ЛIыхъужъныгъэм фэгъэхьыгъэ зэIукI

Мыекъуапэ щыпсэурэ ныбжьыкIэхэр хэушъхьафыкIыгъэ дзэ операцием иветеранэу Евгений Абатуровым мы мафэхэм IукIагъэх. Ащ кIэщакIо фэхъугъ обществэу «ШIэныгъэр».Евгений цIыф зэрымыс быбырэ пкъыгъохэм япилотэу щытыгъ, быбынымкIэ сыхьат мини 3 ригъэкъугъ. Патриотическэ Iофтхьабзэр «Хэгъэгум къулыкъу фэсэхьы» зыфиIорэ проектым щыщ Iахьэу рагъэкIокIыгъ, ар фондэу «Хэгъэгум иухъумакIохэр» зыфиIорэр игъусэу гъэсэныгъэ организацием зэрэхэгъэгоу щитIупщыгъ.

Обществэу «ШIэныгъэм» илектор поселкэу Каменномостскэм дэт кIэлэцIыкIу зыгъэпсэфыпIэ лагерэу «Лань» зыфиIорэм ныбжьыкIэмэ щаIукIагъ. Хэгъэгум къулыкъу фэзыхьыгъэ цIыфым лIыхъужъныгъэм, гушъхьэ кIуачIэм, зэкъош зэфыщытыкIэхэм афэгъэхьыгъэ къэбарэу къыIуатэхэрэм ядэIунхэу кIэлэеджакIомэ амал яIагъ.Евгений Абатуровым дзэ гъогоу къы­кIугъэм ныбжьыкIэхэр щигъэгъозагъэх. Апшъэрэ еджапIэр къызеухым ыуж ар хэгъэгу кIоцI къулыкъухэм, нэужым Росгвардием ащылэжьагъ, етIанэ, хэушъхьафыкIыгъэ дзэ операциер зырагъажьэм, мызэу, мытIоу командировкэхэм агъакIоу хъугъэ, заор зыщыкIорэ чIыпIэмэ ащыIагъ. Ахэм ащыщ дзэ пшъэрылъыр щигъэцакIэзэ хьылъэу къыщауIагъ. Ветераным ипсауныгъэ изэтегъэуцожьын охътабэ текIодагъ, ау зыкъытыгъэп, щыIэныгъэм къыхэуцожьыгъэу мэпсэу, джы IэпэIэсэныгъэу IэкIэлъымкIэ ныбжьыкIэмэ адэгуащэ.«СицIыкIугъэм къыщегъэжьагъэу дзэкIолI сыхъунэу сыфэягъ, сиIахьылхэу, сятэжъ пIашъэхэу заохэм апхырыкIыгъэхэр щысэтехыпIэу сиIагъэх. Ахэм лIыхъужъныгъэу зэрахьагъэм, Хэгъэгум зэрэфэшъыпкъагъэхэм ренэу сарыгушхощтыгъ. Джы ар сэ сипшъэрылъ хъугъэ, амал сиI сихэгъэгу шIулъэгъоу фысиIэр къэзгъэшъыпкъэжьынэу, шIуагъэ къыфэсхьынэу, сыухъумэнэу», — къыхигъэщыгъ Евгений Абатуровым.Ащ кIэлэцIыкIумэ къафиIотагъ тикъэ­ралыгъо итарихъ дзэ щытхъур къызэребэкIырэр, IэкIыб пыймэ пчъагъэрэ зэрапэуцужьышъугъэр, лъэпкъ щынэгъон­чъагъэр къэзыухъумэрэ институтхэр зэриIэхэр.УФ-м хэгъэгу кIоцI IофхэмкIэ и Министерствэ, щынэгъончъэнымкIэ Федеральнэ къулыкъум, нэмыкIхэм пшъэ­рылъэу агъэцакIэхэрэм ныбжьыкIэхэр ащыгъозагъэх. Джащ фэдэу зыпсэ емыблэжьхэу цIыфхэр къэзыгъэ­нэжьыхэрэм афэгъэхьыгъэ къэбархэми ахэр ядэIугъэх.Iофтхьабзэу «Хэгъэгум къулыкъу фэсэхьы» зыфиIорэр обществэу «ШIэныгъэмрэ» Къэралыгъо фондэу «Хэгъэгум иухъумакIохэмрэ» 2024-рэ илъэсым къыщегъэжьагъэу рагъэкIокIы. А уахътэм зэIукIэ 1300-рэ ­зэхащагъ, хэушъхьафыкIыгъэ дзэ операцием иветеран 300-м ехъу лекциемэ къя­джагъэх. Гъэмафэр окIофэ, дзэ щытхъум фэгъэхьыгъэ къэралыгъо мэфэкIхэм атефэу зэIукIэгъухэр щы­Iэщтых.