Урысыем щыпсэурэ лъэпкъэхэм яятIонэрэ Спартакиадэ хэлажьэ гандболымкIэ бзылъфыгъэ командэу «АГУ-Адыифыр». Зэнэкъокъур шышъхьэIум и 16-м Самарскэ хэкум икъалэу Тольятти щырагъэжьагъ, шышъхьэIум и 25-м нэс кIощт. ЕшIэгъухэр спорт комплексэу «Олимпым» щэкIох.
Суперлигэм ыкIи Апшъэрэ лигэм ахэт командэхэр ары шъолъырхэм яхэшыпыкIыгъэ купхэр къэзыгъэпсыгъэхэр. Урысыем гандболымкIэ и Федерацие ирейтинг анахь ин зиIэ командэ 12 бзылъфыгъэ турнирым хэлажьэ: Москва, Астраханскэ хэкур, Краснодарскэ ыкIи Ставропольскэ крайхэр, Удмуртиер, Адыгеир, Санкт-Петербург, Ростовскэ, Самарскэ, Московскэ, Волгоградскэ хэкухэр, Башкортостан. Ахэр купитIоу гощыгъэх. Адыгеир зыхэтым хахьэх Астраханскэ хэкур, Москва, Краснодар краир, Санкт-Петербург ыкIи Республикэу Удмуртиер.Апэрэ турым Адыгеимрэ Краснодар краимрэ щызэIукIагъэх, пчъагъэр 25:28-у тикомандэ ешIэгъур шIуахьыгъэми, узIэпищэу джэгугъэ, текIоныгъэм фэбэнагъ. Типшъашъэхэм къахэщыгъ гъогогъуихэ къэлапчъэм Iэгуаор дэзыдзэгъэ Дарина Никулинар. ГухэкI нахь мышIэми, тигандболисткэу Стефания Белолипецкаям шъобж къытаращагъ, ипсауныгъэ изытет псынкIэу зэтыригъэуцожьынэу ащ тыфэлъаIо.Апэрэ турым изэфэхьысыжьхэр:Москва – Республикэу Удмуртиер – 42:21 (22:12), Ростовскэ хэкур – Волгоградскэ хэкур – 34:27 (17:14), Астраханскэ хэкур – Санкт-Петербург – 45:24 (22:8), Самарскэ хэкур – Республикэу Башкортостан – 40:21 (18:7), Краснодарскэ краир – Республикэу Адыгеир – 28:25 (14:12), Московскэ хэкур – Ставропольскэ краир – 38:24 (19:13).Урысыем щыпсэурэ лъэпкъхэм я Спартакиадэ къэралыгъом испортсмен анахь лъэшхэр хэлажьэх. Iофтхьабзэр шышъхьэIум къыщегъэжьагъэу чъэпыогъум нэс шъолъыри 7-мэ ащырагъэкIокIыщт. Къэралыгъо программэу «Урысыем испорт» зыфиIорэм игъэцэкIэн къыдыхэлъытагъ. Программэм хахьэх олимпийскэ спорт лъэпкъ 43-рэ, самбэр. ЗэрагъэнафэрэмкIэ, атлет мини 9-м ехъумэ турнирым зыщаушэтыщт.Урысыем спортымкIэ иминистрэу, УФ-м и Олимпийскэ комитет итхьаматэу Михаил Дегтяревым къызэриIуагъэмкIэ, УФ-м и Президентэу Владимир Путиным ипшъэрылъкIэ зэнэкъокъур зэхащэ. Ащ изэфэхьысыжьхэр гъэмэфэ Олимпиадэу 2028-рэ илъэсым рагъэкIокIыщтым хэлэжьэщт лъэпкъ командэм игъэпсын лъапсэ фэхъущт.