ДзюдомкIэ Континентальнэ лигэм иедзыгъо зыкъыщызыгъэлъагъохэу «Кавказ» зыфиIорэ дивизионым хэтхэм язэнэкъокъу Мыекъуапэ щыкIуагъ. ДзюдомкIэ Мыекъопэ еджапIэм икомандэ ащ ятIонэрэ щыхъугъ.
Зэнэкъокъум хэшыпыкIыгъэ нэшанэ иIагъ. Финалым нэсырэ командэхэр къыкIэлъыкIощт едзыгъом хэлэжьэщтых. Ащ фэбэнэнхэу Адыгеим къеблэгъагъэх Ингушетием, Къэбэртэе-Бэлъкъар, Чэчэн республикэхэм, Темыр Осетием, Краснодар ыкIи Ставрополь крайхэм яспортсмен анахь лъэшхэр.Зэнэкъокъум ишапхъэхэмкIэ, команднэ зэIукIэгъухэр ашIых. Бэнэгъуищ къэзыхьырэ купым текIоныгъэр къыдехы.«Дзюдор зыщагъэлъэпIэрэ республикэмкIэ мы зэнэкъокъур мэфэкI шъыпкъэу зэрэхъугъэр нафэ. ТикIалэхэми тыкъагъэукIытэжьыгъэп. ДзюдомкIэ Мыекъопэ еджапIэм зыщызыгъасэхэрэм ухьазырыныгъэ дэгъу къагъэлъэгъуагъ. Шъачэ къикIыгъэ «Жемчужинэм» 3:1-у тикомандэ текIуагъ. Чэчэн Республикэр къэзыгъэлъэгъогъэ «Эдельвейсым» 3:0-у къышIуихьыгъ. Финалым тикIалэхэм «Ставрополыр» къатекIуагъ. Ау тибэнакIохэм гъэхъагъэ зэрашIыгъэм щэч хэлъэп», – къащитхыгъ Адыгэ Республикэм и ЛIышъхьэу КъумпIыл Мурат исоциальнэ нэкIубгъохэм.Тыжьын медалым Адыгеим икомандэ зэнэкъокъур лъигъэкIотэн амал къыритыгъ. Бжыхьэм Континентальнэ лигэм ифинал Москва щыкIощт. Ащ тибэнакIохэр хэлэжьэщтых.«ДзюдомкIэ Мыекъопэ еджапIэр — Адыгеир къызэрашIэжьыхэрэм ащыщ. Ащ изыкъегъэIэтын дэлэжьэгъэ тинахьыжъхэми, гъэхъагъэ къытфэзыхьыгъэ спортсменхэми, тренерхэми тарэгушхо. Ахэм къакIэлъыкIогъэ ныбжьыкIэхэри лъэгэпIэ инхэм анэсынэу сафэлъаIо», — къыхегъэщы КъумпIыл МуратЦэй Замир.