БзэшIу А.
Дронхэм ягъэзекIонкIэ фестиваль олимпийскэ резервым испорт еджапIэу В. С. Максимовым ыцIэ зыхьырэм щыкIуагъ.
Iофтхьабзэм хэлэжьэнхэу зыныбжь имыкъугъэ 23-мэ лъэIу тхылъхэр къатыгъэх. Адыгеим икъэлэ шъхьаIэ щыпсэухэрэм ямызакъоу, республикэм ирайонхэм, Ставрополь краим къарыкIыгъэхэми заушэтыгъ, мы лъэныкъомкIэ IэпэIэсэныгъэу аIэкIэлъыр къагъэлъэгъуагъ.Зэнэкъокъум хэлажьэхэрэм лъэныкъоу «Техническэ симуляторыр — цIыф зэрымыс быбырэ пкъыгъохэм якъызэдэчъэн» зыфиIорэмкIэ заушэтыгъ. Ахэр купитIоу гощыгъагъэх: кIалэхэр ыкIи пшъашъэхэр, аныбжь илъэси 10-м къыщегъэжьагъэу 17-м нэс.
Нахьыжъхэм афэдэу зыныбжь имыкъугъэхэр зэнэкъокъугъэх, текIоныгъэм фэбэнагъэх. Дроныр зэрэбгъэIорышIэрэм елъытыгъагъ кIэух къэгъэлъэгъонэу уиIэщтри.Зэфэхьысыжьхэм къызэрагъэлъэгъуагъэмкIэ, кIалэхэм азыфагу пэрытныгъэр щиубытыгъ Мыекъуапэ щыщ Андрей Калашниковым. Ставрополь краим ипсэупIэу Кочубеевскэм къикIыгъэ Кирилл Ажбиевым ятIонэрэ чIыпIэр фагъэшъошагъ, республикэм икъэлэ шъхьаIэ къэзыгъэлъэгъогъэ Никита Сазоновым джэрз медаль къыхьыгъ. ПшъашъэхэмкIэ текIоныгъэр къыдэзыхыгъэр станицэу Ханскэм щыпсэурэ София Оно.Iофтхьабзэм кIэщакIо фэхъугъэх Мыекъуапэ физическэ культурэмкIэ ыкIи спортымкIэ и Комитетрэ АР-м дронхэм ягъэзекIонкIэ и Федерациерэ. Зэнэкъокъур гъэшIэгъонэу, зыныбжь имыкъугъэхэм агу къинэжьыным зэхэщакIохэм анаIэ тырагъэтыгъ ыкIи ар къадэхъугъ.БзэшIу Асхьад.