АР-м хэдзынхэмкIэ и Гупчэ комиссие тыгъуасэ я 90-рэ зэхэсыгъоу иIагъэм Iофыгъо 28-мэ ащыхэплъагъэх. Iофтхьабзэр зэрищагъ ащ и Тхьаматэу Сэмэгу Нурбый.
Адыгэ Республикэм и Къэралыгъо Совет — Хасэм ияенэрэ зэIугъэкIэгъу идепутатынымкIэ зы мандат зиIэ хэдзыпIэ кой зэфэшъхьафхэмкIэ кандидатэу зыкъэзыгъэлъэгъуагъэхэм ацIэ къыраIуагъ. Политическэ партие зэмылIэужыгъохэм къагъэлъэгъогъэ нэбгырэ 24-мэ якандидатурэхэм адырагъэштагъ ыкIи ар къэзыушыхьатырэ тхылъхэр аратыжьыгъэх.Нэужым АР-м и Къэралыгъо Совет —Хасэм зы хэдзыпIэ коимкIэ депутат хъунымкIэ Социалистическэ политическэ партиеу «Справедливая Россия» зыфиIорэм ишъолъыр къутамэ къыгъэлъэгъогъэ кандидат 52-мэ ятхылъхэр зэрауплъэкIугъэхэр ыкIи ахэр шапхъэхэм зэрадиштэхэрэр АР-м хэдзынхэмкIэ и Гупчэ комиссие исекретарэу ХьацIэцIэ Фатимэ къыIуагъ. Ахэр кандидатэу агъэнэфагъэх.Джащ фэдэу Урысые политическэ партиеу «Единэ Россием» и Адыгэ шъолъыр къутамэ къыгъэлъэгъогъэ нэбгыри 102-м Гупчэ комиссием хэтхэм адырагъэштагъ. Политическэ партиеу «Новые люди» зыфиIорэм къыгъэлъэгъогъэ нэбгырэ 53-м щыщэу нэбгыри 3-мэ ятхылъхэм щыкIагъэхэр яIэхэу е шапхъэхэм адимыштэу агъэунэфыгъ, ащ къыхэкIэу кандидат 50 агъэнэфагъэр.ДЕЛЭКЪО Анет.