Район администрацием ихъарзынэщ
«Урысые Федерацием щыпсэухэрэр нахьыбэу спортым хэщэгъэнхэр ыкIи ащ хэхъоныгъэ ышIыныр» зыфиIорэ къэралыгъо программэм игъэцэкIэн къыдыхэлъытагъэу Красногвардейскэ районым спорт чIыпIэ щагъэкIэжьы.
Урысые физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэхэр зыщатырэ чIыпIэу стадионэу «Олимпым» хэтыр джырэ уахътэм зэтырагъэпсыхьэ, ар зэкIэмкIи квадрат метрэ 300 мэхъу.Красногвардейскэ районым ипащэу, партиеу «Единэ Россием» ичIыпIэ къутамэ исекретарэу Гъубжьэкъо Темур IофшIэнхэр зэрэкIохэрэр зэригъэлъэгъугъ. Спортым хэщагъэ хъухэрэм япчъагъэ нахьыбэ шIыгъэнымкIэ мыщ фэдэ чIыпIэхэр IэпыIэгъу зэрэхъухэрэр, кIэлэеджакIохэм къащегъэжьагъэу ныбжь зиIэхэм анэсыжьэу, псэупIэм дэсхэм зэкIэм, яуахътэ мыщ зэрэщагъэкIошъущтыр, «ГТО-м» ишапхъэхэм ятынкIэ дэгъоу зызэрэщагъэхьазырышъущтыр къыхигъэщыгъ районым ипащэ.ЦIыфхэм япсауныгъэ гъэпытэгъэнымкIэ, къыткIэхъухьэрэ ныбжьыкIэхэм япIуныгъэ-гъэсэныгъэкIэ спортым мэхьанэшхо зэриIэр, ащ нахьыбэ хэщэгъэн зэрэфаем игугъу къешIы зэпыт Адыгэ Республикэм и ЛIышъхьэу КъумпIыл Мурат. Къэралыгъо программэу «Урысыем испорт», лъэпкъ проект зэфэшъхьафхэри ащ фэIорышIэх. Ахэм яшIуагъэкIэ 2018-рэ илъэсым къыщегъэжьагъэу спорт чIыпIи 186-рэ Адыгеим щагъэпсыгъ. ДжырэкIэ ахэм япчъагъэ миным шъхьэдэкIы, чIыпIэхэм азыны-къо къоджэ псэупIэхэм ащашIыгъэх. Аужырэ илъэситфыр пштэмэ, физкультурэм ыкIи спортым апылъхэм япчъагъэ процент 13 хэхъуагъ ыкIи процент 60,8-м нэсыгъ.Цэй Замир.