2025-рэ илъэсым изэфэхьысыжьхэмкIэ, псэупIэ квадрат метрэ мин 600,90-рэ Адыгеим щатыгъ, зы нэбгырэм телъытагъэу квадрат метрэ 1,2-рэ щыIэ хъугъэ.
Мы илъэсми джащ къыщымыкIэу атыныр псэолъэшIхэм япшъэрылъ. Фэтэрыбэу зэхэт унэхэр зэрашIыхэрэм, а лъэныкъом хэхъоныгъэ зэриIэм дакIоу, социальнэ псэупIэ программэхэм ягъэцэкIэни анаIэ тырагъэты. Сабый ибэхэм псэупIэ ягъэгъотыгъэныр ары пстэуми апэ рагъэшъырэр.«ЗэкIэлъыкIокIэ шапхъэ иIэу, игъорыгъоу сабый ибэмэ атефэрэ псэупIэхэр ятэгъэгъоты: блэкIыгъэ илъэсым зэтегъэпсыхьэгъэ фэтэри 172-рэ яттыгъ. Мы илъэсым типшъэрылъыр фэтэри 150-м къыщымыкIэу тыгъэныр ары. Ащ текIодэрэ мылъкум инахьыбэр республикэ бюджетым къекIы — ар сомэ миллион 414-рэ мэхъу. Социальнэ мэхьанэ зиIэ зы Iофыгъо блэкIыгъэ илъэсым икъихьэгъум зэшIотхыгъ, ар унэхэм яшIын зимылъку хэзылъхьагъэхэу, ау къагъэпцIагъэхэм афэгъэхьыгъагъ. ГумэкIыгъо зыпылъ фэшъхьаф псэуалъэ щыIэу агъэунэфыгъэп. Ащ фэдэ хъугъэ-шIэгъэ пхэнджхэр тапэкIэ къэмыхъужьынхэм тылъэплъэ, унэу ашIырэ пэпчъ пылъ къэбарыр зэтэгъашIэ», — къыхигъэщыгъ АР-м и ЛIышъхьэ.Джащ фэдэу, ущыпсэу мыхъунэу алъытагъэхэм цIыфхэр къачIэщыжьыгъэнхэм ыкIи зыщыпсэунхэ алъэкIыщт унэхэм гъэкощыгъэнхэм афэгъэхьыгъэ Iофыгъохэри нахь псынкIэу республикэм щагъэцакIэх. ПсэупIэ коммунальнэ хъызмэтыр гъэкIэжьыгъэным дэлэжьэрэ Фондым ахъщэ IэпыIэгъоу 2026 — 2028-рэ илъэсхэм Адыгеим къыфитIупщынэу сомэ миллион 206,2-рэ агъэнэфагъ.Программэу «Унэгъо ныбжьыкIэр» зыфиIорэмкIэ 2025-рэ илъэсым унэгъуи 102-мэ япсэупIэ амалхэр нахьышIу ашIыгъэх. Мыгъэ ащ фэдэ унэгъо 89-мэ псэупIэхэр зэрагъэгъотыщтых е нахьышIу ашIыщтых, ащ пае сомэ миллион 269-рэ къатIупщыгъ.