Урысыем и Къэралыгъо быракъ и Мафэ тефэу кушъхьэфэчъэ спортыр зыгу рихьыхэрэр зыхэлэжьэщтхэ Iофтхьабзэ Мыекъуапэ щырагъэкIокIыщт. Ащ кIэщакIо фэхъугъ АР-м физическэ культурэмкIэ ыкIи спортымкIэ и Комитет.
Спорт мэфэкIыр пчэдыжьым сыхьатыр 6-м рагъэжьэщт. Ащ хэлэжьэщтхэм ятхын Мыекъуапэ игупчэу «Зэкъошныгъэм» (мэщытым дэжь) сыхьатыр 5-м щаублэщт.Зыныбжь илъэс 16-м нэсыгъэхэр мыщ хэлэжьэнхэ алъэкIыщт. ЗэхэщакIохэм анахьэу анаIэ зытырагъэтырэр щынэгъончъэным ишапхъэхэр гъэцэкIэгъэнхэр ары. Ащ къыдыхэлъытагъэу зызыушэты зышIоигъохэм шъхьэр зыухъумэрэ пкъыгъор (шлемыр) ыкIи техническэу шапхъэхэм адиштэрэ кушъхьэфачъэр агъэфедэнхэ фае.Гъогууанэр урамхэу Пионерскэм, Пролетарскэм, Краснооктябрьскэм ыкIи М. Горькэм ыцIэ зыхьырэм апхырыкIыщт.