ПэщакIэм нэIуасэ фашIыгъэх

АР-м хэгъэгу кIоцI IофхэмкIэ и Министерствэ иадминистративнэ унэ республикэм и ЛIышъхьэу КъумпIыл Муратрэ зигугъу къэтшIыгъэ къулыкъум иIофышIэхэмрэ АР-м хэгъэгу кIоцI IофхэмкIэ иминистракIэ нэIуасэ щыфэхъугъэх.

Луганскэ Народнэ Республикэм хэгъэгу кIоцI IофхэмкIэ и Министерствэ ипэщэгъэ Алексей Кампф ары ащ фэдэ IэнатIэм Iуагъэхьагъэр.Урысыем хэгъэгу кIоцI IофхэмкIэ иминистрэу Владимир Колокольцевым — видеоконференцие шIыкIэм тетэу Iофтхьабзэр зезыщагъэм пэщакIэм нэ­Iуасэ фишIыгъэх. МинистракIэм IэпэIэ­сэныгъэ зэриIэр, исэнэхьат хэшIыкI ин зэрэфыриIэр ащ къыхигъэщыгъ.«Кампф Алексей Георгий ыкъор IэпэIэсэныгъэшхо зыхэлъ пащэу щыт. Зэхэщэгъэ бзэджэшIагъэм хэлажьэхэрэм, бандитхэм ар ябэныжьыщтыгъ, Иркутскэ хэкум уголовнэ лъыхъон IофымкIэ и ГъэIорышIапIэ, Улан-Удэ хэгъэгу кIоцI IофхэмкIэ и Министерствэ и ГъэIорышIапIэ, Бурятием иполицие япэщагъ. Оренбург хэкум хэгъэгу кIоцI IофхэмкIэ икъулыкъухэм пэщэныгъэ адызэри-хьагъ, 2023-рэ илъэсым Луганскэ Народнэ Республикэм хэгъэгу кIоцI Iоф­хэмкIэ иминистрэ игодзагъ, етIанэ ащ иминистрэу щытыгъ», — къыIуагъ Уры­сыем хэгъэгу кIоцI IофхэмкIэ ими­нистрэ.Федеральнэ къулыкъум иIэшъхьэтет шъолъыр министерствэхэм япащэу агъэ­нэфагъэхэм апэрэ чэзыоу агъэцэкIэщт пшъэрылъхэр къафигъэнэфагъэх. Ахэм ахэхьэх УФ-м и Къэралыгъо Думэ, хэгъэгум ишъолъырхэм, муниципальнэ образованиехэм ялIыкIо къулыкъухэм яхэдзынхэр щынэгъончъэу зэхэщэгъэнхэр, цIыфхэр зэрагъапцIэхэрэм, хэбзэнчъэу наркотикхэр зэрагъэзекIохэрэм апэуцужьыгъэныр, лъэпкъ проектхэр агъэцакIэхэ зыхъукIэ бюджет мылъкур шIуагъэ къытэу гъэфедэгъэным гъунэ лъыфыгъэныр, къэралыгъо фэIо-фашIэхэр нахьышIоу агъэцэкIэнхэм, тхьамыкIагъохэр нахь макIэу гъогухэм атехъу­хьанхэм анаIэ атырагъэтыныр.Адыгеим и ЛIышъхьэ республикэм ренэу IэпыIэгъу къызэрэритырэм фэшI Владимир Колокольцевым зэрэ­фэразэр риIуагъ, IэнэтIакIэм зэрэIуа­гъэхьагъэмкIэ Алексей Кампф фэгу­шIуагъ.«Хэгъэгум ишъолъырхэу рэхьатныгъэ зэрылъхэм, бзэджэшIагъэр макIэу зыщызэрахьэхэрэм Адыгеир зэу ащыщ. Илъэсыбэ хъугъэу аIэ зэкIэдзагъэу республикэм ихэбзэухъумэкIо, игъэцэ­кIэкIо къулыкъухэм, полицейскэхэм Iоф зэрэзэдашIэрэм ар къыкIэкIуагъэу сэлъытэ. АР-м хэгъэгу кIоцI IофхэмкIэ иминистрэу щытыгъэ пэпчъ мы Iофым иIахьышхо хишIыхьагъ», — къыхигъэщыгъ АР-м и ЛIышъхьэ.Урысыем хэгъэгу кIоцI IофхэмкIэ и Министерствэ тапэкIи IэпыIэгъу къыфэ­хъуным, республикэ къулыкъум зэдэлэжьэныгъэу дыряIэр лъагъэкIотэным зэрэщыгугъырэр КъумпIыл Мурат къы­Iуагъ. Адыгеим и ЛIышъхьэ Алексей Кампфи АР-м хэгъэгу кIоцI IофхэмкIэ и Министерствэ щылэжьэрэ пстэуми гъэхъэгъакIэхэр ашIынэу афэлъэIуагъ. Къулыкъум иминистрэу щытыгъэ Олег Безсмельницыным шIуагъэ къытэу Iоф зэришIагъэр, ЛНР-м хэгъэгу кIоцI Iоф­хэмкIэ иминистрэу ар зэрагъэнэфагъэр къыIуагъ ЛIышъхьэм.Алексей Кампф хэгъэгум ипащи, Урысыем хэгъэгу кIоцI IофхэмкIэ и Министерствэ иIэшъхьэтети цыхьэ къызэрэфашIыгъэм пае зэрафэразэр, пэщэныгъэ зыдызэрихьащтхэмрэ хэбзэ-­у­хъумэкIо къулыкъухэмрэ ягъусэу АР-м хэгъэгу кIоцI IофхэмкIэ и Министерствэ ыпашъхьэ ит къэралыгъо пшъэрылъхэр гъэхъагъэ хэлъэу ыгъэцэкIэнхэм зэрэ­фэхьазырыр къыIуагъ.