ПIалъэхэм адиштэу IофшIэнхэр лъагъэкIуатэх

Непэ Адыгеим и ЛIышъхьэу КъумпIыл Мурат шъолъырхэм хэхъоныгъэ ягъэшIыгъэнымкIэ правительственнэ комиссием ипрезидиум изэхэсыгъо хэлэжьагъ. Видеозэпхыныгъэ шIыкIэм тетэу ар зэрищагъ Урысыем и Правительствэ и Тхьаматэ игуадзэу Марат Хуснуллиным. Iофтхьабзэм хэлэжьагъэхэр 2026 — 2027-рэ илъэсхэм ябжыхьэ-кIымэфэ уахътэ изыфэгъэхьазырын тегущыIагъэх.

Урысыем и Правительствэ и Тхьаматэ игуадзэ зэхэсыгъор къызэIуихызэ, псэу­пIэ-коммунальнэ хъызмэтым ипсэуалъэ­хэр кIымэфэ уахътэм фэгъэхьазырыгъэн­хэм епхыгъэ IофшIэнхэр игъом зэшIохыгъэнхэр шIокI зимыIэ Iофэу зэрэщытым къыкIигъэтхъыгъ.«Унэхэр зыщагъэфэбэрэ уахътэм зыфэгъэхьазырыгъэнымкIэ IофшIэнхэр лъыгъэкIотэгъэнхэ фае. ПсэупIэ-ком­мунальнэ хъызмэтым ипсэуалъэхэм зыпкъ итэу Iоф ашIэнымкIэ, къызэтемыуцохэу цIыфхэм фабэр аратынымкIэ ищыкIа­гъэр игъом гъэцэкIэгъэн фае. Шъолъырхэм япащэхэм ежьхэм ашъхьэкIэ ащ анаIэ тырагъэтынэу, гъэстыныпхъэ пытэри икъоу аIэкIагъэхьанэу, мы Iофым фэгъэ­зэгъэ къулыкъухэм псэупIэ-коммунальнэ хъызмэтым ипсэуалъэхэр кIымафэм зэрэфагъэхьазырхэрэм лъыплъэнхэу, гухэлъхэр пхырыщыгъэнхэм фэшI шIуагъэ къэзытырэ шIыкIэу нахьыпэкIэ гъэ­федагъэ хъугъэхэр джыри IофшIэным хагъэхьанхэу закъыфэсэгъазэ», — къы­Iуагъ Марат Хуснуллиным.КъумпIыл Мурат зэхэсыгъом Iофыгъоу къыщаIэтыгъэхэр, коммунальнэ инфраструктурэм зыпкъ итэу Iоф ышIэным фытегъэпсыхьэгъэ пшъэрылъэу къагъэнэфагъэхэр анахь шъхьаIэу анаIэ зытетын фаехэм зэращыщхэр къыхигъэщыгъ. Ащ фэшI псэупIэ-коммунальнэ хъызмэтым ыкIи социальнэ лъэныкъом япхыгъэ псэуалъэ­хэр, унэхэр зыщагъэфэбэрэ уахътэу къэблагъэрэм фэгъэхьазырыгъэнхэмкIэ зэшIуахыщтхэм яплан Адыгеим ща­штагъ. Ащ къызэрэщыдэлъытагъэмкIэ, котельнэ 260-рэ, фабэр къэзытырэ пунктэу 25-рэ, ащ ирыкIуапIэу километрэ 288-рэ, гъэстыныпхъэ шхъуантIэм ирыкIуапIэу километрэ 4500-м ехъу, псыкъычIэщыпIэу 276-рэ, псы къабзэм ыкIи шIоим ярыкIуапIэу километрэ 2700-м нахьыбэ бжыхьэ-кIымэфэ уахътэм фагъэхьазырыщт. Джащ фэдэу пхъэ, шIомыкI зыфэпIощт гъэстыныпхъэу чэщ-зымэфэ 45-м телъытагъэр зищыкIагъэхэм аIэкIэгъэ­хьэгъэн фае.Муниципалитетхэм ыкIи мы лъэны­къом фэгъэзэгъэ къулыкъухэм япащэхэм псэупIэ-коммунальнэ хъызмэтым ипсэуалъэхэм ягъэхьазырынкIэ IофшIэнхэр нахь агъэлъэшынхэу, гъэстыныпхъэ шхъуантIэр, электричествэр, фабэр къы­зэтегъэнэгъэнхэм афэшI, оборудование­хэм ягъэкIэжьын фытегъэпсыхьэгъэ Iофтхьабзэу «ЩыIэныгъэм пае инфраструктурэр» зыфиIорэ лъэпкъ проектым къыщыдэлъытагъэхэр лъагъэкIотэнхэу пшъэрылъ афашIыгъ. Анахьэу социа­льнэ лъэныкъом епхыгъэхэм анаIэ атырагъэ­тын фае.КъумпIыл Мурат къызэрэкIигъэтхъыгъэмкIэ, IофшIэнхэр пIалъэхэм адиштэу лъагъэкIуатэх. Мэкъуогъу мазэм къыщегъэжьагъэу ащ фэгъэзэгъэ комиссием къалэхэмрэ районхэмрэ Iоф ащешIэ, Ростехнадзорым Темыр КавказымкIэ и ГъэIорышIапIэ илIыкIохэри ащ къыхэлажьэх, хэукъоныгъэхэм ядэгъэзыжьын лъэплъэх. ШэкIогъум и 15-м шIомыкIэу унэхэм ягъэфэбэн зэрэфэхьазырхэр къэзыушыхьатырэ тхылъхэр муниципальнэ образованиехэм аIэкIэлъынхэ фае.«ПсэупIэ-коммунальнэ комплексым иIофшIэн уахътэм диштэу гъэкIэжьыгъэ­нымкIэ ищыкIагъэр зэкIэ тиI, УФ-м и Правительстви IэпыIэгъу къытфэхъу. Муниципалитет пэпчъ унэхэм ягъэфэбэн зызэрэфигъэхьазырырэм пхъашэу тылъы­плъэщт. Iофым хэхъухьан ылъэкIыщт пстэури къыдэлъытэгъэн, гумэкIыгъо къэмыхъуным, унэхэр зыщагъэфэбэрэ уахътэм псэупIэ-коммунальнэ хъызмэтым ипсэуалъэхэр къэмыуцунхэм зафэдгъэхьазырын фае», — къыIуагъ Адыге­им и ЛIышъхьэ.АР-м и ЛIышъхьэ ипресс-къулыкъу къытырэ къэбархэмкIэХЪУТ Нэфсэт.