Делэкъо А.
Урысые социальнэ Iофтхьабзэу «Щынэгъончъагъэр лъыгъэкIотэгъэныр» зыфиIорэм ишъолъыр уцугъо Адыгеим щырагъэжьагъ.
Федеральнэ проектэу «ГъогурыкIоныр щынэгъончъэныр» зыфиIорэм хэхьэрэ лъэпкъ проектэу «ЩыIэныгъэм пае инфраструктурэм» мы социальнэ Iофтхьабзэр къыдыхэлъытагъ ыкIи УФ-м хэгъэгу кIоцI IофхэмкIэ и Министерствэ и Къэралыгъо автоинспенкцие пхырещы. Мыщ фэгъэхьыгъэ пресс-зэIукIэ кIэлэцIыкIухэм гъэсэныгъэ тедзэ зыщарагъэгъотырэ республикэ Гупчэм мы мафэхэм щыкIуагъ.Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, гъогурыкIоныр щынэгъончъэнымкIэ Къэралыгъо автоинспекцием и ГъэIорышIапIэ ипащэу Андрей Огурцовыр, гъэсэныгъэмрэ шIэныгъэмрэкIэ министрэм игуадзэу Пэрэныкъо Сусанн, псауныгъэр къэухъумэгъэнымкIэ министрэм игуадзэу Максим Коробкэр, Къэралыгъо автоинспекцием и ГъэIорышIапIэ пропагандэмкIэ иотдел ипащэу Бзэджэжъыкъо Мурат, Адыгеим шъолъырым игъэIорышIэнкIэ и Гупчэ ипащэу Къоджэшъэо Казбек, социальнэ компаниеу «Щынэгъончъагъэр лъыгъэкIотэгъэныр» зыфиIорэм ипащэу Дарья Закаличнаяр.Гъогу зэхэкIыпIэхэм ащыхъурэ хъугъэ-шIагъэхэм анаIэ нахь тырадзэныр, мы чIыпIэхэм узэращызекIон фэе шапхъэхэр ягъэшIэгъэнхэр ары Iофтхьабзэм имурад шъхьаIэр.ГъогурыкIоным ишапхъэхэр зэрагъэцакIэхэрэм, Адыгеим игъогухэм къатехъухьэрэ хъугъэ-шIагъэхэм къатегущыIагъ Андрей Огурцовыр.— Лъэпкъ проектым къыдыхэлъытагъэу тишъолъыр игъогухэр, иурамхэр дэгъоу зэтырагъэпсыхьагъэх. Хэбзэ къулыкъухэм, Къэралыгъо автоинспекцием, общественнэ организациехэм ялIыкIохэм ыкIи къэбар жъугъэм иамалхэр зэгъусэхэу зэхащэгъэ Iофтхьабзэхэм яшIуагъэ къызэрэкIорэр гъэнэфагъэ, ау джыри Iоф зыдэпшIэн фаер мымакIэу тиI.Iофтхьабзэу «Щынэгъончъагъэр лъыгъэкIотэгъэныр» зыфиIорэр зыфэгъэхьыгъэр гъогу зэхэкIыпIэхэм адэжь гъогурыкIоным ишапхъэхэр щамыукъонхэр ары. Мы чIыпIэхэр гумэкIыгъо къызыпыкIыхэрэм ащыщых, авариехэр бэу къащэхъух. Мыщ епхыгъэ шIэныгъэхэр водительхэми, лъэсрыкIохэми аIэкIэлъынхэ фае. Ащ къыхэкIыкIэ автоеджапIэхэми Iофтхьабзэхэр ащыкIощтых, цIыф къызэрыкIохэми гущыIэгъу афэхъущтых, — къыIуагъ Андрей Огурцовым.Нэужым мы илъэсым имэзищ изэфэхьысыжьхэр ащ къышIыгъэх. Ащ къызэриIуагъэмкIэ, гъогу зэхэкIыпIэхэм адэжь гъогу хъугъэ-шIэгъэ 69-рэ къащыхъугъ. ГъэрекIо мыщ фэдэ иуахътэ егъэпшагъэмэ, ар процент 13,8-кIэ нахь макI. Нэбгыри 7 хэкIодагъ, 78-мэ шъобжхэр атещагъэхэ хъугъэ. 2025-рэ илъэсыр пштэмэ, нэфрыгъуазэ зытемыт урам зэхэкIыпIэхэм адэжь нахьыбэу хъугъэ-шIагъэхэр зыщагъэунэфыгъэхэр. Пчъагъэр 147-м нэсыгъ, 12-мэ ядунай ахъожьыгъ, 167-мэ шъобжхэр хахыгъэх.АР-м иминистрэхэм я Кабинет и Тхьаматэ игуадзэу Хъоткъо Хъызыр гъогурыкIоным ишапхъэхэр республикэм зэрэщагъэцакIэхэрэм иIофыгъохэм нэужым къатегущыIагъ. Гъогухэм ящынэгъончъэнкIэ Комиссиеу республикэм щызэхэщагъэм Адыгеим и ЛIышъхьэу КъумпIыл Мурат зэритхьаматэр, мы лъэныкъом ар ежь ышъхьэкIэ зэрэлъыплъэрэр, гумэкIыгъоу къэуцухэрэм дэгъоу зэращыгъуазэр ащ къыхигъэщыгъ.Пэрэныкъо Сусаннэ кIэлэеджакIохэм ыкIи ахэм янэ-ятэхэм алъэныкъокIэ зэрахьэрэ Iофтхьабзэхэм нэужым къатегущыIагъ. Максим Коробко ипсалъэ нахь къыщыхигъэщыгъэхэм ащыщ апэрэ медицинэ IэпыIэгъур зэрарагъэгъотырэр. Къоджэшъэо Казбек яIофшIэн игугъу къышIызэ, гъогурыкIоным ишапхъэхэр зэраукъохэрэм фэгъэхьыгъэу къэбархэу социальнэ хъытыухэм къарыхьэхэрэм зэралъыплъэхэрэр къыхигъэщыгъ. Анахь хэукъоныгъэ цIыкIуми тхьамыкIагъо къызэрэхэкIын ылъэкIыщтыр ащ къыIуагъ. Ахэр дэгъэзыжьыгъэнхэм пае полицием, хэбзэ къулыкъухэм, къэбар жъугъэм иамалхэм зэпхыныгъэ зэдыряIэу зэдэлажьэх, гъогурыкIоным ишапхъэхэр къизыIотыкIырэ видеороликхэр социальнэ хъытыухэм къарагъахьэх.Социальнэ кампаниеу «Щынэгъончъагъэр лъыгъэкIотэгъэныр» зыфиIорэм ипащэу Дарья Закаличнаям яIофшIэн зэрэзэхащэрэр къэзэрэугъоигъэхэм къафиIотагъ. Пчъагъэхэм ягугъу къышIызэ, Урысыем игъогухэм къатехъухьэгъэ хъугъэ-шIэгъабэхэр гъогу зэхэкIыпIэхэм къазэрэщыхъугъэхэр къыIуагъ. ГъогурыкIоным хэлэжьэрэ пстэуми шапхъэхэр агъэцэкIэнхэ зэрэфаер хигъэунэфыкIыгъ.ДЕЛЭКЪО Анет.