Адыгеим и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат Адыгэкъалэ зэкIом, пшъэрылъыбэ зыгъэцэкIэрэ Гупчэм (МФЦ-м) икъутамэу охътэ благъэхэм къызэIуахыщтыр зычIэтыщт унэм гъэцэкIэжьынхэр зэрэщыкIорэм зыщигъэгъозагъ.
ЛIышъхьэм игъусагъэх федеральнэ инспектор шъхьаIэу Сергей Дрокинымрэ АР-м и Къэралыгъо Совет — Хасэм и Тхьаматэ игуадзэу Iэщэ Мухьамэдрэ.МФЦ-м икъутамэу Адыгэкъалэ дэтым иофис къекIурэ унэ горэм джыдэдэм чIэт. Къалэм исоциальнэ инфраструктурэ иучреждениеу цIыфхэм бэрэ зызыфагъазэхэрэм ар зэу ащыщ. 2025-рэ илъэсым нэбгырэ 15800-мэ яфэIо-фашIэхэр мыщ щагъэцэкIагъэх. Ахэм ядэгъугъэ яолIагъэхэри икъоу ыгъэрэзагъэх. УнакIэм зыкIожьхэкIэ, цIыфхэми, къутамэм иIофышIэхэми яIофхэр нахьышIу хъущтых.Къэлэ гупчэм, Лениным ыцIэ зыхьырэ проспектым тет унэм учреждениер ахьыжьыщт. Псэуалъэр зием имылъкукIэ гъэцэкIэжьын IофшIэнхэр зэхащэх. Джыдэдэм псэолъэшIхэм унэр зэрэщытэу агъэкIэжьы. Илъэсыр имыкIызэ къэралыгъо, муниципальнэ фэIо-фашIэхэр зыщагъэцэкIэщтхэ, джырэ шапхъэхэм адиштэщт къутамэр мыщ къыщызэIуахынэу рахъухьэ.Республикэм ипащэ унэр къыплъыхьагъ, подрядчикым дэгущыIагъ, джырэ уахътэм диштэу ар зэтегъэпсыхьэгъэн зэрэфаер къыIуагъ.КъумпIыл Мурат зэрэхигъэунэфыкIыгъэмкIэ, цIыфхэр социальнэу ухъумэгъэнхэмкIэ, «Единэ Россием» инароднэ программэ игъэцэкIэнкIэ Урысыем и Президент пшъэрылъэу къыгъэуцугъэхэр зэкIэ республикэм щагъэцакIэх, мы лъэныкъомкIэ МФЦ-хэм мэхьанэшхо араты.Шъугу къэтэгъэкIыжьы непэкIэ АР-м и МФЦ офис шъхьаIэр, къутэми 10, структурнэ подразделение 43-рэ зэрэхахьэхэрэр. Республикэм щыпсэухэрэм япроцент 93-мэ якъэралыгъо, ямуниципальнэ фэIо-фашIэхэр МФЦ-хэм ащагъэцакIэх. Мыщ фэдэ гупчэхэм фэIо-фэшIэ 240-рэ ащызэшIуахы. ГущыIэм пае, федеральнэ фэIо-фэшIэ 88-рэ, шъолъыр фэIо-фэшIэ 64-рэ, муниципальнэ фэIо-фэшIэ 88-рэ ахэм ащагъэцакIэ. 2025-рэ илъэсым республикэм исхэм фэIо-фэшIэ мин 530-рэ фэдиз афагъэцэкIэгъагъ. Ахэм ядэгъугъэ цIыфхэр икъоу ыгъэрэзагъэх. Предпринимательхэм яфэIо-фашIэхэр гупчищмэ ащафагъэцакIэ. ГъэрекIо ащ фэдэ фэIо-фэшIэ мин 24-м ехъу ахэм ащызэхащагъ.«Анахь шъхьаIэр — цIыфхэр МФЦ-хэм дэгъоу зэрякIуалIэхэрэр ары. Республикэм исхэм мэхьанэшхо зиIэ Iофыгъо пчъагъэ мыхэм ащызэшIуахы — амыгъэкощырэ мылъкур зэряер къэзыушыхьатырэ тхылъыр къазэраратырэм щегъэжьагъэу социальнэ IэпыIэгъу къазэрафэхъухэрэм нэсыжьэу. КъяолIэрэ нэбгырэ пчъагъэм зэрэхахъорэм къеушыхьаты фэIо-фашIэхэр зы чIыпIэ зэрэщагъэцакIэхэрэр Iэрыфэгъоу зэрэщытыр. Муниципалитетхэм арыт МФЦ-хэр тапэкIи социальнэ инфраструктурэм изегъэушъомбгъун фэлэжьэнхэ, къэралыгъо фэIо-фашIэхэр шъхьэихыгъэу, Iэрыфэгъоу ахэм ащызэхащэнхэ фае», — къыIуагъ АР-м и ЛIышъхьэ.Республикэм ипащэ МФЦ-хэм язегъэушъомбгъункIэ Адыгэ Республикэм IофшIэнымрэ социальнэ хэхъоныгъэмрэкIэ и Министерствэ пшъэрылъ гъэнэфагъэхэр фишIыгъэх. Ахэм ащыщ МФЦ-хэм муниципальнэ фэIо-фашIэу агъэцэкIэрэ пчъагъэм хэгъэхъогъэныр, джырэ уахътэм диштэу цифрэ технологиехэр гъэфедэгъэнхэр, цIыфхэм нахьышIоу яфэIо-фашIэхэр афызэхэщэгъэнхэр.АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет.