НыбжьыкIэхэм язэхахь

НыбжьыкIэ пэрытхэм язэха­хьэу «Фыщтыр» АР-м и ЛIы­шъхьэу КъумпIыл Мурат игу­къэкIыкIэ 2018-рэ илъэсым къы­щыублагъэу зэхащэ. Хэгъэгум ишъолъыр зэфэшъхьафхэм яныбжьыкIэхэр ащ щызэIокIэх.

Мыгъи Адыгэ Республикэм имуниципалитет пстэуми, джащ фэдэу Тыркуем, Беларусым, Абхъазым, Краснодар краим, Къэбэртэе-Бэлъкъарым, Къэрэщэе-Щэрджэсым, Къалмыкъым, Херсон хэкум ялIыкIохэр Iофтхьабзэм къекIолIагъэх. ЕджэнымкIэ, спортымкIэ, общест­веннэ IофшIэнымкIэ, творчествэмкIэ гъэхъагъэхэр зышIыгъэ ныбжьыкIэхэр къушъхьэу Фыщт ылъапсэ лъэсэу екIущтых. Iофтхьабзэм ипэгъокIэу ахэм язэIукIэ «Налмэсым» и Унэ щыкIуагъ. Мэфищ зекIом фэгъэхьыгъэ шIэныгъэхэр ныбжьыкIэхэм къафаIотагъ.Къушъхьэу Фыщт дэкIоещт ныбжьыкIэ­хэм аныбжь илъэс 18-м щегъэжьагъэу 35-м нэс. Ахэр зэкIэ хэшыпыкIыгъэх. Анахь губзыгъэхэр, IэпэIасэхэр ыкIи чанхэр ары зекIо купым хэхьащтхэр. НыбжьыкIэхэр лъэшэу фестивалым ежэх.Красногвардейскэ районым щыщ ЛIышэ Ислъам Iофтхьабзэм хэлэжьэщт. Фыщт екIурэ къушъхьэ гъогум апэрэп ар зэрэтехьащтыр, 2024-рэ илъэсым кIалэр мы чIыпIэм щыIагъ. Нахь шIэныгъабэ IэкIэлъэу джы ар зекIо ежьэщт.

