Лъэпшъыкъо Ф.
Зичэзыу поэтическэ пчыхьэзэхахьэ Мыекъуапэ изыгъэпсэфыпIэу Мэздахэ щыкIуагъ. Амфитеатрэу Iофтхьабзэр зыщызэхащагъэм цIыфыбэ къекIолIагъ. Урысыем итеатральнэ IофышIэхэм я Союз зызэхащагъэр илъэси 150-рэ зэрэхъурэм ар фэгъэхьыгъагъ.
Урыс тхэкIо цIэрыIоу Александр Пушкиным ипроизведениехэм артистхэр къяджагъэх. Романищым къахэхыгъэ пычыгъохэри ащ щыIугъэх. ТхэкIошхом илитературэ цIыфхэм нахь ягъэшIэгъэныр ыкIи поэзием, культурэм агухэр къафэгъэущыгъэнхэр Iофтхьабзэм изэхэщакIохэм пшъэрылъ шъхьаIэу зыфалъэгъужьы.Усэхэм къызыщяджэхэрэ пчыхьэзэхахьэхэр зэхищэнхэр АР-м итеатральнэ зэхахьэ хабзэ фэхъугъ.— Типоэтическэ пчыхьэзэхахьэхэр чIыпIэ зэфэшъхьафхэм ащызэхэтэщэх. Театрэр цIыфмэ апай. Урысыем итеатральнэ IофышIэхэм я Союз зызэхащагъэр илъэси 150-рэ, Урыс драматическэ театрэу А. С. Пушкиным ыцIэ зыхьырэм ыныбжь илъэс 90-рэ хъугъэх. Непэрэ пчыхьэзэхахьэр Пушкиным итворчествэ фэгъэхьыгъ. Ар Урысыем щызэдэпсэурэ цIыф лъэпкъыбэм зэдыряй, якIас, ялъапI. Иусэхэр фабэх, IупкIэх, кIэракIэх, джыгъошIух. Непэрэ лIэужыкIэм тхакIом итхыгъэхэр ышIэнхэм пчыхьэзэхахьэр тегъэпсыхьагъ. ТапэкIэ адыгэ тхакIохэм ятхыгъэхэм тыкъяджэнэу тэгъэхьазыры, — къыIуагъ УФ-м итеатральнэ IофышIэхэм я Союз икъутамэу Адыгеим щылажьэрэм итхьаматэу, АР-м и Театральнэ зэхахьэ ипащэу Ацумыжъ Рустам.
Пушкиным ипроизведение пэпчъ гупшысэ-чылапхъ, итворчествэ зэрэщытэу лъэныкъуабэкIэ узыгъэгъуазэу щыт, ащ илитературнэ пычыгъо пытэу псыхьагъэу, IупкIэу, екIоу сыдигъуи къэIуагъ, IорIотэ ыкIи лъэпкъ бзэ нэшанэр къыхэщы. А. Пушкиным итворчествэ зэрэщытэу урыс литературэр щыIэным, зиIэтыным, литературакIэм лъэпсэ пытэ фэхъуным тегъэпсыхьэгъагъ.— Iофтхьабзэм мурадэу иIэр къыткIэхъухьэрэ лIэужхэм театрэм уасэ фашIэу, ашIогъэшIэгъонэу, шIу алъэгъоу пIугъэнхэр ары. Пушкиным итворчествэ байкIэ лIэуж пчъагъэ къэтэджыгъ. Непэ «Евгений Онегиным» къыхэхыгъэ пычыгъо сыкъеджэщт, — къыIуагъ АР-м инароднэ артистэу Оксана Светловам.Пчыхьэм Мэздахэ къыщызыкIухьэхэрэм ашIогъэшIэгъонэу усэхэм ядэIугъэх.— ТиунагъокIэ бэмышIэу тхэкIошхоу МэщбэшIэ Исхьакъ фэгъэхьыгъэ пчыхьэзэхахьэм тыщыIагъ. Джы Пушкиным иусэхэм тядэIунэу тыкъэкIуагъ. Пушкиным итворчествэ хьалэмэт типшъашъэхэр нэIуасэ фэтшIыгъэх. Театрэм мыщ фэдэ пчыхьэзэхахьэхэр зэришIырэм лъэшэу тегъэгушIо, — къыIуагъ Iофтхьабзэм къекIолIэгъэ Бэгъушъэ Саниет.Искусствэм фэлажьэхэрэмрэ ар зикIасэхэмрэ пчыхьэзэхахьэм зэфищагъэх. Поэтическэ зэIукIэхэр джыри театральнэ зэхахьэм лъигъэкIотэщтых.Лъэпшъыкъо Фатим.