Физкультурникым и Мафэ хэзыгъэунэфыкIы зышIоигъохэм апае спорт Iофтхьэбзэ ин Мыекъопэ къэлэ гупчэ зыгъэпсэфыпIэм щыкIощт. Тхьамафэ къэс рекIокIыщт къэчъэнхэм я 139-рэ ублэгъукIэ шышъхьэIум и 8-м ар агъэмэфэкIыщт.
АР-м ныбжьыкIэ IофхэмкIэ и Комитет къызэритыгъэмкIэ, Iофтхьабзэм хэлажьэ зышIоигъохэр къэлэ гупчэ зыгъэпсэфыпIэм дэт щэрэхъышхом дэжь щызэрэугъоищтых. Километритф зикIыхьэгъэ гъогууанэр ахэм аукIочIын фае, лъагъор стадионымрэ шахмат джэгупIэмрэ апхырыкIыщт.Пчэдыжьым сыхьатыр 7-м гъогууанэм тхьабзэхэр тыралъхьащтых, 8-м ыныкъом хэлэжьэщтхэр зэрэугъоищтых, 8 хъункIэ такъикъ 15 иIэу къэчъэным зыфагъэхьазырыщт, рагъэжьэнкIэ такъикъитф къэнагъэу зэхэтхэу сурэт зытырахыщт, 8-м къэчъэныр аублэщт. Сыхьатыр 9-м къыщегъэжьагъэу 10-м нэс зэфэхьысыжьхэр ашIыщтых.ГуфакIоу хэлажьэ зышIоигъохэр шъолъыр Комитетым Iофтхьабзэм регъэблагъэх — сурэттеххэр, ухьазырынхэр резыгъэкIокIыщтхэр, QR-р IункIыбзэхэм якъызэIухын Iоф дэзышIэщтхэр. Ащ пае ищыкIэгъэ къэбарыр мыщ ит — https://vk.cc/d00TIc. Мыщ фэдэ IэпыIэгъум фэхьазырхэм платформэу «Добро.ру» зыфиIорэм сыхьатхэр щафатхыщтых.Унагъохэр, ныбджэгъу купхэр мэфэкIым хэлэжьэнхэ алъэкIыщт. Псы, шхынхэр, гъэмэфэ паIохэр къыздаштэнхэ зэрэфаем зэхэщакIохэм анаIэ тырарагъадзэ.