Е. Антошкин
Урысыем иошъогу Флот, парашютистхэм, Урысыем испорт авиацие загъэпсыгъэр илъэси 100 зэрэхъурэм ямафэхэм афэгъэхьыгъэу Мыекъуапэ иаэродромэу Октябрьскэм пчъэ зэIухыгъэм имафэ щыкIуагъ. Iофтхьабзэр мэфэкI шIыкIэм тетэу рекIокIыгъ. ЗэхэщакIохэм чIыпIэ авиацием итарихъ хэхьагъэхэм ацIэхэр къараIуагъэх, агъэшIуагъэх.
Аэроклубым иветеранхэу, тыгъи, уаи ямыIэу илъэс пчъагъэрэ аэродромым щылэжьагъэхэм щытхъу тхылъхэр аратыгъэх. Ахэм ахэтых клубым иIофышIэхэу непи ныбжьыкIэхэм уашъом гъогу къафызэIузыхырэ гъэсакIохэр.Нэужым организацие пэпчъ иIофшIагъэхэр къыгъэлъэгъуагъ. КъухьэлъатэмкIэ ыкIи парапланымкIэ дэбыбыягъэх ыкIи къэтIысыжьыгъэх. Ащ нэмыкIэу кIэлэцIыкIухэм ыкIи пшъэшъэжъыехэм пкъыгъохэр радиомкIэ агъэIорышIэзэ агъэбыбыгъэх. Дзэ егъэджэн гупчэм иинструкторхэр ягъусэхэу Iэмэ-псымакIэхэр зэрагъэлъэгъугъэх, ошъогур къэзыухъумэхэрэр ащ зэрэфагъэхьазырыхэрэр къафаIотагъ.МэфэкI Iофтхьабзэм анахьэу анаIэ зыщытырагъэтыгъэхэр ветеран парашютистхэр ары. Ошъогум къызэрепкIэхыгъэ пчъагъэхэмкIэ, ягукъэкIыжьхэмкIэ ахэр къэзэрэугъоигъэхэм къадэгощагъэх.Мыекъопэ аэроклубым ипащэу Евгений Антошкиным къызэриIуагъэмкIэ, хабзэ афэхъугъэу, СССР-м илъэхъан къыщыублагъэу авиацием и Мафэ хагъэунэфыкIы. Мыекъуапэ щыпсэухэрэм ыкIи республикэм ихьакIэхэм къухьэлъэтэ уцупIэхэр къаплъыхьагъэх, кабинэм ыкIоцI зыфэдэр зэрагъэлъэгъугъ, сурэтхэр зытырахыгъэх, пилотым къыIуатэрэм едэIугъэх. Бэмэ амал яIагъ зыкIэхъопсыхэрэр нэфапIэ афэхъунэу, къэлэпчъэ инымкIэ къэшIыхьэгъэ аэродромым щыхъурэр анэкIэ алъэгъунэу.— Пчъэ зэIухыгъэм имафэ къэгъэлъэгъон къодыеу щымытэу, хэгъэгу авиациеу ыпэкIэ щыIагъэм ыкIи непэрэм ялъэмыдж хъугъэ. Илъэсыбэрэ авиацием щылэжьэгъэ ветеранхэмрэ апэрэу быбыгъэ курсант ныбжьыкIэхэмрэ мы Iофтхьабзэм зэфищагъэх, — къыIуагъ Евгений Антошкиным.КIАРЭ Фатим.