А. Гусев
Адыгеим и ЛIышъхьэу КъумпIыл Мурат республикэм испортсмен, итренер пэрытхэм «Мэздахэ» щаIукIагъ. Спортым пылъхэм гъэхъагъэу ашIыгъэхэм афэшI ахэмрэ зыгъэсагъэхэмрэ рэзэныгъэ гущыIэхэр афигъэзагъэх, ыгъэшIуагъэх.
Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, Урысыем и Къэралыгъо Думэ идепутатэу Хьасанэкъо Мурат, АР-м физкультурэмрэ спортымрэкIэ и Комитет итхьаматэу Дэгужъые Мурат, бэнэнымкIэ, боксымкIэ, дзюдомкIэ республикэ федерациехэм, атлетикэ онтэгъумкIэ, щэрыонымкIэ, кушъхьэфэчъэ спортымкIэ кIэлэцIыкIу спорт еджапIэхэм япащэхэр, тренерхэр ыкIи ахэм агъэсагъэхэу дунэе, европэ, урысые первенствэхэм ащатекIуагъэхэр ыкIи хагъэунэфыкIырэ чIыпIэхэр къащызыхьыгъэхэр.Республикэм и ЛIышъхьэ къызэрэхигъэщыгъэмкIэ, Адыгеим испортсменхэмрэ ахэр зыгъасэхэрэмрэ дунэе, урысые зэнэкъокъухэм гъэхъэгъэшIухэр ащашIых, республикэм ищытхъу чыжьэу щарагъаIо.«ТиспортеджапIэхэм якIуалIэхэрэм спортымкIэ ягъэхъагъэхэм лъэшэу тарэгушхо, текIоныгъэшхохэр зыщашIырэ спортым зэрэтфэлъэкIэу IэпыIэгъу тыфэхъу, спортсмен, тренер анахь дэгъухэр яIофшIэн кIэтэгъэгушIух. Адыгеим иныбжьыкIэхэр чанэу спорт Iофтхьабзэхэм ахэлэжьэнхэм, япсауныгъэ агъэпытэным, республикэм испортсменхэу гъэхъэгъэшхохэр зиIэхэм щысэ атырахыным мэхьанэшхо ятэты», — къыIуагъ КъумпIыл Мурат.
Республикэм и ЛIышъхьэ шъхьафэу къызэрэхигъэщыгъэмкIэ, джырэ шапхъэхэм адиштэрэ спорт псэуалъэхэм яшIын, физкультурэм изегъэушъомбгъун зыфытегъэпсыхьагъэр гъашIэр нахь кIыхьэ шIыгъэныр, цIыфхэм ящыIэкIэ-псэукIэ зыкъегъэIэтыгъэныр ары. Мы лъэныкъомкIэ лъэбэкъоу ашIыхэрэр зыфэкIожьыхэрэр апшъэрэ текIоныгъэ зыщашIырэ спортым зегъэушъомбгъугъэныр, спорт еджапIэхэр мылъкукIи, техникэкIи нахьышIоу зэтегъэпсыхьэгъэнхэр ары.Шъугу къэтэгъэкIыжьы Адыгеим спорт учреждение 27-рэ зэритыр: спорт ухьазырыныгъэ зыщарагъэгъотырэ зы гупчэ, олимпиадэхэм ахэлэжьэщтхэр зыщагъэхьазырхэрэ спорт еджэпIи 10, спорт еджэпIи 9, кIэлэцIыкIу-ныбжьыкIэ спорт еджэпIи 6, паралимпийскэ, сурдлимпийскэ резервымкIэ зы спорт еджапIэ. Спорт лъэпкъ 42-мэ нэбгырэ мин 16,8-м ехъурэ апылъ, тренер 552-мэ ахэм Iоф адашIэ.Республикэ спорт Комитетым ипащэу Дэгужъые Мурат къызэриIуагъэмкIэ, гъэрекIуи, мы илъэсым иапэрэ мэзихи тиспортсменхэм дунэе, европэ чемпионатхэм, первенствэхэм, кубокхэм дышъэ медали 6, зы тыжьын ыкIи джэрзи 4 къащахьыгъ. Адыгеим испортсменхэм Урысые зэнэкъокъухэм дышъэ медаль 35-рэ, тыжьынэу — 49-рэ, джэрзэу — 60 къащахьыгъ. 2025-рэ илъэсым Урысыем иныбжьыкIэхэм яя VI-рэ гъэмэфэ Спартакиадэ Адыгеим апэрэ чIыпIэр щиубытыгъ.