АР-м и ЛIышъхьэ исоциальнэ нэкIубгъохэр
Къэлэ щыIэкIэ Iэрыфэгъум игъэпсын фэгъэхьыгъэ проект анахь дэгъухэм яя 11-рэ урысые зэнэкъокъу Адыгеим ипроектищ щатекIуагъ.
КIэуххэр Лъэпкъ гупчэу «Урысыер» зыфиIоу Москва дэтым щызэфахьысыжьыгъэх.«Пшъэрылъэу тиIэр республикэм икъалэхэр, икъуаджэхэр нахь зэтегъэпсыхьагъэ шIыгъэнхэр ары. Паркхэу, скверхэу, пчэгухэу, нэмыкI общественнэ чIыпIэхэу цIыфхэм зызщагъэпсэфын, яунагъохэр ягъусэу спортым зыщыпылъынхэ алъэкIыщтхэм язэтегъэпсыхьан лъытэгъэкIуатэ. 2025-рэ илъэсым общественнэ чIыпIэ 24-рэ Адыгеим щагъэкIэжьыгъ. Урысые зэнэкъокъум икIэуххэмкIэ джыри проектитIумэ ахъщэ къафатIупщыгъ. Мы илъэсым общественнэ чIыпIэ 19-мэ, щагуи 3-мэ язэтегъэпсыхьан ыуж титыщт», — къыIуагъ Адыгеим и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат.Зэнэкъокъум текIоныгъакIэ къызэрэщыдихыгъэм ишIуагъэкIэ республикэм джыри проектищ щагъэцэкIэщт. «Мэздахэ» изэтегъэпсыхьан Мыекъуапэ щылъагъэкIотэщт, я 4-рэ чэзыум Iоф дашIэщт. ТIэкIу-тIэкIузэ Нэгыежъ Iуашъхьэ ичапэ джырэ шапхъэхэм атегъэпсыхьэгъэ зыгъэпсэфыпIэ щагъэпсы. ЫпэкIэ лъэсрыкIо лъагъохэр, кушъхьэфачъэкIэ къызщачъыхьащт гъогухэр, зыплъыхьапIэхэр, кIэлэцIыкIу, спорт джэгупIэхэр агъэпсыгъагъэх, зызщагъэпсэфыщт чIыпIэхэм остыгъэхэр ащагъэуцугъэх. Амфитеатрэ, шахмат ешIапIэхэр, архитектурэ псэолъэ цIыкIухэр мыщ къыдэтэджагъэх, куандэхэр, къэгъагъэхэр щагъэтIысхьагъэх.Инэм иурамэу Сединым ыцIэ зыхьырэм илъэсрыкIо бульвар агъэкIэжьы. Адыгэкъалэ В. И. Лениным ыцIэ зыхьырэ проспектыр щызэтырагъэпсыхьэ. ЦIыфхэм зызщагъэпсэфыщт, спортым зыщыпылъыщтхэ паркыр агъэпсы.Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу мыщ фэдэ Iофхэр зэрахьэх. Ащ нэмыкIэу партиеу «Единэ Россием» игукъэкIхэми мэхьанэшхо яI. 2018-рэ илъэсым къыщегъэжьагъэу УФ-м и Президентэу Владимир Путиным пшъэрылъ зэрафишIыгъэм тетэу къэлэ щыIэкIэ Iэрыфэгъум изэтегъэпсыхьан фэгъэхьыгъэ проект анахь дэгъухэм язэнэкъокъу зэхащэ. Къэлэ цIыкIухэм федеральнэ IэпыIэгъу ягъэгъотыгъэнымкIэ ар амалышIоу щыт.