Къэралыгъо программэу «Урысыем инеущырэ маф» зыфиIорэм къыдыхэлъытагъэу теннис цIыкIумкIэ Адыгэ Республикэм изэIухыгъэ зэнэкъокъу Мыекъуапэ щыкIуагъ. Мыр яплIэнэрэу мыгъэ зэхащагъ.
ТекIоныгъэм ыкIи хагъэунэфыкIырэ чIыпIэхэм афэбэнагъэх Урысыем ишъолъырибгъумэ ялIыкIохэр. Адыгэ къэралыгъо университетым иордэунэу Кобл Якъубэ ыцIэ зыхьырэм кIэли 139-рэ ыкIи пшъэшъэ 85-рэ щызэнэкъокъугъэх.Адыгеим испортсменхэм къэгъэлъэгъон дэгъухэр яIэх, зэкIэмкIи медалипшI къахьыгъ. Унэе зэнэкъокъухэм къащыхэщыгъэх Кощхьэблэ районым ипсэупIэу Вольнэм итеннисистхэр. Зыныбжь илъэс 14-м емыхъугъэхэм якуп хэтыгъэ Арсений Семеновым дышъэ медаль къыфагъэшъошагъ, мы спортсмен дэдэр зыныбжь илъэс 18-м шIомыкIыгъэхэм янэкъокъугъ ыкIи ятIонэрэ чIыпIэр къыдихыгъ. Мыщ фэдэ гъэхъэгъэ дэдэ ышIыгъ Пелагея Калининами, ащ дышъэ медальрэ тыжьынрэ къылэжьыгъэх. Зыныбжь илъэс 12-м емыхъугъэхэм якуп зыщызыушэтыгъэ Дмитрий Устянскэр ятIонэрэ хъугъэ.
Нэбгырэ тIурытIу хъурэ хъулъфыгъэ командэхэм язэнэкъокъухэм тиреспубликэ илIыкIохэм хагъэунэфыкIырэ чIыпIищ къащыдахыгъ. Арсений Семеновымрэ Еремей Кареловымрэ (Ставропольскэ край) текIоныгъэр афагъэшъошагъ. Кощхьэблэ районыр къэзыгъэлъэгъогъэхэ Александр Удаловымрэ Тимофей Поляковымрэ ятIонэрэ чIыпIэр аубытыгъ. Мыекъуапэ испортсменэу Бзаго Дамиррэ Краснодарскэ краим щыщ Георгий Бобровниковымрэ ящэнэрэ хъугъэх. Джащ фэдэу Арсений Семеновымрэ Пелагея Калининамрэ джэрз медаль къахьыгъ. Пелагея Калининамрэ Каролина Репниковамрэ (Краснодарскэ край) ящэнэрэ чIыпIэр къыдахыгъ.ЗэхэщакIохэм къызэраIуагъэмкIэ, къыкIэлъыкIорэ мыщ фэдэ зэнэкъокъур чъэпыогъум и 12-м къыщегъэжьагъэу и 17-м нэс рагъэкIокIыщт.