Республикэм ибазовэ спорт лъэпкъхэм (дзюдом, самбэм, бэнэным, атлетикэ онтэгъум, кушъхьэфэчъэ спортым, атлетикэ псынкIэм, щэрыоным, хьафизэхэм яспорт) гъэрекIо Урысыем спортымкIэ и Министерствэ боксымрэ дэгухэм яспортрэ къахигъэхьагъ.2025-рэ илъэсым спортымкIэ гъэхъэгъэшхохэр зышIыгъэ спортсмен 50-мэ ыкIи тренер 25-мэ пстэумкIи сомэ миллион 17,3-рэ аратыгъ. 2026-рэ илъэсыр къызихьагъэм щегъэжьагъэу спортсмен 64-мэ, тренер 34-мэ сомэ миллион 14,6-рэ хъурэ зэтыгъо ахъщэ IэпыIэгъухэр аIукIагъэх.Спортсмен, тренер анахь дэгъухэр Iофтхьабзэм щагъэшIуагъэх. АР-м и ЛIышъхьэ ирэзэныгъэ тхылъ афагъэшъошагъ щэрыонымкIэ спортеджапIэу С. Алифиренкэм ыцIэ зыхьырэм итренер шъхьаIэу Анастасия Кравцовамрэ атлетикэ онтэгъумкIэ спорт еджапIэу М. Чыржьыным ыцIэ зыхьырэм ипащэу Сихъу Рэмэзанрэ.Удостоверениеу «Урысыем спортымкIэ дунэе класс зиIэ имастер» зыфиIорэр къыфагъэшъошагъ Урысыем щэрыонымкIэ и Федерацие иреспубликэ къутамэ итхьаматэу Алексей Калимуллиным. «Урысыем спортымкIэ имастер» зыфиIорэр аратыгъ боксерэу Грант Егиазарян, атлетикэ онтэгъум пылъхэу Бырдж Айдэмыр, Бгъошэ Асхьад, Роман Оглы, Ордэкъо Астемир, дзюдоистхэу Камилла Дзагаловамрэ Бэслъэнэй Темирланрэ, кушъхьэфэчъэ спортымкIэ гъэхъагъэхэр зышIыгъэхэу Диана Гейко, Артем Гришко, Анастасия Бибик.СпортымкIэ гъэхъэгъэшхохэр зышIыгъэхэм атлетикэ онтэгъум пылъхэу Бзэсэжъ Аслъан, Бгъошэ Асхьад, Бырдж Айдэмыр, Роман Оглы, дзюдоистхэу Мерэм Дамир, Датхъужъ Алый, Рамазан Хидировым, Бэгъ Аслъан, Александр Алифиренкэм ыгъэсэрэ щэрыуакIохэм, дэгухэм яспорт хэлэжьэхэрэ Юлия Башмаковам, Мария Притула, самбистэу Батмэн Амин, щэбзэ щэрыонымкIэ спортсменкэу Светлана Баранцевам, урым-рим бэнэнымкIэ IэпэIасэу Нэхэе Рустам ахъщэ шIухьафтынхэр аратыгъэх.Джащ фэдэу тренерхэу Сергей Алифиренкэм, Асэкъэлэ Бислъан, Делэкъо Адам, КIубэ Хьамед, Сихъу Аслъан, ЦIэIугъошIу Адам ахъщэ шIухьафтынхэр къафагъэшъошагъэх.Iофтхьабзэм ыуж КъумпIыл Мурат текIоныгъэшхохэр зыщашIырэ спортым зегъэушъомбгъугъэным иIофыгъохэмкIэ къэзэрэугъоигъэхэм адэгущыIагъ, спортсменхэмрэ ахэм ятренерхэмрэ текIоныгъакIэхэр ашIынэу, Адыгеимрэ Урысыемрэ ящытхъу арагъэIонэу афэлъэIуагъ. Спортым пылъхэм анаIэ къызэратыригъэтырэм, спортсмен сэнаущхэм IэпыIэгъу ренэу зэрафэхъурэм фэшI республикэм и ЛIышъхьэ зэрэфэразэхэр къаIуагъ.Адыгэ фольклор ансамблэу «Мыстым» хэтхэм Iофтхьабзэм хэлэжьагъэхэм орэд къафаIуагъ.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.