«Хроносым» ихъарзынэщ.
Хъурышъо хьаплъхэр къэзытырэ псэушъхьэ лъэпкъхэм якъэгъэнэжьын ыуж ит Адыгеим щыщ бзылъфыгъэм фэгъэхьыгъэ фильм республикэм щытырахыгъ.
«Хъурышъо хьаплъхэр къэзытырэ псэушъхьэ лъэпкъхэм ян» — джары документальнэ кином ышъхьэр. Валерия Заволокинам ар фэгъэхьыгъ. Республикэм ар щэпсэуми зэрэкъэралыгъоу «хъурышъо хьаплъхэр къэзытырэ псэушъхьэ лъэпкъхэм янэкIэ» ашIэ. Илъэс пчъагъэ хъугъэу мы псэушъхьэ лъэпкъхэм якъэгъэнэжьын бзылъфыгъэр дэлажьэ. Ахэр къалэм къыщаубытыхэу, машинэхэм тыраутхэу е шакIохэм ауIэхэу бэрэ къыхэкIы. Ащ фэдэ чIыпIэ ифэгъэ псэушъхьэр Валерие дэжь цIыфхэм къахьы. Мы псэушъхьэхэр зыщиIыгъ чIыпIи иунэ зыдэт щагум дишIыхьагъ. Ар мафэ къэс зэIупхын, ахэр бгъэшхэнхэ фае. Бзылъфыгъэм ыпхъоу Рае ащкIэ иIэпыIэгъу. Джы пшъэшъэжъыер Москва еджакIо кIонэу зегъэхьазыры. Зыпылъ Iофышхор нахь къехьылъэкIыщтми, Валерие ыгу ыгъэкIодырэп.
— Валерие бзылъфыгъэ чан. ПсынкIэу мэгущыIэ, мэгупшысэ, ипшъэрылъхэр егъэцакIэх. Фильмыр тетхыфэкIэ къэуцугъэп. Тэри ащ зыдедгъаштэзэ тиIоф тшIагъэ, — къыхегъэщы документальнэ кином ирежиссерэу Яна Горюн. – Валерие псэушъхьэхэм бэрэ адэгущыIэ, ясэмэркъэу. ЦIыфымрэ псэушъхьэмрэ мыщ фэдэ зэфыщытыкIэу яIэм улъыплъэныр гъэшIэгъоны. Фильмыри дэгъоу, сэмэркъэу нэшанэхэри хэлъэу къэхъуным тыщэгугъы.Документальнэ кинохэр зыщагъэхьазырырэ студиеу «Хроносым» (Краснодар край) ар тырихыгъ. Урысыем икинематографистхэм я Союз хэхьэрэ шъолъыр кино тезыхыхэрэм IэпыIэгъу афэхъурэ Фондыр ащ дэлэжьагъ.Цэй Замир.