— ЗекIоныр сикIас. Фыщт екIурэ лъа­гъом апэрэм нахьи джы нахь сытегъэпсыхьагъэу сытехьащт. Гъогур псын­кIэп. Апэрэу къушъхьэм кIохэрэм Iэпы­Iэгъу сафэхъунэу сыхьазыр, — еIо Ислъам.НыбжьыкIэ нэбгырэ 500 фэдиз Iоф­тхьабзэм хэлэжьэщт. Ахэм апае гъэсэныгъэ зэIукIэ зэхащагъ.— ШышъхьэIум и 14-м щегъэжьагъэу и 16-м нэс фестивалыр рекIокIыщт. БлэкIыгъэ илъэсым елъытыгъэмэ, ащ хэлэжьэрэ ныбжьыкIэхэм япчъагъэ хэ­хъуагъ ыкIи Iофтхьабзэм зэхъокIыны­гъэхэр фэхъугъэх. Мыгъэ апэрэу Тыркуем иныбжьыкIэ куп къеблэгъагъ. Ахэм зэдзэкIакIо ягъусэщт. Тиреспубликэ идэхагъэ ядгъэлъэгъущт. Джащ фэдэу лъэпкъ зэгурыIоныгъэмрэ зэкъошны­гъэмрэ ягъэпытэн Iофтхьабзэр фэIорышIэщт, — къыIуагъ ныбжьыкIэ Iоф­хэмкIэ шъолъыр организацием итхьаматэу Хьабый Айтэч.АР-м ныбжьыкIэ IофхэмкIэ и Комитет итхьаматэу Максим Галушкиным фестивалым хэлажьэхэрэм шIуфэс къа­рихыгъ, ячаныгъэ, Адыгеим ихэхъоныгъэ яIахь зэрэхашIыхьэрэм ыкIи ищытхъу чыжьэу агъэIуным зэрэпылъхэм апае зэрафэразэр къыIуагъ.— Илъэс къэс зэхатщэрэ зэхахьэм къекIолIагъэхэм щынэгъончъэу къушъхьэу Фыщт шъузэрэдэкIоещтым игугъу къы­шъуфэтшIыщт. Километрэ 14-м ехъурэ гъогур псынкIэп, кIуачIи, сэнаущыгъи ищыкIагъ, — хигъэунэфыкIыгъ Максим Галушкиным.Ащ нэмыкIэу, «ГосСтарт.Диалог» зыфиIорэ зэIукIэгъур зэхащагъ. Респуб­ликэм игъэцэкIэкIо хабзэ илIыкIохэм ныбжьыкIэхэр гущыIэгъу афэхъугъэх. АР-м ныбжьыкIэ IофхэмкIэ и Комитет итхьаматэу Максим Галушкиным, культурэмкIэ министрэм игуадзэу Ольга Гавшинам, зекIонымкIэ ыкIи зыгъэпсэфыпIэхэмкIэ Комитетым ипащэ игуадзэу Джарымэ Бэлэ, АР-м гъэсэныгъэмрэ шIэныгъэмрэкIэ иминистрэу Евгений Лебедевым ыкIи АР-м экономикэ хэ­хъоныгъэмкIэ ыкIи сатыумкIэ иминистрэ игуадзэу Андар Руслъан Iофтхьабзэм хэлэжьагъэх. ЗэIукIэгъум къекIолIагъэхэм упчIэхэр къатыгъэх, республикэм иминистерствэхэм, чIыпIэхэм япащэхэм джэуапхэр ахэм къаратыжьыгъ.— Хэбзэ къулыкъухэм ыкIи обществэм гъусэныгъэ адытиIэу ныбжьыкIэ полити­кэр лъэгэпIакIэм тещэгъэным тыдэлажьэ. ЗекIоным ныбжьыкIэхэр нахь хэщэгъэным тыпылъыщт, — къыIуагъ зекIоным­кIэ ыкIи зыгъэпсэфыпIэхэмкIэ Комитетым ипащэ игуадзэу Джарымэ Бэлэ.— Нахь мэхьанэ зиIэр ныбжьыкIэхэм Iофэу адатшIэрэр яхэгъэгу шIу алъэгъу­ным, фэшъыпкъэнхэм, ащ къырыкIощтымкIэ пшъэдэкIыжь зэрахьырэр зэхашIыкIыным япхыгъэныр ары. Илъэс къэс зэхатщэрэ Iофтхьабзэхэр а пшъэ­рылъым фэIорышIэх: Iофыгъо гъэнэ­фагъэхэмкIэ зэIукIэгъухэр, гъэсэныгъэм епхыгъэ программэхэр, республикэм ыкIи хэгъэгум ятарихъ, якультурэ, яхабзэхэм афэгъэхьыгъэ проектхэр. Ахэр зэкIэ зы гухэлъ зыфэ­IорышIэхэрэр: шъо, ныбжьыкIэхэм, ти Хэгъэгушхо къырыкIо­щтымкIэ пшъэдэ­кIыжь зэрэшъухьырэр къыжъугурыIоу шъукъэтэджыныр ары, — къыIуагъ АР-м гъэсэныгъэмрэ шIэныгъэмрэкIэ иминистрэу Евгений Лебедевым.— Республикэм ихэхъоныгъэкIэ непэ зэшIотхырэ пстэуми шъуинеущырэ мафэ зыфэдэщтымкIэ мэхьэнэ гъэнэфагъэ яI. Титарихъ лъызыгъэкIотэщтыр шъоры, кIэщакIо шъузфэхъухэрэмкIэ тэ ренэу къыжъудедгъэштэщт, — къыхигъэщыгъ культурэмкIэ министрэм игуадзэу Ольга Гавшинам.Адыгеим иэкономикэрэ исоциальнэ лъэныкъорэ ныбжьыкIэ IофышIэхэр нахьыбэу ахэщэгъэнхэм, социальнэ мэхьанэ зиIэ проектхэм япхырыщынкIэ ныбжьыкIэхэмрэ а Iофым фэгъэзагъэ­хэмрэ язэдэлэжьэныгъэ агъэпытэным ягугъу къашIыгъ.Якъарыу ауплъэкIунэу, шIэныгъакIэхэр агъэфедэнэу ныбжьыкIэхэм къапыщылъ. Джащ фэдэу зэкъошныгъэм игъэпытэн фестивалыр фэлэжьэщт, Адыгеим чIыопс щагъэкIощт уахътэр ныбжьыкIэхэм шIукIэ агу къэкIыжьыщт.Лъэпшъыкъо Фатим.