Нэхэе Р.
Спорт бэнэнымкIэ дунэе зэнэкъокъоу къалэу Братиславэ щыкIорэм зыныбжь илъэс 20-м емыхъугъэхэр хэлажьэх. КIэух едзыгъохэм яящэнэрэ мафэ Урысыем ихэшыпыкIыгъэ командэ хэтхэм хагъэунэфыкIырэ чIыпIи 4 къыщахьыгъ. Ахэм ащыщэу Адыгэ Республикэм ибэнакIоу Нэхэе Рэмэзан дышъэ медаль къыфагъэшъошагъ. Адыгеим и ЛIышъхьэу КъумпIыл Мурат спортсменым ыкIи ар зыгъэсэхэрэ ЦIэгъошIу Адамрэ Асэкъэлэ Рустамрэ афэгушIуагъ, тапэкIи текIоныгъакIэхэм афэкIонхэу, лъэгэпIэ инхэм анэсынхэу афэлъэIуагъ.
Нэхэе Рэмэзан дунаим ипервенствэ ипэублэ къыщегъэжьагъэу дэгъу дэдэу зыкъыгъэлъэгъуагъ. Болгарием щыщ Мартин Шишековым, Европэм ипервенствэ хагъэунэфыкIырэ чIыпIэ къыщыдэзыхыгъэ Венгрием илIыкIоу Саболч Иштван Синай ыкIи Чехием испортсменэу Петр Зака атекIуагъ. ЗэIукIэгъуищымкIэ пчъагъэр – 33:5. Финалныгъом тиспортсмен Азием ичемпионэу, Иран къэзыгъэлъэгъогъэ Алирез Мохаммад Хосейни щыIукIагъ, ащи 5:1-у къышIуихьыгъ.
КIэух едзыгъом Рэмэзан зэбэныгъэр дунаимрэ Европэмрэ гъогогъу пчъагъэрэ текIоныгъэр ыкIи хагъэунэфыкIырэ чIыпIэхэр къащыдэзыхыгъэ белорус спортсменэу Кирилл Валевскэр ары. ЗэIукIэгъур гъэшIэгъонэу, узIэпищэу кIуагъэ, текIоныгъэр къыдэзыхыщтыр къэшIогъоягъ. Арэу щытми, Нэхаир нахь лъэшыгъ, зэфэхьысыжьыр 3:1 — дышъэ медаль.Джащ фэдэу Рэмэзан нэмыкIэу Урысыем ихэшыпыкIыгъэ командэ хэт бэнэнымкIэ Тэхъутэмыкъое еджапIэм илIыкIоу Шъэумыз Амир. Джырэ уахътэм ехъулIэу первенствэм изэфэхьысыжьхэмкIэ, Урысыем ибэнакIохэм командэ зэнэкъокъум пэрытныгъэр щаубытыгъ. Ащ республикэм испортсмен ныбжьыкIэхэм яIахьышIу зэрэхэлъым тырэгушхо.