Адыгеир апэрищым ащыщ

Адыгеим икъэлэ шъхьаIэ физкультурникым и Мафэ щыха­гъэунэфыкIыгъ. Мыекъуапэ щы­псэухэ­рэмрэ ащ ихьакIэхэмрэ кушъхьэфачъэхэм атесхэу урам­хэм къарычъагъэх.

Спорт Iофтхьабзэм хэлэжьэщтхэр пчэдыжьым Зэкъошныгъэм и Гупчэ къыщызэрэугъоигъэх, нэужым зэхэтхэу урамхэу Пролетарскэм, Пионерскэм, Краснооктябрьскэм ыкIи Максим ­Горькэм ыцIэ зыхьырэм арычъагъэх. Кушъхьэфэчъэ зекIонымкIэ IэпэIэсэныгъэ зиIэхэм къащегъэжьагъэу унагъоу кIэлэцIыкIухэр зигъусэхэм анэсыжьэу ащ хэлэжьагъэх.Мыр къэлэдэсхэр нахьыбэу физкультурэм пыщэгъэнхэм, псауныгъэмкIэ шIуа­гъэ къэзытырэ псэукIэ къыхэзы­хыхэрэм япчъагъэ хэхъоным фытегъэ­псыхьэгъэ мэфэкI Iофтхьабзэхэм зэу ащыщ.«Ащ фэдэу чанэу ящыIэныгъэ лъа­гъэкIотэным фэщэгъэ цIыфыбэ зэIукIагъэу плъэгъуныр лъэшэу гуапэ. Урысыем щыпсэухэрэм языкIыныгъэ и Илъэс­кIэ мы мэфэкIым мэхьанэшхо иI. Ар иIофшIакIэкIэ, игъэхъагъэхэмкIэ, псауныгъэмкIэ шIуагъэ къэзытырэ псэукIэм ихабзэхэр зыгъэпытэхэрэм ямэфэкI. Мы мафэм республикэм ирайонхэм зэкIэми спорт Iофтхьабзэхэр, фестивальхэр, унэ­­гъо спорт зэнэкъокъухэр ащы­кIуа­гъэх.Физкультурникым и Мафэ къыщы­дэлъытэгъэ Iофтхьабзэхэм спортым цIыфхэр зэрэзэрипхыхэрэр, гъэхъэгъа­кIэхэм зэрафищэхэрэр джыри зэ къызэраушыхьатырэм сицыхьэ телъ. Ащ фэшI псауныгъэмкIэ шIуагъэ къэзытырэ псэукIэм цIыфхэр нахь фэщэгъэнхэм фытегъэпсыхьэгъэ пшъэрылъэу Президентэу Владимир Путиным къыгъэуцугъэхэм ягъэцэкIэн лъытэгъэкIуатэ. КIэлэцIыкIухэм, ныбжьыкIэхэм ыкIи на­хьыжъхэм физкультурэм пылъынхэу, япсауныгъэ агъэпытэнэу, чанэу псэунхэу амалышIухэр ятыгъэнхэм ыуж тит. АщкIэ IэпыIэгъушхо мэхъух «Урысыем испорт» зыфиIорэ къэралыгъо программэр, лъэпкъ проектхэр, «Единэ Россием» ипрограммэхэр.Ахэм яшIуагъэкIэ 2018-рэ илъэсым къыщыублагъэу спорт псэолъи 186-рэ Адыгеим щыдгъэпсыгъ. ПстэумкIи непэ шъолъырым итыр 1089-рэ мэхъу, ахэм азыныкъор къоджэ псэупIэхэм адэт. ТапэкIи республикэм щыпсэурэ пэпчъ, ныбжьым ыкIи чIыпIэм ямылъытыгъэу, спортыр къызIэкIэгъэхьэгъошIу фэхъуным тыдэлэжьэщт!» — къыIуагъ Адыге­им и ЛIышъхьэу, «Единэ Россием» ишъолъыр къутамэ и Секретарэу КъумпIыл Мурат.Республикэм и ЛIышъхьэ къызэрэхигъэщыгъэмкIэ, аужырэ илъэситфыр пштэмэ, шъолъырым щыпсэоу физкультурэм е спортым апылъхэм япчъагъэ процент 13 хэхъуагъ ыкIи 60,8-м нэ­сыгъ. 2026-рэ илъэсым иапэрэ мэзих зэфэпхьысыжьмэ, псауныгъэмкIэ шIуагъэ къэзытырэ псэукIэр къыхэзыхыхэрэм япчъагъэкIэ пэрытныгъэр зыIыгъ шъо­лъырищым Адыгеир ащыщ хъугъэ.