъэхыщт. ШышъхьэIум и 24 — 30-м мафэ къэс, къэгъэлъэгъонхэр щыIэщтых. Евгений Мироновым имоноспектаклэ апэ къытыщт, ащ игъусэщт Юрий Башмет зыдэлэжьэрэ ныбжьыкIэ симфоническэ оркестрэр. Нэбгырэ 45-рэ зыхэхьэрэ хорыр ахэм акIыгъущт. Культурэм ылъэныкъокIэ хъугъэ-шIэгъэ инэу ар хъущт. Шъолъырхэм къарыкIыщт театрэхэм къэгъэлъэгъонхэр къатыщтых. Театральнэ зэхахьэм ыкIи «Налмэсым» иконцерт къэтыпIэ спектаклэ щырыщ ащыкIощт. Москва къикIыхэу театральнэ критик цIэрыIохэр къедгъэблэгъэщтых, ахэм къэгъэлъэгъонхэм уасэ къафашIыщт.— АР-м и Театральнэ зэхахьэ Iофтхьабзэм хэлэжьэщта?— Къэралыгъом испектаклэ анахь дэгъу 30-мэ ясатырэ ахэтэу, режиссерэу Константин Мишиным ыгъэуцугъэ спектаклэу «ЧIыгу Iэбжыбыр» АР-м и Лъэпкъ театрэ урысыбзэкIэ къыгъэлъэгъощт. «ЧIыгу Iэбжыб» зыфиIорэ къэгъэлъэгъонэу Баграт Шинкубэ итхыгъэкIэ дгъэуцугъэр убыххэм якIодыкIэ фэгъэхьыгъ — ар лъым щыщ тарихъ. Ащ ыкIуачIэ лъэш дэд. ЗэхэмышIэн, гум нэмысын, уизэхашIэ къымыгъэущын ылъэкIыщтэп. Джэнджэш хэмылъэу, псэ хэт мы къэгъэлъэгъоным. А псэр къэбгъэущын фае. Ар артистым ипшъэрылъ. Лъэпкъ театрэм спектаклэр къыдэхъугъ.— Джыри сыд фэдэ спектакла къагъэлъэгъощтхэр?— Зэнэкъокъушхом къыхэхыгъэ анахь IофшIэн дэгъухэр фестивалым хэхьагъэх. Альметьевскэ къэндзал драматическэ театрэм, Березниковскэ, Заречнэм, Новокузнецкэ, Набережные Челны ядраматическэ театрэхэм фестивалым спектаклэхэр къыщагъэлъэгъощт.— Мыщ фэдэ фестивалым сыда шъолъырымкIэ мэхьанэу иIэр?Евгений Мироновым фэдэ артист цIэрыIор Адыгеим къызеблагъэкIэ, сыда шIуагъэу къыфихьырэр?— Мыщ фэдэ лъэгапIэ зиIэ фестивалыр Адыгеим щырагъэкIокIыным мэхьанэшхо иI. Къэралыгъо телеканал шъхьаIэмэ Адыгеим щыкIогъэ фестивалым икъэбар къатыщт, ти Хэгъэгу щыпсэурэ лъэпкъ зэфэшъхьафхэм тызэлъашIэщт, искусствэм щыцIэрыIохэр къытищэлIэщтых. ГущыIэм пае, Урысыем инароднэ артистэу, театральнэ институтэу Б. Щукиным ыцIэ зыхьырэм иректорэу Евгений Князевыр къызетэгъэблагъэм, Театральнэ зэхахьэмрэ Союзымрэ пытэу тызэрэзэпхыгъэр, тызэрэзэдэлажьэрэр къылъэгъугъ, уасэ фишIыгъ. Константин Райкиныр, Евгений Мироновыр, Сергей Безруковыр ыкIи нэмыкIхэр республикэм къэкIогъагъэх ыкIи мастер-классхэр зэхащэгъагъ. Ахэм яфэмэ-бжьымэшIу къытемыхьанэу хъугъэп республикэм икультурэ.— Фестивалыр тишъолъыр закъуа зыщырекIокIыщтыр?— КъекIокIырэ фестивалыр хэгъэгум ичIыпIэ зэфэшъхьафхэм ащыкIощт: илъэс къэс Кавказым икъэлакIэ горэ къызэIуихыщт. Театральнэ искусствэм хэхъоныгъэ ышIынымкIэ программэм дэлэжьэрэ Евгений Мироновым проектым зыригъэушъомбгъущт. ЦIыфэу ахэм яплъыщтхэр, артистхэр, режиссерхэр, театроведхэр, критикхэр ыкIи театральнэ сэнэхьатым епхыгъэхэр Iофтхьабзэм зэрищэлIэщтых.— Республикэм итеатральнэ искусствэ тапэкIэ хэхъоныгъэ ышIыным фэшI сыда шъуздэлажьэрэр?— Театрэм гъэхъэгъэшIухэр ышIынхэшъ, тызэлъашIэным тыфэлажьэ. IофшIэным екIолIакIэхэр къыфигъотынхэ ылъэкIын, проектыкIэ ямышIыкIэхэр ыгъэцэкIэнхэ фае. СпектаклыкIэхэр репертуарым хэдгъэхьанхэм, артист, режиссер, сценарист ныбжьыкIэхэм зыкъызэIуахын амал яIэным тынаIэ тетэгъэты. Мары искусствэхэмкIэ колледжыр къэзыухыгъэ кIэлэ ныбжьыкIитIу Москва щеджэх. Титеатрэхэр искусствэм ишапхъэхэмкIэ зэнэкъокъунхэу, творческэ гъэхъагъэхэр ашIынхэу, кIэ горэм фэблэ зэпытынхэу тыфай. А пстэуми Адыгеим иискусствэ, икультурэ хахъохэр фашIыщт, лъэгэпIэ зэфэшъхьафхэм джыри анэсыщтых.Лъэпшъыкъо Фатим.