А. Гусев
Адыгеим и ЛIышъхьэу КъумпIыл Мурат УФ-м IэкIыб IофхэмкIэ и Министерствэ илIыкIоу, къалэу Краснодар щыIэ чIыпIэ къулыкъум ипащэу Ольга Шалимовам АР-м и Правительствэ зычIэт Унэм зэIукIэгъу щыдыриIагъ.
Ащ хэлэжьагъэх АР-м и ЛIышъхьэ IэкIыб зэпхыныгъэхэмкIэ ыкIи инвестицие политикэмкIэ иIэпыIэгъоу Хьакъунэ Бэллэ, УФ-м IэкIыб IофхэмкIэ и Министерствэ и ЛIыкIо IофшIапIэу Краснодар щыIэм иупчIэжьэгъоу Игорь Терзиян.ЛъэныкъуитIур шъолъырым иIэкIыб сатыушIын изегъэушъомбгъун, республикэм иэкономикэ ипроектхэм япхырыщын IэкIыб инвесторхэр нахьыбэу къыхэгъэлэжьэгъэнхэм, гуманитар дунэе зэпхыныгъэхэм, пстэумэ апэу адыгэ диаспорэм дыряIэм, язегъэушъомбгъун япхыгъэ Iофыгъохэм атегущыIагъ.
Адыгеим и ЛIышъхьэ зэIукIэгъур къызэIуихызэ, хэгъэгум и Президентэу Владимир Путиным продукциер IэкIыбым агъэкIонымкIэ амалэу яIэхэм нахь зарагъэушъомбгъунэу пшъэрылъ къызэрафигъэуцурэр къыхигъэщыгъ. Ащ фэшI лъэпкъ проектэу «Дунэе кооперациемрэ экспортымрэ» зыфиIорэм къыщыдэлъытэгъэ федеральнэ IэпыIэгъу пстэур республикэм щагъэфедэ, бизнесым зэрэдеIэщт шIыкIэхэм етIупщыгъэу ахагъахъо.«Шъолъырым ибизнес иIофхэр нахьышIу хъунхэм сыдигъокIи ыуж тит, предпринимательхэм Iэрыфэгъу IофшIэкIэ амалхэр яIэнхэм тыпылъ. Бизнес цIыкIум ыкIи гурытым IэпыIэгъу ятыгъэнымкIэ лъэпкъ проектхэр, къэралыгъо программэхэр тэгъэфедэх, къыдэгъэкIыным фытегъэпсыхьэгъэ площадкэхэр тэгъэхьазырых, ятэтых, экономикэм илъэныкъо шъхьаIэхэмрэ мэкъумэщ хъызмэтымрэ субсидиехэр нахьыбэу афэкIонхэм тыдэлажьэ. А зэпстэур IэкIыбым дгъэкIощт продукциеу къыдэдгъэкIырэр нахьыбэ хъуным фэIорышIэ», — къыIуагъ КъумпIыл Мурат.АР-м и ЛIышъхьэ къызэрэхигъэщыгъэмкIэ, IэкIыбым продукциер нахьыбэу агъэкIонымкIэ УФ-м и Правительствэ, Урысые экспортнэ Гупчэр лъэшэу IэпыIэгъу къафэхъух. УФ-м IэкIыб IофхэмкIэ и Министерствэ и ЛIыкIо IофшIапIэу Краснодар щыIэр IэкIыб къэралхэм Iоф ащызышIэрэ лIыкIо IофышIэхэм зэпхыныгъэ адашIынымкIэ къадеIэ, IэкIыбым къикIыгъэ инвесторхэм Iофтхьабзэхэр адызэхащэнхэм къыхэлажьэ. А зэпстэуми яшIуагъэкIэ Адыгеим ихъызмэтшIапIэхэм IэкIыбым сатыу щашIынымкIэ амалэу яIэм хэхъо, IэкIыб инвестициехэр къыхэлъхьагъэ хъунымкIи ащ ишIуагъэ къэкIо.ЗэIукIэгъум къызэрэщыхагъэщыгъэмкIэ, санкциехэмкIэ тихэгъэгу къытеIункIэхэ нахь мышIэми, республикэм ипредпринимателэу IэкIыб бэдзэршIыпIэхэм чIыпIэ ащызыубытыхэрэм япчъагъэ хэхъо. Гъомылапхъэхэр, машинэшIыным ищыкIагъэхэр, бытовой химиер, пхъэм хэшIыкIыгъэ товархэр ары нахьыбэу IэкIыбым щыIуагъэкIыхэрэр. Тыркуер, Абхъазыр, Азербайджан, Казахстан къэралыгъоу зибэдзэршIыпIэ нахь аубытыгъэр.Ольга Шалимовам Адыгеим шъолъырхэм зэпхыныгъэу адыриIэм игъэпытэн ыкIи изегъэушъомбгъун епхыгъэ Iофышхо зэришIэрэм къыкIигъэтхъыгъ. Мыщ дэжьым Адыгеимрэ УФ-м IэкIыб IофхэмкIэ и Министерствэрэ дунэе гуманитар ыкIи социальнэ-культурнэ зэдэлэжьэныгъэм ылъэныкъокIэ Iофышхо зэрэзэдашIэрэм игугъу къыщашIыгъ. Адыгеим итворческэ купхэр IэкIыб площадкэхэм ащызэлъашIэх, IэкIыб IофшIэгъухэм шIэныгъэм ыкIи гъэсэныгъэм япхыгъэ проектхэр адыпхырыщыгъэнымкIэ республикэм амалышIухэр IэкIэлъ. Тилъэпкъэгъоу IэкIыбым щыIэхэм анахьэу зэпхыныгъэ адыряI.ЗэIукIэгъум хэлэжьагъэхэм лъэныкъоу зигугъу ашIыгъэхэмкIэ яIофшIэн лъагъэкIотэнэу, лъэпкъ проектэу «Дунэе кооперациемрэ экспортымрэ» зыфиIорэм къыщыдэлъытагъэхэр республикэм щыпхырыщыгъэнымкIэ зэдэлэжьэнхэу зэдаштагъ.АР-м и ЛIышъхьэ ипресс-къулыкъу къытырэ къэбархэмкIэХЪУТ Нэфсэт.