Цэй З.
УФ-м и Къэралыгъо Думэ ыкIи Адыгэ Республикэм и Къэралыгъо Совет — Хасэм ядепутатхэм яхэдзынхэм ахэлэжьэщтхэм япхыгъэ къэбархэр, къэтынхэр къызыщатыщт уахътэр зыщагъэнэфэгъэ пхъэдз АР-м хэдзынхэмкIэ и Гупчэ комиссие щызэхащагъ.
Телерадиокомпаниеу «Адыгеир», «Мыекъопэ телевидениер», республикэ гъэзетхэу «Адыгэ макъэр», «Советскэ Адыгеир» ащ хэлэжьагъэх. ЫпкIэ хэмылъэу эфир уахътэр зэрагощыщтыр ыкIи гъэдэIон къэбархэр гъэзетхэм къызырагъэхьащт уахътэр пхъэдзкIэ агъэнэфагъэх. Партиехэм ялIыкIохэр, депутат хъу зышIоигъохэр, пхъэдзым къемыкIолIэшъугъэхэм ацIэкIэ ахэм яуполномоченнэхэр, цыхьэшIэгъухэр зымыгъэнэфагъэхэм ыкIи пхъэдзым хэмылэжьэшъугъэхэм ачIыпIэкIэ хэбзэгъэуцугъэм къыдилъытэрэ шапхъэхэм адиштэу хэдзынхэмкIэ Гупчэ комиссием илIыкIохэр хэдагъэх.Телевидениехэм ыкIи радиом ащагъэнэфэгъэ уахътэм хэдзынхэм ахэлажьэхэрэр къякIолIэнхэшъ, япрограммэ цIыфхэр щагъэгъозэщтых. Гъэзетхэм къарыхьанхэм фэшI, хэбзэгъэуцугъэм диштэу, къызыхаутынэу агъэнэфэгъэ уахътэм ыпэкIэ мэфищ иIэу республикэм щыпсэухэрэм алъагъэIэсы ашIоигъо къэбарыр къарахьылIэнэу щыт.Цэй Замир.