Росреестрэм и ГъэIорышIапIэу АР-м щыIэм унэе псэупIэу мы илъэсым ытхыгъэхэм япчъагъэ зэфихьысыжьыгъ.
2026-рэ илъэсым пыкIыгъэ уахътэр пштэмэ, ащ фэдэу унэ 1173-рэ кIэу республикэм щашIыгъэу кадастрэ учетым хагъэуцуагъ. Ар квадрат метрэ 189898-рэ мэхъу.Унэхэм яшIынкIэ материалэу агъэфедэхэрэм ащыщэу шъолъырым щыпсэухэрэм нахь агу рихьырэр зызэрагъашIэм, блокхэм ахэшIыкIыгъэхэр нахьыбэу къыхахыхэу агъэунэфыгъ. Чырбыщым ятIонэрэ чIыпIэр ыубытыгъ, пхъэм хэшIыкIыгъэхэр ащ ыуж итых.Нахьыбэу зы къат хъурэ унэхэр ары республикэм щыпсэухэрэм агъэуцухэрэр. Росреестрэм и ГъэIорышIапIэ зэригъэунэфыгъэмкIэ, илъэсым пыкIыгъэ мазэхэм ащ фэдэ псэолъэ 853-рэ ашIыгъ. КъатитIоу зэтет унэхэр хэпшIыкIэу нахь макIэх, пстэумкIи 292-рэ аухыгъэу ГъэIорышIапIэм щатхыгъэр. Къатищ хъоу ашIыгъэр унэ 28-рэ ныIэп зэрэхъурэр.Росреестрэм и ГъэIорышIапIэу АР-м щыIэм ипащэу ЕмыкI Мариет къызэриIуагъэмкIэ, унэе псэупIэр ухыгъэу зыплъытэн плъэкIыщтыр учетым хагъэуцуагъэу, фитыныгъэу бысымым иIэр атхыгъэу, амыгъэкощырэ мылъкум и ЗыкI къэралыгъо реестрэ хагъэхьагъэмэ ары.— Мы зэхъокIыныгъэхэр цIыфхэм яфитыныгъэхэр къаухъумэнхэм фытегъэпсыхьагъэх. ЧIыгум е амыгъэкощырэ мылъкум хэхьэрэ псэуалъэм къэбарэу пылъыр икъу фэдизэу къэугъоигъэнэу ащ амал къеты, — къыIуагъ ащ.ЦIыфхэм яIоф нахь гъэпсынкIэгъэным фэшI амыгъэкощырэ мылъкум хэхьэрэ псэуалъэу «бытовой-кIэ» алъытэхэрэр къызэрыкIо шIыкIэм тетэу арагъэтхынхэ амал къараты. «Дачнэ амнистием» ар къыщыдэлъытагъ. Джащ фэдэу Росреестрэм электрон шIыкIэм тетэу ыгъэцэкIэрэ фэIо-фашIэхэр агъэфедэнхэ алъэкIыщт.