Шъолъырхэмрэ лIэужхэмрэ зэрапхызэ

Адыгеим и ЛIышъхьэу КъумпIыл Мурат мэ­фэкI шыгъачъэу Налщык щыкIуагъэм зыгъэ­псэфыгъо мафэхэм хэлэжьагъ.

Къэбэртэе-Бэлъкъар Республикэм иапэрэ президентэу КIокIо Валерий ишIэжь фэгъэхьыгъэ зэнэкъокъум иурысые шIухьафтынэу «Дерби» зы­фиIорэм икъыдэхын ар фэгъэхьыгъагъ.Шы спортыр зикIасэхэмрэ ащ хэлажьэхэрэмрэ жъугъэу ипподромым щызэфэсыгъэх. ХьэкIэ лъапIэхэм ащыщыгъэх Адыгеим и ЛIышъхьэу КъумпIыл Мурат, Къэрэщэе-Щэрджэс Республи-кэм ипащэу Рашид Темрезовыр, Ингуш Республикэм и ЛIышъхьэу Махмуд-Али Калиматовыр, нэмыкIхэри.КъумпIыл Мурат къызэрэрагъэблэ­гъа­гъэм фэшI рэзэныгъэ гущыIэхэр фи­­гъэ­хьыгъэх Къэбэртэе-Бэлъкъарым ипащэу КIокIо Казбек ыкIи къэзэрэу­гъои­гъэхэм къафэгушIуагъ 2026-рэ шыгъэ-­чъэ лъэхъаным кIэухэу фашIырэмкIэ. ЗэкIэмкIи зэпэчъи 8 къашIынэу щытыгъэр зытесыхэрэ шы лъэпкъышIухэр хэлажьэхэзэ. Ахэм метрэ 1000-м къыщыублагъэу 3200-м нэс къачъыщты-гъэр. Шыкъэгъачъэхэм ахэхьагъэх ащкIэ къулайныгъэу ахэлъыр зэлъашIэ хъугъэ Анзор Альбердиевыр, Мырзабек Каппушевыр, Алихан Махцевыр, Рустам Панжоковыр, Руслан Круглыхиныр, Шоджэн Адам, Джубей Авидзба, Мирбек Мамуровыр, Далим Биджиевыр, Алим Бат­туевыр, нэмыкIхэри.

Шыгъэчъэ мафэм иIофтхьэбзэ анахь шъхьаIэу щытыгъэр Къэбэртэе-Бэлъкъар Республикэм иапэрэ президентэу КIокIо Валерий ишIэжь фэгъэхьыгъэ зэнэкъо­къур ары. Джащ фэдэу Урысыем илъэпкъ­хэм языкIыныгъэ и Илъэс, Пшызэ шъолъыр ишыIыгъхэм я Ассоциа­циеу «Скаковое общество» зыфиIорэм яшIухьафтынхэр ыкIи Майлерхэм я Кубок зэрылъхэр зэхащагъэх.ЗэкIэмкIи шIухьафтынэу илъыгъэр сомэ миллиони 10 фэдиз.Зэпачъэхэм ащыщ текIоныгъэ къыщыдихыгъ Адыгеим икIыгъэ шым. Урысыем рекордыкIэ щигъэуцуи, метрэ 1000 хъурэ гъогууанэр нэгъэупIэпIэгъу 57,1-кIэ къычъи, апэрэ чIыпIэ, шIухьафтынэу Критериум къыдихыгъ шэу Джамила Маф зыцIэм. Ар зезыфагъэр Пщыжъ СултIан, зыгъэсагъэр Пщыжъ Артур. Шыр зиер Адыгеим шыхэр щызыIыгъхэмрэ шыхэр зиехэмрэ я Ассоциацие итхьаматэу Кубэщыч Анзор.НэмыкI хьэкIэ лъапIэхэм ягъусэу АР-м и ЛIышъхьэ зэнэкъокъум щытекIуагъэхэр ыгъэшIуагъэх. Шыгъачъэм икIэуххэмкIэ КъумпIыл Мурат къыхигъэщыгъ мыщ фэдэ Iофтхьабзэхэм шыхэм яхъун ыкIи шы спортым къэралыгъом хэхъоныгъэ зэрэщырагъэшIырэр. Зэнэкъокъум ана­хьэу джыри имэхьанэ къэзыIэтырэр Урысыем щыпсэурэ лъэпкъхэм языкIыныгъэ и Илъэс ахэр зэрэрагъэкIокIыхэрэр ары. КъумпIыл Мурат джащ фэдэу мэхьанэшхо иIэу ылъытагъ Къэбэртэе-Бэлъ­къарым иапэрэ президентэу КIокIо Валерий ыцIэкIэ зэпачъэхэр зэрэзэхащагъэхэр — ащ Iофыбэ зэшIуихыгъ лъэпкъ хабзэхэр гъэпытэгъэнхэм ыкIи къызэтегъэнэгъэнхэм, Темыр Кавказым щыпсэухэрэм азыфагу зэныбджэгъуныгъэрэ зэгурыIоныгъэрэ илъынхэм апае. КIокIо Мухьамэд ыкъоу Валерий ыцIэ Адыгеими щашIэжьы ыкIи щагъэлъапIэ. Непэ ащ рихьыжьэгъэ Iофыр лъагъэкIуа­тэ. Къэбэртэе-Бэлъкъарми, Адыгеими арысых IэпэIасэхэу шыхъунми, шыуджэгунми афэIазэхэр зищыIэныгъэ хъу­гъэхэр.«АдыгэхэмкIэ, кавказ лъэпкъ пстэухэм­кIи афэдэу, шым тесынхэр — тарихъ, лIэшIэгъубэм къапкъырыкIыгъэ хабз, нэмыкIхэм тахэзымыгъэкIуакIэхэрэм ащыщ. Шыхъунымрэ шыуджэгунымрэкIэ амалхэр тэ кIэн баеу къытфагъэнагъэх, ыкIи типшъэрылъ ар къэтыухъумэныр лIэужэу тауж къикIыщтхэм апае», — къыIуагъ КъумпIыл Мурат.ЛIышъхьэм джащ фэдэу къыхигъэ­щыгъ шыгъачъэхэу шъолъырхэмрэ лIэужхэмрэ зэзыпхыхэрэм мэхьанэшхо зиIэ пшъэ­рылъэу зэрахьэрэр: тарихъым, атэжъхэм яхабзэхэм, культурнэ кIэнэу зэдытиIэм лъытэныгъэ афэшIыгъэныр. Адыгеим икъэралыгъо хабзэ мы лъэныкъом Iэпы­Iэгъу регъэкIы, шы спортымкIэ респуб­ликэ еджапIэм Iоф ышIэн амал рагъэгъоты республикэм шыхъун Iофым хэ­хъоныгъэ щишIыным пае. Шыхъунымрэ шыу Iоф хабзэхэм якъызэтегъэнэнрэ яIахьышIу хашIыхьэ Адыгеим шыхэр щы­зыIыгъхэмрэ шыхэр зиехэмрэ я Ассоциациерэ общественнэ организациеу «Шыу хасэмрэ».АР-м и ЛIышъхьэ ипресс-къулыкъукъытырэ къэбархэмкIэ