Цэй З.
Къатыбэу зэтет унэхэм ягъэкIэжьын епхыгъэ IофшIэнхэр республикэм щылъагъэкIуатэх. Ахэр зищыкIэгъэ унэхэр Адыгеим ирайонхэм ыкIи икъалэхэм яадминистрациехэм ащагъэнафэх. ЩыкIагъэу яIэм елъытыгъэу гъэцэкIэжьынхэр арашIылIэх.
Зыхэм унашъхьэр ащызэблахъу. Адрэхэм унэ кIоцIым ирыкIуапIэхэр ащагъэкIэжьых. Мы илъэсымкIэ уни 153-м IофшIэнхэр ащызэшIуахынэу агъэнэфагъ. Къызэлъиубытырэ чIыпIэр квадрат метрэ мин 279-м ехъу. Ахэм ащыпсэухэрэм япчъагъэ нэбгырэ мин 13,5-рэ мэхъу. Мылъкоу тефэщтыр сомэ миллион 329-м шIокIы.— Къатыбэу зэтет уни 145-мэ IофшIэнхэр зэрэщагъэцэкIэщтхэмкIэ зэзэгъыныгъэхэр адэтшIыгъэх. Мы уахътэм ехъулIэу 82-мэ игъэкIотыгъэ IофшIэнхэр ащаухыгъэх. Ахэм атефагъэр сомэ милион 228,7-рэ. Адрэ къэнэгъэ унэхэми япшIылIэжьынэу къэнагъэр макIэ, — къеIо къатыбэу зэтет унэхэм игъэкIотыгъэ гъэцэкIэжьынхэр яшIылIэгъэнхэмкIэ республикэ Фондым итхьаматэу Иуаныкъо Бислъан.АгъэкIэжьырэ унэхэм янахьыбэр Тэхъутэмыкъое районым итых – 47-рэ. МыекъуапэкIэ псэолъэ 40 къыдыхэлъытагъ. Адрэхэр район зэфэшъхьафхэм арытых.Къалэу Мыекъуапэ иурамэу Калининым ыцIэ зыхьырэм тет унэу N 229-р гъэцэкIэжьынхэр зыщызэшIуахыхэрэм ащыщ. Мыщ квартирэ 16 хэт. Илъэс заулэкIэ узэкIэIэбэжьмэ унашъхьэр зэблахъугъагъ, джы псэуалъэм итеплъэ агъэкIэжьынэу IофшIэнхэр рагъэжьагъэх. Чырбыщым нэсэу агъэкъэбзагъ, унэ кIышъом телъынэу щытыр тыралъхьажьы. IофшIэнхэм сомэ миллион 1,5-рэ атефэщт. ТхьамэфитIукIэ гъэцэкIэжьынхэр щаухыщтых.Лифтхэм язэблэхъункIи IофшIэнхэр Фондым зэшIуехых.— Лифтхэу зигъэфедэгъу пIалъэ икIыгъэхэр республикэм щызэблэтэхъух. Мыгъэ къатыбэу зэтет унитфымэ лифт 16 ащагъэкIэжьыгъ. Ащ сомэ миллион 42,4-рэ тефагъ, — къыхигъэщыгъ фондым ипащэ.БлэкIыгъэ илъэсым егъэпшагъэмэ, игъэкIотыгъэ гъэцэкIэжьынхэм апэIухьащт мылъкум мыгъэ хэхъуагъ. Процент 97,7-м нэсыгъ (ахъщэкIэ къэплъытэмэ, цIыфхэм къатынэу щыт сомэ миллион 227,5-м щыщэу миллион 222,3-р къаугъоигъах).Цэй Замир.