Урысыем щыпсэурэ лъэпкъхэм я Спартакиадэ къыдыхэлъытагъэу атлетикэ онтэгъумкIэ зэнэкъокъухэр Свердловскэ хэкум икъалэу Верхняя Пышма щыкIуагъэх. Адыгэ Республикэм ыцIэкIэ Iофтхьабзэм хэлэжьагъэх спортымкIэ мастерэу Бзэсэжъ Аслъанрэ (Кощхьэблэ район) Яна Сотиевамрэ (Тэхъутэмыкъое район).
Спортсмен 225-рэ медальхэм афэбэнагъ. Килограмм 65-м нэс къэзыщэчыхэрэм якуп зыщызыушэтыгъэ Бзэсэжъ Аслъан екIолIэгъуитIум килограмм 272-рэ къыIэтыгъ ыкIи ящэнэрэ чIыпIэр къыдихыгъ. ЯтIонэрэ хъугъэ Санкт-Петербург щыщ Рамиль Джафаровым тиспортсмен ыуж къызэринагъэр зы килограмм ныIэп. Краснодар краир къэзыгъэлъэгъогъэ Альберт Шарковым килограмм 283-рэ къыIэтыгъ ыкIи текIоныгъэр къыдихыгъ.
Яна Сотиевами тигъэгушIуагъ. Ар килограмм 86-м нэс къэзыщэчыхэрэм якуп хэтыгъ ыкIи зэнэкъокъум ивице-чемпионкэ хъугъэ. Ари текIоныгъэр къыдихынымкIэ зы килограмм зыщыкIагъэр. Белгородскэ хэкум испортсменкэу Мария Груздоваям пэрытныгъэр ыубытыгъ. Ащ килограмм 239-рэ къыIэтыгъ, Янэ – килограмм 238-рэ.Тиспортсменхэм ыкIи ахэм ятренерхэу Сихъу Аслъанрэ Роман Казаковымрэ тафэгушIо, тапэкIи мыщ фэдэ гъэхъэгъэшIухэр ашIынхэу афэтэIо.